Marko 3:1-35
3 Jesu wakanghwinazve mu sinagoga. Imona mainga muno mundhu waikhokhodara* nyara.
2 Ngo kudaro, vandhu vaimusotesesa kuti vavone dangani waizorapa mundhu wiya ngo Musabudu, kuti vamupumbhe.
3 Iyena wakavhunja mundhu waikhokhodaraya* nyara kuti: “Mukai. Viyai ngo pakati.”
4 Perapo wakavavhunja kuti: “Zvinotendehwa ngo Musabudu kuita zvakanaka no zvakashata kana kuponesa no kuuraya?” Ivona vakagara vakanyarara.
5 Naapera kuringa-ringa ngo kunyangajwa no kucamwa ngo pamusoro po kuoma kwavo mwoyo, Jesu wakavhunja mundhu wiya kuti: “Tambanujai nyara yako.” Iyena wakatambanuja nyara yake, perapo yovanga.
6 Vafarisi vakabudemo voenda kozwirana no vateveri va Herodhi kuti vamuuraye.
7 Asi Jesu wakafunduruka woenda kujombe no vajiji vake, uzinji hwo vandhu vokuvha Garireya no Judheya vaimutevera.
8 Vandhu vazinji vakaenda kwaari pavakazwa ngo pamusoro po zviro zvakawanda zvaaiita, kubatanija vandhu vo Jerusarema, Idhumeya no vanovha mwombera kumweni ko Jordhani, no vanovha mu ndharaundha yo Tiro no Sidhoni.
9 Jesu wakavhunja vajiji vake kuti vamupsangire ngarava yo kupakira kuti mbungano itame kumupsinya.
10 Vese vainga no ndhendha, vakaungana vecimutendeneja kuti vamupsase, ngokuti wairapa vandhu vakawanda.
11 Pikija mujimu yakashata, payaivona Jesu, iyona yaigwadama yecikhuwa kuti: “Imwimwi muri Mwana wa Mwari.”
12 Asi kazinji iyena waiikohomeja kuti itame kumutokotesa.
13 Iyena wakakhwira pa dundhu, wodanija vaakasana. Ivona vakaenda kwaari.
14 Jesu wakaumba cikwata co gumi na vaviri, vaakadanija kuti vapostori, ndivona vaizomuperekeja no vaaizotuma kocumaera.
15 Iyena wakavapazve simba ro kugogomera madhimoni.
16 Pa cikwata co gumi na vaviri caakaumbari, painga na Simoni, waakadura zina rokuti Pedhru,
17 Jakobo mwana wa Zebhedhi na Johani munukuna wa Jakobo (vaakadura zina rokuti Bhowaneji, zina rinoreva kuti “Vana vo Mbheni”),
18 Andereya, Firipi, Bhatoromeu, Mateu, Tomasi, Jakobo mwana wa Arifeu, Tadheu, Simoni Mukhanani*
19 na Judha Iskariyote wakazomutengesaya.
Tevere wakanghwina mumba,
20 vandhu vounganazve. Izvi zvakavaita kuti vatame no nguva yo kuha.
21 Asi ukama hwake pahwakazvizwa, hwakaenda komubata, hwecinanga kuti: “Iyena ari kupenga.”
22 Vatari vakavha Jerusarema vainangavo kuti: “Iyena wakabathwa ndi Bherizebhu,* anogogomera madhimoni ngo zina ro mutongi wo madhimoni.”
23 Ngo kudaro, paakapera kuvadanija, wakabhuya navo ecishandisa muezaniso wokuti: “Sathana angagogomeresa kudini Sathana doni?
24 Kudari umambo hukaparajana ngocahwo, umambo hwondhohwo ahuzoendi mberi;
25 kudari ukama hukaparajana ngocahwo, ukama hwondhohwo ahuzocijikiri.
26 Kudarivo Sathana akajimukira ega no kujiparajanisa, iyena aazoendereri mberi, asi anozopera.
27 Ngo kudaro, apana anonghwina mu nyumba yo mundhu ano simba wokwanisa kuba zviro zvake, acizivi kutanga wabata mune wo nyumba womusunga. Akaita kudaro, anozokwanisa kuba zviro zviri mu nyumba yake.
28 Zvokadi ndinomuvhunja kuti, vana vo vandhu vanozoregerehwa pa zviro zvese, azvinenyi kuti vaita zvishaishi zvakadini, azvinenyi no matukire avaita.
29 Asi wiya anotuka mujimu mucena aazoregerehwi mbhera narini, asi anozova no ndava icikaperi.”
30 Jesu wakananga izvi ngokuti ivona vaiti: “Iyena ano mujimu wakashata.”
31 Mai wake no hama jake vakaviya, voima kunja. Ivona vakatuma mundhu kuti amudanije.
32 Painga no vandhu vaigara pasi vakamutendeneja, ivona vakati kwaari: “Nandi! Mai wenyu no hama jenyu vari kunjeyo, vari kuda kubhuya na imwimwi.”
33 Asi iyena wakavadavira kuti: “Ndiyani mai wangu no hama jangu?”
34 Perapo wakaringisa vaigaraya pasi vakamutendeneja, wonanga kuti: “Nga ava mai wangu no hama jangu!
35 Wiya anoita kuda ka Mwari, ndiyena hama yangu, hambzaji yangu na mai wangu.”
Masoko o Pasi
^ Kana: “waioma.”
^ Kana: “waiomaya.”
^ Kana: “anovangisira.”
^ Zina rimweni ra Sathana.
