Marko 5:1-43
5 Perapo vakaguma mwombera ko jombe ku mutundhu wo Vagerasa.
2 Jesu paakandobuda mu ngarava, wakasongana no mwanarume wainga no mujimu wakashata ecivha ngo mu makuva.*
3 Iyena waigara mu makuva, mbhera pa mukuvo wondhowo, apana waikwanisa kunasa kumusunga, nee ngo magaragajero.
4 Kazinji waisungwa murenje no mukono ngo magaragajero, asi waimadajura. Apana wainga no simba ro kumunyisa.
5 Mukuvo wese, usiku no masikati, iyena waikhuwa mu makuva no mu matundhu, ecijiceka-ceka ngo mapuwe.
6 Paakavona Jesu ngo ndhambo, iyena wakagogoma wogwadama pamberi pake.
7 Wakakhuwa ngo izwi guru eciti: “Ndinenyi inini na iwewe, Jesu Mwana wa Mwari Mukuru-Kuru? Pikai ngo zina ra Mwari kuti auzonditambuji.”
8 Jesu wainga akauvhunja kuti: “Mujimu wakashata, budai pa mundhu uwu.”
9 Asi Jesu wakauvhunjisa kuti: “Zina rako ndiwe ani? Iwona wakadavira kuti: “Zina rangu ndini Cikwata, ngokuti takawanda.”
10 Iwona waindodeketerera Jesu kuti atame kubudisa mujimu jiya mu ndharaundhemo.
11 Kwainga no mushambi wo nghumba jaihava ngo kudundhu.
12 Ngo kudaro, mujimu jiya jakamudeketerera kuti: “Tiendesei ku nghumba, kuti tijifuke.”
13 Iyena wakajitendera. Ngo kudaro, mujimu jakashata jakabuda pa mundhu wiya, jonghwina mu nghumba, mushambi wese wakagogoma kuenda kowira mu jombe ngo mu magomokomo. Mutengo wo nghumba waikhwedera kuita zviuru zviviri.* Jese jakandondomera mu jombe.
14 Asi vahavisi vajo vakatiza, vonghwina mu dhorobha no mu ndharaundha, vonanga zvese zvainga zvaitika. Vandhu vakaenda koozvivona.
15 Vandhu ava, vakaenda kuna Jesu vovona mundhu waingaya no dhimoni raidanijwa kuti Cikwata, akagara, akasimira ushoni, ano hwiru kwaho; ivona vakathya maningi.
16 Vaya vakavona ciitiko ici, vakasumurira vakavhaya ku dhorobha no mundharaundha, zvese zvainga zvakaitikira mundhu wainga no dhimoni no zvakaitikira nghumba.
17 Ngo kudaro, ivona vakatanga kukumbira Jesu kuti abude mu ndharaundha mavo.
18 Jesu paakapakira mu ngarava, mundhu waingaya no dhimoni wakamukumbira kuti aende naye.
19 Jesu aazivi kumutendera, asi wakamuvhunja kuti: “Endai kumuzi ku ukama hwako, wovavhunja zvese zvakuitira Jehovha* no usizi hwaakuitira.”
20 Mwanarume uwu wakapinda, wotanga kuvhunja vandhu vese mu Dhekapori zvaakaitihwa ndi Jesu, vese vaikahamara ndizvona.
21 Jesu naapera kuambuka mwombera ngo ngarava, mbungano yakaungana kwaari. Iyena wainga mumbhiripiri mo jombe.
22 Mutungamiriri wo sinagoga anodanijwa Jairosi, wakaguma, paakamuvona wakagwadama pa soka jake.
23 Iyena wakamudeketerera kazinji eciti: “Mwana wangu wokaji ari kuhwaja maningi.* Ndabata murenje, viyanyi momucanjikira nyara kuti avange, apone.”
24 Ngo kudaro, Jesu wakaenda naye, vandhu vakawanda vaimutevera vecimupsinya.
25 Painga no mwanakaji umweni waibuda ngazi ko gumi ro makore no makore maviri.
26 Wakatambujika maningi mu nyara jo varapi vakawanda, wopeja zvese zvaainga nazvo, asi aazivi kuita nane, izvona zvaindonyanya basi.
27 Paakazwa masoko ngo pamusoro pa Jesu, wakamutevera ngo sure pakati po mbungano, wopsasa nguvo ya Jesu,
28 ngokuti waindonanga kuti: “Ndikandopsasa basi nguvo yake, ndinovanga.”
29 Kubuda ngazi kwiya, kwakapera pondhopo kamare, wojizwa mu muviri mwake kuti wavanga. Ndhendha inothyisa yaaingaya nayo, yakapera.
30 Pondhopo kamare, Jesu wakazwa kuti simba rake rainga rabuda, iyena wakatendeuka pakati po mbungano, wovhunjisa kuti: “Ndiyani wapsasa nguvo yangu?”
31 Asi vajiji vake vakamuvhunja kuti: “Muri kuvona kuti vandhu vari kumupsinya. Mungatovhunjisa kuti ‘ndiyani wandipsasa?’”
32 Asi iyena wairinga-ringa ecipsaka wazviitaro.
33 Mwanakaji wiya eciziva kuti wainga avanga, wakamukhwederera wogwadama pamberi pake, womuvhunja zvese.
34 Jesu wakamuvhunja kuti: “Mwana wangu, rutendo hwako hwakuponesa. Endai, ucathya,* ndhendha yako yapera.”
35 Paainga acavereketa, vandhu vamweni vakavha kanyi ko mutungamiriri wo sinagoga, vakaguma vonanga kuti: “Mwana wenyu watamika! Mucandoneserenyi Mujijisi?”
36 Asi Jesu wakazvizwa ngo ndhambo, perepo wovhunja mutungamiriri wo sinagoga kuti: “Ucathya, tendai basi.”
37 Jesu aazivi kutendera kutevehwa ngo mundhu ari wese, asi wakaenda na Pedhru, Jakobo pomwe na Johani munukuna wa Jakobo.
38 Ngo kudaro, ivona vakaguma pamuzi po mutungamiriri wo sinagoga. Jesu wakavona vandhu vecicema no kukhuwa ngo izwi guru.
39 Naanghwina, wakavavhunja kuti: “Ngenyi muri kucema kudaroko? Mwana uwu aazivi kufa, asi wakavata.”
40 Asi ivona vakatanga kumuseka. Pasure po kuvabudisa vese, Jesu wakatora baba na mai pamwepo na vaya vaakaza navo, voenda kwainga no mwana.
41 Perapo wakabata mukono wo mwana, womuvhunja kuti: “Tarita kumi,” zvikasandujwa zvinoreva kuti: “Cimusikane, ndinokuvhunja kuti, ‘Mukai!’”
42 Musikane wiya wakamuka ngo kukasika, wotanga kufamba. (Iyena wainga no gumi ro makore no makore maviri.) Vaingepo vakadakara maningi ndizvona.
43 Asi Jesu eciphinda no kuphinda, wakavavhunja kuti vatame kuzvisumurira ari wese, wakavakumbirazve kuti vapekeje cokuha musikane wiya.
Masoko o Pasi
^ Kana: “makuva anoceukijwa.”
^ 2.000.
^ Vonanyi Kudurujihwa ko Magama.
^ Kana: “ari kufa.”
^ Gama ngo Gama: “endai mu runyararo.”
