Marko 4:1-41
4 Jesu wakatangazve kujijisa mu mbhiripiri mo jombe. Vandhu vakawanda vakaungana phedo naye. Ngo kudaro, iyena wakapakira ngarava, wogara pasi. Vandhu vakasara pa mutundhu, mu mbhiripiri mo jombe.
2 Iyena wakatanga kuvajijisa zviro zvizinji ecishandisa muezaniso. Paaivajijisa wakavavhunja kuti:
3 “Izwanyi. Mukusi wakaenda kookusa.
4 Paainga ecikusa, mbeu jimweni jakawira mu mbhiripiri mo gwanja, shiri jakaviya jopera kuha mbeu jiya.
5 Jimweni jakawira pa ndau ino mapuwe pacina mavhu akawanda. Ijona jakakasika kumera* ngokuti painga pacina mavhu mazinji.
6 Asi zuva porakabuda, mbeu jiya jakapsa jonuvuka* ngokuti jainga jicina muji.
7 Mbeu jimweni jakawira pakati po muzwa, muzwa pojakakura jakavhunga mbeu jiya, ngo kudaro, ajizivi kubara mucero.
8 Asi jimweni jakawira mu mavhu akanaka, jomera perapo jokura. Ijona jakatanga kubara mucero, jakabara kupindirija makumatatu, makumatandhatu no zana.”*
9 Perapo wakaengejera eciti: “Ano njeve jo kuzwa, ngaazwe.”
10 Paakasara ega, Gumi ro vapostori no vapostori vaviri, pomwe no vajiji vamweni vakatanga kumuvhunjisa ngo pamusoro po muezaniso iji.
11 Iyena wakati kwavari: “Ndimwi makapuwa cakafisika ca Mwari co Umambo hwake, asi vandhu vo kunja vanojijiswa zvese ngo muezaniso,
12 kuti ivona vasote asi vatame kuvona, vazwe asi vatame kuzwisisa; nee avazotendeuki kuti varegerehwe.”
13 Iyena wakavavhunjazve kuti: “Imwimwi amuzwisisi muezaniso uwu here? Waro munozozwisisa kudini muezaniso jimweni?
14 “Mukusi anokusa soko ra Mwari.
15 Mbeu iri mu mbhiripiri mo gwanja, makakuswa soko, inoimirira vaya vanozwa soko, perepo Sathana anoviya, wovhisa soko rakakuswa mavari.
16 Ndizvonavo zvondhozvo, mbeu yakakuswa pa ndau ino mapuwe, inoimirira vandhu vanozwa izwi voriashira ngo kukasika, vecidakara.
17 Asi ivona avana muji mu mwoyo mavo, vanombokura padoko njiku nganani; perapo, panondobuda dambujiko kana kuteverehwa ngo pamusoro po soko ra Mwari, vanosiya rutendo.
18 Asi kuno jimweni jakawira pakati po muzwa. Ava ndivona vakazwa soko,
19 asi ngo ndava yo kuthimwa-thimwa ngo upenyu mu nyika ino, kucengeja ko upfumi no kudisisa zviro zvakasiyana-siyana, izvi zvinovhunga no kupsinya soko, rotama kubara mucero.
20 Pakupejisira, mbeu jakawira pa mavhu akanaka, ndi vaya vanozwa soko no kuriashira, vobara mucero jinopindirija makumatatu, makumatandhatu no zana.”*
21 Iyena wakavavhunjazve kuti: “Zvingaita kutora cibani* kakucidumaija ngo citengu kana kucidira pasi po mubhedhu here? Asi cinodihwa pa meza.
22 Ngokuti apana cakafisika cicikazobudi pambhene, apanazve cakavigika cicingazovi pa mbhene.
23 Ano njeve jo kuzwa, ngaazwe.”
24 Wakavavhunjazve kuti: “Nasanyi kupurukira zvamuri kuzwari. Ngo mupimo wo munopima ndiwona munozopimwavo ndiwona no kuengejehwa.
25 Ngo kudaro, ari wese anazvo, anozopuwa zvakawanda, asi wiya acina, anozotorehwa no zvidoko zvaanazvowaro.”
26 Asi wakaenderera mberi eciti: “Umambo hwa Mwari hwakaezana no mundhu anokusa mbeu.
27 Iyena anovata co usiku, womuka co mangwana fumi, asi mbeu inomera perapo yokura, iyena aazvizivi kuti zviri kuitisa kudini.
28 Mavhu ega anobara mucero padoko ngo padoko. Pakutanga panobuda musonjoti, tevere pobuda mucece, pejisire yozoivha mbeuyo.
29 Asi mbeu ikaivha, iyena anoiceka ngo sikeyo, ngokuti inonga yaguma nguva yo kukotora.”*
30 Wakaenderera mberi eciti: “Umambo hwa Mwari tingahuezanisa nenyi, kana tingahudurujira ngo muezaniso wapi?
31 Ihwona hwakaezana no mucece wo* mostardha, unokuswa ciri cimbeu cidoko maningi kupinda mbeu jese jo pasi pano.
32 Asi ukandopera kukuswa, unoreba, wokura kupinda miti yese yo mumunda, wova no matavi makuru, kuti shiri jiwane pokumata mu munvuriri wawo.”
33 Iyena waivavhunja soko ra Mwari ecishandisa muezaniso jakawanda mbhera pavaikwanisa kuzwisisa.
34 Ndizvona kuti apana caaivavhunja acikashandisi muezaniso, asi waidurujira vajiji vake zviro zvese vari vega.
35 Madeko o njiku yondhoyo, Jesu wakavhunja vajiji vake kuti: “Ngatiambuke kuenda mwombera.”
36 Ngo kudaro, pavakapeja kueneka mbungano, vajiji vake vakamutora vopinda na iyena mwombera ari mu ngarava.
37 Pamukuvowo, pakabuda zibepo guru, raibara mavimbi ainghwina mu ngarava, zvokuti ngarava yainga yoda kuzara ngo kumwa.
38 Asi Jesu wainga ari sure ko ngarava, wakavata pa mucago.* Asi ivona vakamumusa veciti: “Mujijisi, amuripi kuvona kuti toda kufa here?”
39 Iyena wakamuka wovereketera ngo hasha mbhepo no kuvhunja jombe kuti: “Shiii! Nyararai!” Mbhepo yakazikama,* koita runyararo hukuru.
40 Iyena wakati kwavari: “Munothya ngenyi? Amuto mava no rutendo huri hwese here?”
41 Asi ivona vakathya maningi, vovhunjana ngocavo kuti: “Ndiyani uwu, anopurukihwari ngo mbhepo no jombe?”
Masoko o Pasi
^ Kana: “kudunga.”
^ Jofota.
^ 100.
^ 100.
^ Cigabhu-gabhu.
^ Kana: “yo kuvhisa mbeu mu maminda.”
^ Kana: “no mbhumbha yo.”
^ Gama ngo Gama: “dhambra.”
^ Yakanyarara.
