Marko 15:1-47
15 Kunja no kwaeja, vapiri vakuru, madhodha,* vatari no Sinedhriyo yese vakaungana kuti vavhunjisane zvokuita. Tevere vakasunga Jesu vopinda naye, vomupa Pirato.
2 Pirato wakamuvhunjisa kuti: “Ndiwe Mambo wo Vajudha?” Iyena wakadavira kuti: “Ndimwi muri kutozvinanga.”
3 Asi vapiri vakuru vaimupumbha zviro zvakawanda.
4 Pirato wakatangazve kumuvhunjisa eciti: “Audaviri ciro kani? Izwai zvavari kukupumbhari.”
5 Jesu aazivi kudavira ciri cese, Pirato wakakahamara.
6 Pa mutambo wese wo Phasika, iyena wainga no cirovejeso co kuvasunungurira musungwi umwe wovaikumbira.
7 Pa mukuvo wondhowo, kwainga kuno mwanarume waidanijwa Bharabhasi wainga mukadheya no vapanduki vamweni. Ivona vainga vakauraya vandhu.
8 Ngo kudaro, mbungano yakatanga kukumbira Pirato mukuzwirana no zvaaivaitira.
9 Pirato wakavavhunja kuti: “Munoda kuti ndimubudisire Mambo wo Vajudha?”
10 Ngokuti Pirato waizviziva kuti vapiri vakuru vakamupa ngo cishatihwa.
11 Vapiri vakuru vakavangirija mbungano kuti ibudisihwe Bharabhasi.
12 Pirato wakaphindazve ecivavhunjisa kuti: “Waro ndoitenyi na wiya wamunodanijaya kuti Mambo wo Vajudha?”
13 Vakanangazve kuti: “Ngaaende pa mutanda!”*
14 Pirato wakavavhunjisa kuti: “Ngenyi? Iyena washaishenyi?” Ngo kudaro, ivona vaikhuwa veciti: “Ngaaende pa mutanda!”*
15 Pirato wakabudisa Bharabhasi ngokuda kudakajisa mbungano. Pasure pokuita kuti Jesu atakwe, wakavapa kuti vaende koomukohomera pa mutanda.
16 Masoca akamuendesa ku banje, kumuzi ka govhernadhori, ivona vakadanija cikwata cese co masoca.
17 Vakamusimija nguvo yakapsukirikira, vomudira mu musoro hata yakarukwa ngo muzwa;
18 Vakatanga kumuvhunja kuti: “Zviri kudini, Mambo wo Vajudha!”
19 Ivona vaimutakazve mu musoro ngo njanga no kumupfirira mata. Vakamugwadamira kuti vamureremeje.
20 Pejisire, pasure pokumuseka, vakamuvhura nguvo yokupsukirikira iyana, vomusimija nguvo jake. Ivona vakaenda naye kunja kuti vamukohomere pa mutanda.
21 Mwanarume umweni waipinda ndipona ecivha kunja ko dhorobha, waidanijwa kuti Simoni wo Sirene, baba wa Areshandre na Rufu. Ivona vakamuvangirija kuti athware mutanda wokutambujikira.*
22 Ivona vakaenda naye ku ndau inodanijwa Gorogota, zvinoreva kuti: “Ndau yo Dendhenya.”
23 Vakaeja kumupa vhinyu yakavhenganijwa no mutombo wo miti inovava, asi iyena aazivi kuda kuimwa.
24 Ivona vakamukohomera pa mutanda, vokovanisana nguvo jake, vecipsanga ngo sorti, kuti vazive kuti musoca umwe nga umwe anozowanenyi.
25 Jainga nguva nvumbamwe jo mangwanani,* pavakamukohomera pa mutanda.
26 Panyezuru pake pakatahwa ndava yaaipumbwaro kuti: “Mambo wo Vajudha.”
27 Kunja ka izvi, ivona vakakohomera mbavha mbiri pa mutanda ngo pamutivi pake, imwe ku mukono muho, imweni ku mukono boshwe.
28 *——
29 Vaipinda ndipona, vaimutuka no kujunguja musoro yavo veciti: “Ha! Iwewe waidaya kuphwanya themberi no kuivaka ngo njiku ndhatu,
30 jiponesei ngo kuderuka* pa mutanda wokutambujikira.”*
31 Vapiri vakuru no vatari, vakatangavo kumushora veciti: “Waiponesa vamweni; iyena aakwanisi kujiponesa ega!
32 Kristu Mambo wo Vaiziraeri, ngaaderuke pa mutanda wokutambujikira,* tikazvivona, tinozomutenda.” Pikija vaingaya vakakohomehwa pa mutivi pake vaimutukavo.
33 Pajaikhwedera kuita nguva gumi na mbiri jo masikati,* kwakaita cidima cakafukija pasi pese mbhera pa nguva ndhatu jo madeko.*
34 Pajaikwana kuita nguva ndhatu jo madeko,* Jesu wakadanijira ngo izwi guru eciti: “Eri, Eri, rama sabakitani?” zvikasandujwa, zvinoreva kuti: “Mwari wangu, Mwari wangu, ngenyi wandisiya ndega?”
35 Vamweni vaingepo pavakazvizwa, vakatanga kunanga kuti: “Izwanyi! Iyena ari kudanija Eriya.”
36 Perapo mundhu umweni wakagogoma wobija ciponja mu vhinyu inoshasha, wocibaira pa njanga, perapo womupa kuti aimwe eciti: “Muregerenyi! Ngativone dangani Eriya anoviya kuzomuderusa.”
37 Asi Jesu wakakhuwa ngo izwi guru, perepo wofa.*
38 Jira ro mu ndau yakacenesesa rakamweka ngo pakati, kuvha nyezuru mbhera pasi.
39 Mutungamiriri wo masoca wainga akaima ngo phedo naye, paakavona zviitiko zvese izvi pa rufu hwake, wakananga kuti: “Zvokadi mundhu uwu wainga Mwana wa Mwari.”
40 Paingavo no vanakaji vairingisa ngo ndhambo, pakati pavo, paingavo na Mariya Madharena, Mariya mai wa Jakobo* Josesi na Sarome.
41 Ivona vaiperekeja Jesu no kumushandira paainga ku Garireya, no vanakaji vamweni vazinji vainga vakaviya pamwepo na Jesu mu Jerusarema.
42 Zuva noravira, yainga njiku yo Kunasirira, kana kuti njiku inotangira Sabudu,*
43 kwakaza Josefa wo Arimateya, mundhu waireremejwa maningi mu Banje. Iyena waiimiravo Umambo hwa Mwari. Iyena wakacungisira, woenda pamberi pa Pirato womukumbira muviri wa Jesu.
44 Asi Pirato wakada kuziva kuti Jesu wainga afa, kana kuti wainga acito, ngo kudaro wakadanija mutungamiriri wo masoca womuvhunjisa.
45 Paakaziva kuti wainga afa, Pirato wakapekeja mutembo wa Jesu kuna Josefa.
46 Josefa wakatenga nguvo yo mutengo mukuru woderusa mutembo wa Jesu. Perepo wakaupombera mu nguvo yo mutengo mukuru, womuviga mu guva* rainga rakaciwa pa buwe. Wakamburumbujira buwe pa musuvo wo guvero.
47 Asi Mariya Madharena na Mariya mai va Josesi, vakasara vecisotesesa paainga avigwa.
Masoko o Pasi
^ Kana: “vakuru.”
^ Kana: “ngaakohomehwe pa mutanda.”
^ Kana: “ngaakohomehwe pa mutanda.”
^ Vonanyi Kudurujihwa ko Magama.
^ Gama ngo Gama: “nguva yocitatu.”
^ Vonanyi masoko o pasi ari pana Mateu 17:21.
^ Vonanyi Kudurujihwa ko Magama.
^ Kana: “kubzuka.”
^ Vonanyi Kudurujihwa ko Magama.
^ Gama ngo Gama: “nguva yocitandhatu.”
^ Gama ngo Gama: “nguva yocipfumbamwe.”
^ Gama ngo Gama: “nguva yocipfumbamwe.”
^ Kana: “wakafema ko kupejisira.”
^ Kana: “Jakobo wo Mudoko.” Gama ro kuti “Mudoko,” ringatatija kuti Jakobo uwu aacaingepi dhodha kana aacaireba inga Jakobo, mupostori umweni mwana wa Zebhedhi.
^ Zvinoreva kuti: Mucishanu.
^ Kana: “guva rinoceukijwa.”
