Marko 12:1-44
12 Jesu wakaamba kuvereketa na ivona ecishandisa muezaniso, eciti: “Mwanarume umweni wakasima munda wo muuvha, woutendeneja ngo fenzi, woca pokusvinira uvha mu mundemo, wovaka nyumba yakareba,* tevere wakausiira varimi, woita hwendo.
2 Pa nguva kwayo, wakatuma muranda umwe kuti apuwevo mucero yo mu munda wo muuvha.
3 Asi ivona vakamubata, vomutaka, vomupindisa acina ciro.
4 Iyena wakavatumirazve muranda umweni, asi ivona vakamutaka mu musoro, perepo vomutuka.
5 Wakavatumirazve muranda umweni, vomuuraya. No vamwenizve vazinji: Vamweni vakavataka, vamwenizve vakavauraya.
6 Wakasara na umwe, mwana wake anodiwa. Iyena wakamutumira kwavari eciti: ‘Vanozoreremeja mwana wangu.’
7 Asi varimi vaya vakavhunjana ngocavo kuti: ‘Nga uwu anozogara utaka. Viyanyi, ngatimuuraye, kuti tisare no utaka hwake.’
8 Ngo kudaro, ivona vakamubata vomuuraya, vomukhandira kunja ko munda wo muuvha.
9 Mune wo munda anozoitenyi? Anozoviya wouraya varimi vaya, perapo wopa vamweni munda wo muuvha.
10 Matahwa anoti: ‘Buwe rakarambwa ngo vavaki rakazova buwe guru ro pacikina.
11 Buwe iri rinovha kuna Jehovha,* irona rinoshamaisa.’ Amuzivi kumboverenga matahwa aya here?”
12 Ngo kudaro, ivona vaida kumusunga, asi vaithya mbungano, ngokuti vakaziva kuti muezaniso uwu wainangira ivona. Ivona vakamusiya, vopinda.
13 Tevere, vakamutumira Vafarisi vamweni no vateveri va Herodhi kuti vamubate ngo magama ake.
14 Pavakaguma, vakamuvhunja kuti: “Mujijisi, tinoziva kuti makazara ngo cokwadi, amupsaki kudakajisa mundhu, ngokuti amusoti mavonekero okunja o vandhu, asi munojijisa cokwadi ngo pamusoro pa Mwari. Zvinotendehwa kushabira Sezari kana kuti azvitendehwi?
15 Tinodikana kushaba kana kuti atidikani?” Eciziva ucengejeri hwavo, wakavavhunjisa kuti: “Munondiejerenyi? Viisanyi cereni* rimwe ndirivone.”
16 Vakamuviisira rimwe, iyena wakavavhunja kudari: “Pikica iyi no zvakatahwari ngo zvaani?” Ivona vakati: “Ngo zva Sezari.”
17 Jesu wakavavhunja kuti: “Ipanyi Sezari zviro zva Sezari, ipanyivo Mwari, zviro zva Mwari.” Ivona vakakahamara ndiyena.
18 Vasadhusi vanonangaya kuti akuna kumuka ko vakafa, vakaviya vomuvhunjisa kudari:
19 “Mujijisi, Mosi wakatitarira kuti, kudari nevanji vakafa vosiya mukaji acina mwana, munukuna wake anodikana kugara utaka, womusijira mubarihwana wa nyakufa.
20 Asi, kwainga no hama nomwe. Nevanji vavo vakarovora, vofa vacizivi kubara mwana.
21 Hama yocipiri yakamurovora, asi yofa icizivi kubara mwana, zvondhozvo zvakaitikavo no hama yocitatu.
22 Vanomwe vese avazivi kubara mwana. Pakupejisira, mwanakaji wiya wakafavo.
23 Pakumuswa ko vakafa, mwanakaji uwu anozova mukaji waani? Ngokuti vese vakava majimwamuna ake.”
24 Jesu wakavadavira kuti: “Imwimwi makarasika, ngokuti amuzivi Matahwa nokuti simba ra Mwari.
25 Ngokuti pavanozomuswa ko vakafa, vanarume avazorovori, vanakaji avazorovohwi, asi vanozoezana no ngirozi jo kumatenga.
26 Asi, ngo pamusoro po kumuswa ko vakafa, amuzivi kuverenga mu bhuku ra Mosi, ngo zvakaitika pa pfiba ro muzwa, Mwari paakati: ‘Inini ndiri Mwari wa Abhirahama, Mwari wa Izaki na Mwari wa Jakobe’?
27 Iyena asipi Mwari wo vakafa, asi ndi Mwari wo vanopona. Imwimwi makarasika maningi.”
28 Umwe wo vatari wainga aguma, wakavazwa vecivereketesana. Paakavona kuti Jesu wainga avadavira ushoni, wakamuvhunjisa kuti: “Ngo wapi mupango wokutanga?”
29 Jesu wakamudavira kuti: “Wokutanga nga uwu: ‘Izwai Iziraeri, Jehovha* Mwari wedu ndi Jehovha* umwe basi.
30 Idai Jehovha* Mwari wako ngo mwoyo wako wese, upenyu hwako hwese, murangariro wako wese no simba rako rese.’
31 Wocipiri nga uwu: ‘Idai mudoni wako inga zvaunojiita.’ Akucinazve mupango mukuru kupinda iji.”
32 Mutari wakamuvhunja kuti: “Mujijisi, mabhuya izvona, mukuzwirana no cokwadi, ‘Mwari ndiyena Ega basi, akucinazve umweni’;
33 kumuda ngo mwoyo wese, ngo kuzwisisa kwese, ngo simba rese, no kudisa mudoni wako inga madire aunojiita, zvinosisira maningi kupinda zvipo zvese zvinopiswa no mupiro.”
34 Jesu eciziva kuti wadavira ushoni, wakamuvhunja kuti: “Auripi ndhambo no Umambo hwa Mwari.” Apanazve wakazova no cicunge co kumuvhunjisa.
35 Asi, Jesu paaienderera mberi ecijijisa mu themberi, wakati: “Ngenyi vatari vanonanga kuti Kristu ndiyena mwana wa Dhavhidhi?
36 Dhavhidhi ecitungamirihwa ngo mujimu mucena wakati: ‘Jehovha* wakavhunja Mambo wangu kuti: “Garai pa mukono muho wangu mbhera ndidire vavengi vako pasi po soka jako.’”
37 Dhavhidhi anomudanija Mambo, zvingaitisa kudini kuti aite mwana wake?”
Vandhu vakawanda vaidakara ngo kuzwa zvaainanga.
38 Paaijijisa, wakaenderera mberi eciti: “Bhasopanyi no vatari, vanofamba vakasimira nguvo jakareba, vecida kucungamijwa mu mabazari.
39 Ivona vanoda zvigaro zvo kumbeji* mu masinagoga no ndau jino nduma mu mabuso.
40 Vanotorera noni zviro,* vecivanyepejera ngo kuita mukumbiro jakareba. Ava vanozotongwa zvakakura maningi.”
41 Jesu wakagara ngo kumbeji ko bhokiso ro kuvigira mare, wotanga kuvona madirire avaiita mare vandhu mu mabhokiso, vakhupuki vazinji vaidira macereni akawanda.
42 Pakagumavo noni yainga murombo. Iyona yakadira zvimangwenjere zviviri zvomutengo* mushoma.
43 Ngo kudaro, wakadanija vajiji vake wovavhunja kuti: “Ndinomuvhunja zvokadi kuti, noni iyi itori murombo, yadira mare yakawanda mu bhokiso ro mare kupinda vandhu vamweni.
44 Ngokuti vese vadira mare yainga yasara kushandiswa pa upfumi hwavo, asi noni iyi yadira zvese zvayainga nazvo, zvese zvayainga nazvo mu upenyu hwayo.”
Masoko o Pasi
^ Iyi indau yo kuvonerera, kuti mbavha no zvinyama zvimweni zvitame kunghwina mu mundemo.
^ Vonanyi Kudurujihwa ko Magama.
^ Dhenariyo ro Cigiriki. Cereni ro sirivha ro Ciroma.
^ Vonanyi Kudurujihwa ko Magama.
^ Vonanyi Kudurujihwa ko Magama.
^ Vonanyi Kudurujihwa ko Magama.
^ Vonanyi Kudurujihwa ko Magama.
^ Kana: “zvakanakisisa.”
^ Gama ngo Gama: “nyumba.”
^ Gama ngo Gama: “mareputoni maviri, anoezana no kwadhrani imwe.”
