Marko 14:1-72
-
Vapiri vanoda kuuraya Jesu (1, 2)
-
Jesu anodururihwa mafuta anonuhira (3-9)
-
Judha anotengesa Jesu (10, 11)
-
Phasika yokupejisira (12-21)
-
Ndhungamiriro yo Cirariro ca Mambo (22-26)
-
Jesu anonanga kuti Pedhru anozomuramba (27-31)
-
Jesu anoita mukumbiro mu Getsemani (32-42)
-
Jesu anosungwa (43-52)
-
Kutongwa pamberi po Sinedhriyo (53-65)
-
Pedhru anoramba Jesu (66-72)
14 Painga pasara njiku mbiri kuti Phasika no Mutambo wo Pau Jicina Mbijo utange. Vapiri vakuru no vatari vaipsaka manera o kumubata ndiwona ngo ungwaru* no kumuuraya;
2 ngokuti ivona vainanga kuti: “Atidikani kuzviita pa mutambo; kangaije zvingazobara mapope.”
3 Paainga mu Bhetaniya eciha, pamuzi pa Simoni nyamapere, kwakaguma mwanakaji umweni wainga no botiri* rainga no mafuta anonuhira, o nardho icizivi kuvhengwa, aidhura maningi. Iyena wakarifunungura, wotanga kumadururira mu musoro make.
4 Vamweni pavakazvivona, vakanyangajwa, vovhunjana kuti: “Mafuta aya ari kusvejehwenyi?
5 Ngokuti mafuta aya aizotengeswa ngo mutengo unopindirija mazana matatu* o madhenariyo,* mareyo yopuwa varombo!” Ivona vakanyangajwa maningi ndiyena.
6 Asi Jesu wakati: “Muregerenyi. Muri kuda kumutambujirenyi? Iyena wandiitira zvakanaka maningi.
7 Ngokuti imwimwi muno varombo mukuvo wese, munovaitira zvakanaka pa mukuvo wamunoda, asi amuzovi na inini mukuvo wese.
8 Mwanakaji uwu waita zvaanokwanisa; wadururira mafuta pa muviri pangu, ecinasirira kuvigwa kwangu.
9 Zvokadi ndinomuvhunja kuti, kuri kwese kunocumaihwa masoko akanaka mu nyika yese, zvaitari mwanakaji uwu, zvinozonangwavo kuti aceukijwe.”
10 Judha Iskariyote, umwe wo Gumi na Vaviri wakaenda ku vapiri vakuru kuti avape Jesu.
11 Ivona pavakazvizwa vakadakara maningi, vomugondesa kumupa mare yo sirivha. Ngo kudaro, iyena wakatanga kupsaka mukana wo kumutengesa.
12 Pa njiku yokutanga yo Pau Jicina Mbijo, pavaiita mupiro wo Phasika, vajiji vakamuvhunjisa kuti: “Munoda kuti tinasirire kwapi kuti muhireyo Phasika?”
13 Iyena wakatuma vajiji vake vaviri, wovavhunja kuti: “Endanyi ku dhorobha, munozosongana no mwanarume wakathwara juvi ro kumwa. Muteverenyi,
14 mu nyumba yaanonghwina, vhunjanyi mune wo nyumbeyo kuti: ‘Mujijisi wavhunjisa kuti: “Ngomapi mumba mo varendo mondingahira Phasika no vajiji vangu?”’
15 Iyena anozomutatija berere guru ro padenga, rino zvese zvo kushandisa. Munozotinasiririra mondhomo.”
16 Ngo kudaro, vajiji vakaenda, vonghwina mudhorobha, vokhanda zvese inga zvavakavhunjwa, perapo vakanasirira Phasika.
17 Zuva no ravira, Jesu wakaviya pamwepo no Gumi na Vaviri.
18 Pavainga vakacamira pa meza veciha, Jesu wakati: “Ndinomuvhunja zvokadi kuti, umwe wenyu ari kuha na inini, anozonditengesa.”
19 Ivona vakatanga kunyangajwa, umwe nga umwe ecivhunjisa Jesu kuti: “Angaita inini here?”
20 Iyena wakavavhunja kuti: “Ndi umwe wo Gumi na Vaviri, wiya anoseva na inini mu ndiro yondhoyo.
21 Mwana wo mundhu anopinda inga zvinonanga Matahwa ngo pamusoro pake. Asi, i nyathwa kuna wiya anotengesa Mwana wo mundhu! Zvainga zviri nane kwaari kutama kubahwa.”
22 Pa nguva yo vaiha, iyena wakatora pau, woita mukumbiro, perapo wakaigura-gura wopa vajiji vake, eciti: “Toranyi. Pau iyi inoimirira muviri wangu.”
23 Wakatora kopo woita mukumbiro, wovapa, vese vomwa.
24 Iyena wakavavhunja kuti: “Iyi inoimirira ‘ngazi yangu yo citenderano,’ inozopopomejwa kuti ibesere vazinji.
25 Inini ndinomuvhunja zvokadi kuti: Andicazomwizve vhinyu iyi, mbhera njiku yo ndinozoimwazve nga papsa mu Umambo hwa Mwari.”
26 Pakupejisira, pasure po kuimba ndumbo jo kusimba, vakaenda ku Dundhu ro Maorivhe.
27 Jesu wakavavhunja kuti: “Imwimwi mwese munozokhugunyika, ngokuti zvakatahwa kuti: ‘Ndinozobaya muhavisi; mavhuta anozoparajika.’
28 Asi, ndikamuswa ku vakafa, ndinotungamira kuenda Garireya.”
29 Asi Pedhru wakamuvhunja kuti: “Pikija vese vakakhugunyika, inini andizokhugunyiki.”
30 Pondhopo, Jesu wakamudavira kuti: “Zvokadi ndinokuvhunja kuti, nyamasi, usiku huno kamare, jongwe ricito rarira kaviri, iwewe unozondiramba katatu.”
31 Iyena waivangirira eciti: “Pikija zvikadika kuti ndife na imwimwi, inini andizomurambi.” Vamweni vakatangavo kunanga zvondhozvo.
32 Ngo kudaro, ivona vakaguma pa ndau inodanijwa Getsemani, wovhunja vajiji vake kuti: “Garanyi pano, pandinonga ndeciita mukumbiro.”
33 Wakatora Pedhru, Jakobo na Johani, woamba kusuruvara no kuneseka maningi.
34 Iyena wakavavhunja kuti: “Ndakacamwa maningi, zvokuti ndiri kuda kutofa. Garanyi pano, muenderere mberi mecirinda.”
35 Wakaenda pambeji padoko, wogwadama, wodira huma pasi, wotanga kukumbira kuti kudari zvecikwanisika, nguva iyi ngaifunduruke kwaari.
36 Iyena wakati: “Abha,* Baba, zviro zvese zvinokwanisika kwamuri; fundurusanyi kopo iyi kondiri. Zvicadoitika ngo kuda kwangu, asi ngazviitike ngo kuda kwenyu.”
37 Wakahwirira, wovakhanda vakavata, perapo wovhunja Pedhru kuti: “Simoni uri kuvata? Aukwanisi here kugara wakarinda na inini nee nguva imwe hayo?
38 Garanyi makarinda, meciita mukumbiro mukuvo wese, kuti mutame kuejwa. Ndizvona, mujimu unoda, asi nyama yakaremba.”
39 Wakahwirirazve koita mukumbiro ecinanga magama ondhowo.
40 Naaviyazve, wakavakhanda vakavata, ngokuti majiso avo airema ngo hope. Ngo kudaro, avacaiizviziva zvo kudavira.
41 Iyena wakaviyazve hwocitatu, wovavhunja kuti: “Pa mukuvo wakadari inga uwu, muri kutovata henyu mecizorora! Zvakwana! Nguva yazoguma! Vonanyi! Mwana wo mundhu ari kutengesehwa munyara jo vashaishi.”
42 Mukanyi, ngatende. Vonanyi! Anodaya kunditengesa waaphedo.”
43 Pondhopo kamare, Jesu paainga acavereketa, Judha, umwe wo Gumi na Vaviri, wakaguma no vandhu vazinji vainga no mapanga no muponda. Vandhu ava vakatumwa ngo vapiri vakuru no madhodha.*
44 Wiya waizomutengesa wakazwirana na ivona citatijo cokuti: “Wandinozobhejhari, ndiyena. Musungenyi, mupinde naye makamungwarira.”
45 Iyena wakaguma worungama kuna Jesu, womukhwederera eciti: “Rabhi!” perapo womubhejhari.
46 Ngo kudaro, ivona vakamubata vomusunga.
47 Umwe wo vandhu vainga pondhopo, wakavhomora banga rake wotema muranda wo mupiri mukuru, womuceka njeve yake.
48 Asi Jesu wakati: “Ngenyi maviya kondisunga muno mapanga no muponda inga ndiri mbavha?
49 Njiku jese ndainga na imwimwi ndecijijisa mu themberi, asi imwimwi amuzivi kundisunga. Asi izvi zviri kuitika kuti Matahwa akwanirisike.”
50 Vese vakamusiya votiza.
51 Mujaha umweni wainga akafuka nguvo yakaseja acizivi kusimira, wakatanga kumutevera ngo phedo, ivona vakaeja kumusunga.
52 Asi iyena wakasiya nguvo yake wotiza ari mitu.*
53 Ivona vakaenda na Jesu ku mupiri mukuru, kwainga kwakaungana vatungamiriri vo vapiri vamweni, madhodha no vatari.
54 Asi Pedhru waitevera ngo ndhambo, mbhera pa muzi wo mupiri mukuru. Iyena wakagara pamwepo no varanda ecikota muriro.
55 Vapiri vakuru no Sinedhriyo yese, vaipsaka kuitira Jesu ucapupu hwo kunyepa kuti vamuuraye. Asi apana ucapupu hwovakawana.
56 Vazinji vaimuitira ucapupu hwo kunyepa, asi ucapupu hwavo ahucaizwiranepi.
57 Vandhu vamwenizve vaimuka vecimuitira ucapupu hwo kunyepa, vecinanga kuti:
58 “Itusu takamuzwa ecinanga kuti: ‘Ndinozophwanya themberi iyi yakaithwa ngo nyara jo vandhu, perapo ndinozovaka imweni ngo njiku ndhatu; icikavakwi ngo nyara jo vandhu.’”
59 Asi pikija pa mathangwe aya, ucapupu hwavo ahucaizwiranepi.
60 Ngo kudaro, mupiri mukuru wakamuka pakati pavo, wovhunjisa Jesu eciti: “Audaviri ciro kani? Unoti kudini ngo pamusoro po zvavari kukupumbhari?”
61 Asi iyena wakanyararisa, apana caakadavira. Mupiri mukuru wakamuvhunjisazve eciti: “Ndiwe Kristu Mwana wa Mwari Wakacena?”
62 Jesu wakati: “Ndini! Imwimwi munozovona Mwana wo mundhu akagara pa mukono muho wo simba, eciviya pa makore o kudenga.”
63 Ngo kudaro, mupiri mukuru wakamwesa nguvo yake, eciti: “Ticadirenyizve zvapupu zvimweni?
64 Mapera kumuzwa ecituka Mwari. Munovona kudini?” Vese vakananga kuti anodikana kufa.
65 Vamweni vakatanga kumupfirira mata, vecimufukija kumeso kwake, vamweni vecimutaka soko* vecinanga kuti: “Kudari uri muporofeti, tivhunjei ndiyani wakutaka.” Pasure po kumutaka pama, vangwariri vo banje vakamutora.
66 Pedhru paainga ari paruvanje ngo pasi, wakaguma muranda kaji wo mupiri mukuru.
67 Paakavona Pedhru ecikota muriro, wakamusotesesa, womuvhunja kuti: “Iwewe waingavo na Jesu wo Nazareta.”
68 Asi iyena wakaramba eciti: “Andimuzivi wauri kunangaro, nee andiripi kuzwisisa zvauri kubhuyaro,” perapo wakabuda woenda pa manghwiniro o ruvanje.
69 Muranda kaji wakamuvona wovhunjazve vandhu vainga varipo kuti: “Uwu ndi umwe wavo.”
70 Pedhru wakarambazve. Pasure po mukuvo mushoma, vandhu vainga varipo vakatangazve kuvhunja Pedhru kuti: “Zvokadi iwewe uri umwe wavo, ngokuti iwewe kamare, uri Mugarireya.”
71 Asi iyena wakatanga kutuka no kupika kuti: “Inini andimuzivi mundhu wamuri kunangari!”
72 Pa mukuvo wondhowo, jongwe rakarira kocipiri. Pedhru wakarangarira zvakanangaya Jesu, kuti: “Jongwe ricito rarira kaviri, iwewe unozondiramba katatu.” Iyena wakacamwa maningi wotanga kucema.*
Masoko o Pasi
^ Kana: “o kumusunga ngo mazano.”
^ Gama ngo Gama: “botiri ro arabhasto.” Mujiyo wo botiri rakaitwa ngo buwe rakawanika phedo no Arabhastroni ku Ejipita.
^ 300.
^ Zingwenjere ro Ciroma rairema mutengo wo 3,85g, raidanijwa kuti dhenariyo.
^ Gama ro Ciaramaika rinoreva kuti “nandi Baba!”
^ Kana: “no vakuru.”
^ Kana: “wakasara no nguvo yo mukati basi.”
^ Kana: “zvibhakera.”
^ Kana: “kurira.”
