Marko 6:1-56
6 Iyena wakavhepo woenda ku ndharaundha yake. Vajiji vake vakamutevera.
2 Njiku yo Sabudu payakaguma, iyena wakatanga kujijisa mu sinagoga. Vaya vaimuzwa vakakahamara veciti: “Mundhu uwu wakazviwanirepi zviro izvi? Ngenyi iyena wakapuwa ungwaru uhu, no kuita mushamaiso iji ngo nyara jake?
3 Andiyepi muvezi wiya mwana wa Mariya, hama jake asipi Jakobo, Josefa, Judha na Simoni? Hambzaji jake andijopi jatinajowari pano?” Ngo kudaro, ivona vakatanga kumuramba.
4 Asi Jesu wakavavhunja kuti: “Muporofeti aareremejwi mu ndharaundha yake, pakati po ukama hwake no vo pamuzi pake.”
5 Iyena aazivi kuitazve mushamaiso uri wese. Asi caakaita basi, kucanjikira nyara vandhu vanganani vaihwaja wovarapa.
6 Jesu wakakahamara ngo kutama kwavo rutendo. Perepo, wakafamba mu ndharaundha ngo ndharaundha ecijijisa.
7 Iyena wakaunganija vajiji vake gumi na vaviri, wovatuma vari vaviri-vaviri. Wakavapa simba ro kugogomera mujimu yakashata.
8 Wakavavhunjazve kuti vatame kutora ciri cese, cakadari inga pau, cinyede co zvokuha no mare* mu zvikhwama zvavo. Asi vaidikana kutora ndonga basi.
9 Wovavhunja kuti vasimire magwada, vatame kutora nguvo jimweni.*
10 Wakanangazve kuti: “Mukanghwina mu muzi uriwese, garanyimo mbhera ngo kupinda kwenyu.
11 Ku ndau iri yese kwamunotama kuashihwa ushoni kana kutama kupurukihwa ngo mundhu, pamunovha kondhoyo, pumbhujanyi bukuta ro soka jenyu kuti zviite ngwajo kwavari.”
12 Ivona vakaenda vecicumaera kuti vandhu vanodikana kutendeuka.
13 Vakagogomera madhimoni akawanda, vakazoja mafuta vatenda vazinji no kuvarapa.
14 Mambo Herodhi wakazvizwa, ngokuti zina ra Jesu rakatokota maningi. Vandhu vainanga kuti: “Johani Mubhabhatiji wamuswa ko vakafa, ngo ndava yazvo, anokwanisa kuita mushamaiso.”
15 Vamweni vainanga kuti: “Ndi Eriya.” Vamwenizve vainanga kuti: “Muporofeti, inga umwe wo vaporofeti vokare.”
16 Herodhi paakazvizwa, wakati: “Johani wandakaguraya musoro, wamuswa ko vakafa.”
17 Herodhi wainga akacadha na Herodhiya, mukaji wa Firipi munukuna wake Herodhi. Herodhi wainga akatumiradi vandhu kuti vaende koosunga Johani no kumudira mu kadheya ngokuti ndizvona zvaida Herodhiya.
18 Johani waivhunja Herodhi kuti: “Amutendehwi kuva no mukaji wo munukuna wenyu.”
19 Herodhiya wainga no bundu na Johani. Ngo kudaro waida kumuuraya, asi aacaizvikonepi.
20 Herodhi waithya Johani ngokuti Johani wainga mundhu wakarurama. Iyena waingazve munamati wa Mwari, ngo kudaro waimungwarira. Paaimuzwa, waikaya-kaya maningi eciperehwa ngo zano, asi waindodakara ngo kumupurutana.
21 Herodhiya wakazowana mukana pa mabuso o njiku yakabahwa Herodhi. Herodhi wakaita mabuso no vandhu vake vano zvigaro zvakakhwirira, vatungamiriri vo masoca no vatungamiriri vo Garireya.
22 Mwana wokaji wa Herodhiya, wakanghwina wotamba, wodakajisa Herodhi no vandhu vaaiha navo. Mambo wakavhunja musikane kuti: “Ndikumbirei ciricese caunoda, ndinozokupa.”
23 Wakapika kuti: “Zvese zvaunozondikumbira ndinozokupa, pikija bindikati ro umambo hwangu.”
24 Iyena wakabuda, woenda kovhunjisa mai wake kuti: “Ndokumbirenyi?” Ivona vakamudavira kuti: “Musoro wa Johani Mubhabhatiji.”
25 Musikane ngo kukasika wakagogoma kuenda kuna mambo, womukumbira kuti: “Ndipenyi wari musoro wa Johani Mubhabhatiji mu bandejha.”
26 Pikija zvakamunyangajisa maningi, mambo aazivi kumurambira zvaakakumbiraro ngo ndava yo mbhiko jake no vandhu vaaiha navo.
27 Ngo kudaro, mambo wakatuma ngo kukasika mungwariri kuti aviise musoro wa Johani. Iyena wakapinda, wogura musoro wa Johani mukadheya maaingaya.
28 Iyena wakaviisa musoro wa Johani mu bandejha. Mungwariri wakapa musikane wiya, musikane wopavo mai wake.
29 Vajiji va Johani pavakazvizwa, vakaviya kuzotora muviri wake, voenda nawo koouviga mu guva.*
30 Vapostori vakaungana mumbhiripiri ma Jesu, vomuverengera zvese zvovainga vaita no kujijisa.
31 Jesu wakavavhunja kuti: “Vianyi, ngatende ku ndau icina vandhu, muzorore padoko.” Ngokuti painga no vandhu vakawanda vaiguma no vaipinda, avacaiwanepi no mukuvo wo kuha.
32 Ivona vakapakira ngarava vopinda ku ndau icina vandhu kuti vave vari vega.
33 Asi vandhu vakavavona vecipinda, zvozivika ngo vandhu vazinji. Vandhu vo madhorobha ese vakagogoma ngo pasi votanga kuguma ivona vacito.
34 Pavaibzuka mu ngarava, Jesu wakavona vandhu vakawanda wovaitira pena, ngokuti vaiita inga mavhuta acina muhavisi. Iyena wakatanga kuvajijisa zviro zvizinji.
35 Nguva yainga yapera, vajiji vake vakaviya kwaari, vomuvhunja kuti: “Pano pakaita pa bani, nguva yapera.
36 Vapindisenyi, kuti vaende mu ndharaundha jiri phedo no ku madhorobha kootenga zviri zvese kuti vahe.”
37 Jesu wakavadavira kuti: “Imwimwi vapekejenyi zvokuha.” Ivona wakamuvhunjisa kuti: “Tinodikana kuenda kootenga pau jo mazana maviri* o madhenariyo* tojipekeja vandhu kuti vahe?”
38 Iyena wakavavhunjisa kuti: “Muno pau ngana imwimwi? Endanyi moosota!” Pavakapera kusota vakati: “Shanu no hove mbiri basi.”
39 Iyena wakavhunja vandhu kuti vaite zvikwata perapo vagare pasi pa ndhonve.*
40 Ivona vakagara pasi ngo zvikwata zvo zana* no zvo makumashanu o vandhu.
41 Iyena wakatora pau shanu no hove mbiri jiya, wosota kudenga perapo woita mukumbiro. Tevere wakagura-gura pau jiya wopekeja vajiji kuti vaperekerere vandhu, sure kwazvo wakakovanisa hove mbiri ku vese.
42 Vese vakaha voguta,
43 vakaunganija matimbu o pau akasara, vozaja zvitengu gumi na zviviri, kusiyapo matimbu o hove akasaravo.
44 Vakaharo vainga zviuru zvishanu* zvo vanarume.
45 Ngo kukasika, wakavhunja vajiji vake kuti vapakire mu ngarava, ngokuti iyena waida kuti ivona vatungamire kuambuka kuenda mwombera, vaende ku Bhetsaidha paainga ecieneka mbungano.
46 Paakapera kuvaeneka, wakaenda ku dundhu kooita mukumbiro.
47 Zuva noravira, ngarava yainga yaa pakati po jombe, asi iyena wainga ega ku mutundhu.
48 Paakavavona kuti vainesehwa kuvutha, ngokuti vaiyenda kwaivha mbhepo, mu maamba kueja,* Jesu wakaenda kwavari ecifamba ngo panyezuru po kumwa, asi wainga ecida kuvapindirija.
49 Pavakamuvona ecifamba ngo panyezuru po kumwa, vakananga kuti: “Zicinyi iro!” Vecikhuwa.
50 Ngokuti vese vakathya pavakamuvona. Asi iyena ngo kukasika wakavavhunja kuti: “Ndini, mucathya; cunganyi.”
51 Paakapakira mu ngarava mavaingaro, mbhepo yakanyarara. Ivona vakakahamara maningi ngo zvakaitikaro,
52 ngokuti vainga vacizivi kuzwisisa revo yo mushamaiso wo pau, asi mwoyo yavo yaienderera mberi icikazwisisi.
53 Pavakaambuka, vakaguma ku Genezareti vosungira* ngarava kondhoyo.
54 Asi povakandobzuka mu ngarava, vandhu vakamuziva.
55 Ivona vakapeja ndharaundheyo yese, veciviisa vandhu vanohwaja vari pa makha, voenda kwiya kovaizwa kuti Jesu ari kwakati.
56 Pa ndau iri yese yainghwina; mu mutundhu, mu dhorobha kana mu ndharaundha, ivona vaidira vandhu vanohwaja mu mabazari, vecimudeketerera kuti vapsase basi ciuruji co nguvo yake. Vese vaipsasa ciuruji co nguvo yake, vaivanga.
Masoko o Pasi
^ Gama ngo Gama: “utare.”
^ Kana: “kusimira nguvo mbiri.”
^ Kana: “guva rinoceukijwa.”
^ 200.
^ Zingwenjere ro Ciroma rairema mutengo wo 3,85g, raidanijwa kuti dhenariyo.
^ Zvimaushwa zvakamera.
^ 100.
^ 5.000.
^ Kurevera pa nguva jinokhwedera kuita 3:00 mbhera 6:00 jo mangwanani.
^ Kana: “vorikha.”
