Marko 8:1-38
8 Mu njiku jondhojo, kwaingazve no vandhu vakawanda, vainga vacina co kuha. Ngo kudaro, iyena wakadanija vajiji vake wovavhunja kuti:
2 “Ndiri kuzwira pena mbungano iyi, ngokuti joita njiku ndhatu jese vana inini, icizivi kuha ciri cese.
3 Kudari ndikavapindisa kanyi kwavo vacizivi kuha, vangazowa ngo njara mugwanja, vamweni vanovha ndhambo maningi.”
4 Asi vajiji vake vakamudavira kuti: “Mundhu angawanira kwapi pau jinokwana kugutisa vandhu vese ava mu bani muno?”
5 Jesu wakavavhunjisa kuti: “Muno pau ngana imwimwi?” Ivona vakati: “Pau nomwe.”
6 Iyena wakavhunja vandhu kuti vagare pasi. Perapo wakatora pau nomwe, woita mukumbiro. Wakajigura-gura, wopekeja vajiji vake kuti vajiperekere. Ivona vakajiperekerera mbungano.
7 Ivona vaingazve no zvihove zvinganani. Jesu wakaitazve mukumbiro, wovavhunja kuti vaperekerezve.
8 Ngo kudaro, ivona vakaha voguta, vounganija zvitengu zvinomwe zvakakura, zvozara ngo matimbu o zviro zvakasara.
9 Painga no vanarume vaikhwedera kuita zviuru zvirongomuna.* Perapo Jesu wakavaeneka.
10 Iyena wakapakira ngarava ngo kukasika no vajiji vake, woenda ku ndharaundha yo Dharimanuta.
11 Kondhoyo, Vafarisi vakatanga kuphikizana naye, vecimukumbira citatijo cinovha kudenga, kuti vamueje.
12 Ngo kudaro, Jesu wakacamwa* maningi, woti: “Ngenyi mubarihwana uwu unopsaka citatijo? Zvokadi ndinomuvhunja kuti, apana citatijo cinozopuwa mubarihwana uwu.”
13 Naapera kunanga izvi, wakavasiya. Perapo wopakirazve ngarava kuti aambuke mwombera.
14 Asi, vajiji vakakanganwa kutora pau, ivona avazivi kupakija ciro mu ngarava, asi vakatora pau imwe basi.
15 Iyena wakanasa kuvangwaja kuti: “Bhasopanyi mbijo yo Vafarisi no mbijo ya Herodhi.”
16 Ngo kudaro, ivona vakatanga kuvereketesana, ngokuti vainga vacina pau.
17 Jesu paakazviziva, wakavavhunja kuti: “Ngenyi muri kuvereketesana ngokuti amuna pau? Amuto mukazvibata no kuzwisisa? Mwoyo yenyu icakandooma pa kuzwisisa?
18 ‘Pikija muno majiso, asi imwimwi amuvoni; muno njeve asi ngenyi imwimwi amuzwi?’ Imwimwi makanganwa
19 pandakaguraguraya pau shanu kuti zviuru zvishanu* zvo vandhu zvihe? Makazaja zvitengu zvingana zvo matimbu akasara?” Ivona vakamudavira kuti: “Gumi na zviviri.”
20 “Pandakaguraguraya pau nomwe kuti zviuru zvirongomuna* zvo vandhu zvihe, makazaja zvitengu zvingana zvo matimbu akasara? Ivona vakamudavira kuti: “Zvinomwe.”
21 Ngo kudaro, Jesu wakavavhunjazve kuti: “Amuto mandozvizwisisa kani?”
22 Wari ivona vaguma ku Bhetsaidha. Vandhu vakamuviisira mundhu wainga bofu, perapo vodeketerera Jesu kuti amupsase.
23 Jesu wakamubata ngo nyara yake, wobuda naye kunja ko dhorobha. Naapfirira mata mu majiso ake, wakamudira nyara, womuvhunjisa kuti: “Uri kuvona ciri cese?”
24 Mundhu waingaya bofu wakamusa majiso ake, woti: “Ndiri kuvona vandhu, asi vakaita inga mamuti ari kufamba-famba.”
25 Jesu wakabatazve mu majiso o bofu riya, iyena wakanasa kuvona. Iyena wakavanga, wokwanisa kuvona ushoni zviro zvese.
26 Ngo kudaro, Jesu wakamupindisa kanyi, eciti: “Ucanghwina mu dhorobha.”
27 Jesu no vajiji vake vakaenda ku dhorobha ro Sezareya yo Firipi. Pavainga mugwanja, wakavhunjisa vajiji vake kuti: “Vandhu vanonanga kuti ndini ani?”
28 Ivona vakamudavira kuti: “Johani Mubhabhatiji, asi vamweni vanoti ndimwi Eriya, vamwenizve vanoti, muri umwe wo vaporofeti.”
29 Iyena wakavavhunjisa kuti: “Waro imwimwi, munoti ndini ani?” Pedhru wakamudavira kuti: “Imwimwi ndimwi Kristu.”
30 Ngo kudaro, iyena wakavarambisa kuti vatame kuvhunja mundhu ngo pamusoro pake.
31 Wakatangazve kuvajijisa kuti, Mwana wo mundhu anodikana kutambujika maningi* no kunyenywa ngo vakuru, vapiri vakuru no vatari. Iyena anozourawa, wozomuswa pasure po njiku ndhatu.
32 Iyena wakazvinanga pambhene. Asi Pedhru wakaenda naye pa mutivi, wotanga kumuvereketera.
33 Asi iyena wakatendeuka, wosota vajiji vake, wovereketera Pedhru, eciti: “Endai sure kwangu, Sathana! ngokuti auna murangariro wa Mwari, asi uno murangariro wo vandhu.”
34 Iyena wakadanija mbungano no vajiji vake, wovavhunja kuti: “Wiya anoda kunditevera, ngaajirambe athware mutanda wake wokutambujikira,* aenderere mberi ecinditevera.
35 Ngokuti wiya anoda kuponesa upenyu hwake anozohuruza, asi wiya anoruza upenyu hwake ngo ndava yangu no masoko akanaka, anozohuponesa.
36 Zvinobesenyi ku mundhu kuwana zviro zvese zvo nyika, woruza upenyu hwake?
37 Mundhu anozopenyi kuti atenge upenyu hwake?
38 Wiya anopseruka ndini no masoko angu, pakati po mubarihwana uwu wo upombo no unoshaisha, Mwana wo mundhu anozopserukavo ndiyena paanozoviya mu simba ra* Baba wake no ngirozi jake jakasanwa.”
Masoko o Pasi
^ 4.000.
^ Gama ngo Gama: “wakafemeruka.”
^ 5.000.
^ 4.000.
^ Gama ngo Gama: “ngo matambujiko akawanda.”
^ Vonanyi Kudurujihwa ko Magama.
^ Gama ngo Gama: “nduma ya.”
