Marko 13:1-37
13 Paainga ecibuda mu themberi, umwe wo vajiji vake wakamuvhunja kuti: “Mujijisi, vonanyi kuseja ko mapuwe aya no nyumba iji!”
2 Asi Jesu wakamuvhunja kuti: “Uri kuvona nyumba huru iji? Apana buwe rinozosara panyezuru po rimweni ricizivi kuwiswa.”
3 Paainga akagara pasi, pa Dundhu ro Maorivhe, akasota ku themberi, Pedhru, Jakobo, Johani na Andereya, vakamuvhunjisa vari vega kuti:
4 “Tivhunjenyi, zviro izvi zvinozoitika rini, ngocapi citatijo cokuti zviro zvese izvi zvoda kupera?”
5 Jesu wakatanga kuvavhunja kuti: “Bhasopanyi kuti mutame kucengejwa ngo mundhu ariwese.
6 Vazinji vanozoviya ngo zina rangu veciti: ‘Inini ndini Kristu.’ Ngo kudaro, vanozocengeja vandhu vakawanda.
7 Pamunozozwa ngo zvo hondo no marehwa-rehwa o hondo, mucathya; zviro izvi zvinodikana kuitika, asi, asipi magumo.
8 “Ngokuti majinja no majinja anozomukirana, umambo no umambo hunozomukirana; kunozova no kuzungunyika ko nyika mu ndau jakawanda; kunozovazve no njara. Zvese izvi, kunonga kuri kutanga ko matambujiko basi.
9 “Asi imwimwi, bhasopanyi. Vandhu vanozomuendesa mu mapanje o mundharaundhemo no kumutaka mu masinagoga, munozodihwa pamberi po magovhernadhori no majimambo ngo ndava yangu, kuti muite ucapupu pamberi pavo.
10 Cimwenizve, masoko akanaka anodikana kutanga kucumaehwa ku majinja ese.
11 Pavanozomuendesa ku vatongi, mucadothimwa-thimwa ngo zvamunozoda kuvereketa, asi nanganyi zvamunozovhunjwa pa nguva yondhoyo. Ngokuti andimwipi munozobhuya, asi mujimu mucena ndiwona unozobhuya.
12 Kusiyapo izvo, hama inozouraisa hama yayo, baba vanozouraisa mwana wavo, vana vanozomukira vabari vavo no kuvauraisa.
13 Munozonyenywa ngo vandhu vese ngo ndava yo zina rangu. Asi wiya anocungirira mbhera kumagumo anozoponeswa.
14 “Ngo kudaro, kudari mukavona ciro cinoparaja, cinonyangaja, cakaima pa ndau yacicaidikana kuima (muverengi ngaashandise murangariro wake), vari mu Judheya, ngavatizire ku matundhu.
15 Ari pa denga, aavhiri kuderuka* nee kootora zviri mumba;
16 ari ku maminda aavhiri kuhwirira sure kootora nguvo yake.
17 I nyatwa ku vanakaji vano mimba no vanomwisa mu njiku jondhojo!
18 Endereranyi mberi meciita mukumbiro kuti zvicaitika mu mweji jokutondhora;
19 ngokuti njiku ijo jinozova jo dambujiko ricizivi kumboitika kuvhira pakutanga ko zvisikwa zvakaithwa ndi Mwari mbhera nguva yondhoyo, rikapera, aricazoitikizve.
20 Zvokadi, kudari Jehovha* naakatama kupungura mazuva awo, apana mundhu waizopona. Asi ngo ndava yo vandhu vaakasana, iyena wakapungura mazuva awo.
21 “Kudari ariwese akamuvhunja kuti: ‘Vonanyi! Kristu ari pano,’ kana ‘Vonanyi! ari inoo!’ mucazvitenda.
22 Ngokuti kunozobuda Makristu o kunyepa no vaporofeti vo kunyepa veciita zvitatijo no mushamaiso, kuti vacengeje vandhu vakasanwa ndi Mwari.
23 Waro imwimwi bhasopanyi. Inini ndapera kumuvhunja kare zvese.
24 Mu njiku ijo, sure ko dambujiko iri, zuva rinozoita cidima, mweji auzobwaki,
25 ndhondho jinozombhwera, masimba okumatenga anozozungunyiswa.
26 Ivona vanozovona Mwana wo mundhu eciviya mu makore no simba guru pamwepo no nduma.
27 Anozotuma ngirozi, ijona jinozounganija vakasanwa vake vo mativi marongomuna o nyika, kuvhira ku divi rimwe ro pasi mbhera ku divi rimweni ro kumatenga.
28 “Wari jijanyi ngo muezaniso wo mukuyu: Matavi awo paanovhikitira, omera masakani, munoziva kuti cirimo ciri phedo.
29 Na imwimwivo, mukavona zviro izvi zveciitika, zivanyi kuti iyena waaphedo, waapamusuvo.
30 Zvokadi ndinomuvhunja kuti: Mubarihwana uwu auzoperi zviro zvese izvi zvicito zvaitika.
31 Denga no nyika zvinopera, asi masoko angu aazoperi.
32 “Ngo pamusoro po njiku yondhoyo kana nguva, apana anozviziva, nee ngirozi jo kudenga nee Mwana, asi Baba ndivona vanozviziva.
33 Garanyi makarinda, ngwariranyi, ngo kuti amuizivi nguva yakagajwa.
34 Zvakaezana no mundhu anosiira nyumba varanda vake perapo woita hwendo. Iyena anopekeja umwe nga umwe basa rake, wovhunja mungwariri wo musuvo kuti agare akarinda.
35 Ngo kudaro, garanyi makarinda ngokuti amuzvizivi kuti mune wo nyumba anoviya rini, dangani comasikati kana pakati po usiku kana maamba kueja* kana comangwanani matete,
36 kuti paanozoviya ngo civhumbu, atame kumukhanda makavata.
37 Zvandiri kumuvhunjari, ndiri kuzvivhunja vese kuti: Garanyi makarinda.”
Masoko o Pasi
^ Kana: “kubzuka.”
^ Vonanyi Kudurujihwa ko Magama.
^ Gama ngo Gama: “macongwe ecirira.”
