Marko 9:1-50
9 Jesu wakavavhunjazve kuti: “Ndinomuvhunja zvokadi kuti, vamweni venyu makaimari pano, avazofi vacito vavona Umambo hwa Mwari hwecitonga.”
2 Sure ko njiku ndhandhatu, Jesu wakatora Pedhru, Jakobo na Johani, woenda na ivona vega pa dundhu rakareba. Iyena wakapinduka pambeji pavo;
3 nguvo jake jakamonikira, jocena kupinda nguvo yapajwa ngo mupaji ariwese wo nyika, aacaizokwanisepi kujicenesa kudaro.
4 Cimwenizve, pakavoneka Eriya na Mosi vecibhuya na Jesu.
5 Pedhru wakavhunja Jesu kuti: “Rabhi, zvakanaka kuti itusu tigare pano. Ngo kudaro, ngativake matumba matatu, rimwe renyu, rimwe ra Mosi no ra Eriya.”
6 Aacaizivepi zvokunanga, ngokuti vainga vecithya maningi.
7 Kwakaita gwiti rakavafukija, perapo, izwi rakavha ngo pagwitipo reciti: “Nga uwu Mwana wangu anodiwa. Mupurukirenyi.”
8 Ivona vakaringa-ringa mativi ese, asi avazivizve kuvona ariwese, asi vakavona Jesu basi.
9 Pavainga vecibzuka pa dundhu, Jesu wakavakohomejesa kuti vatame kuvhunja ari wese zviro zvavaingari vavona, mbhera kumuswa ko Mwana wo mundhu ko vakafa.
10 Ivona vakazvidira mu mwoyo,* asi vaibhuisana ngo cavo kuti zvinoda kurevenyi kumuswa ko vakafa.
11 Ivona vakatanga kumuvhunjisa veciti: “Ngenyi vatari vanonanga kuti Eriya anodikana kutanga kuviya?”
12 Iyena wakavavhunja kuti: “Eriya anotangadi kuviya, wonasirira zviro zvese. Waro ngenyi zvakatahwa ngo pamusoro po Mwana wo mundhu kuti anodikana kutambujika maningi* no kunyenywa?
13 Asi inini ndinomuvhunja kuti Eriya wakaviya. Ivona vakamuitira zviro zvavainga vecida, inga zvakatahwa ngo pamusoro pake.”
14 Pavakaguma kuno vajiji vamweni, vakavona mbungano yainga yakavatendeneja. Pondhopo painga pano vatari vaivereketesana na ivona.
15 Asi mbungano payakamuvona, yakakahamara, yogogoma kwenda koomucungamija.
16 Ngo kudaro, Jesu wakavavhunjisa kuti: “Muri kuvereketesana cinyi naivona?”
17 Umwe wavo wakamudavira kuti: “Mujijisi, ndaviya no mwana wangu pano, ngokuti ano mujimu ucikavereketi.
18 Akandobathwa ndiwona, unomuwisa pasi, wobuda mafuro ngo mukanwa, perapo wogeda-geda meno no kupera simba. Ndakakumbira vajiji venyu kuti vaugogomere asi vakaukonehwa.”
19 Jesu wakamudavira kuti: “Imwimwi mubarihwana ucina rutendo, ndinozova na imwimwi mbhera rini? Ndinozocungirira muitiro wenyu mbhera rini? Muviisei kuno.”
20 Ivona vakamuendesa kwaari, asi mujimu pawakandovona Jesu wakamuitisa kuti ajukutike.* Paakapera kuwa pasi, iyena wakasara eciburukuta no kubuda mafuro ngo mukanwa.
21 Jesu wakavhunjisa baba wo mwana wiya kuti: “Zvaanomazuva mangana zvecimuitikira?” Ivona vakadavira kuti: “Kuvhira pa udoko hwake,
22 kazinji unomuwisira pa muriro no mukumwa kuti umuuraye. Asi kudari mecikwanisa kuita ciri cese tiitirenyivo pena. Tibesenyi.”
23 Jesu wakavavhunja kuti: “Ngenyi mananga kuti, ‘kudari mecikwanisa’? Zviro zvese zvinokwanisika kuna wiya ano rutendo.”
24 Pondhopo kamare, baba wo mwana vakakhuwa veciti: “Ndino rutendo! Asi vangisanyi rutendo hwangu!”
25 Jesu paakavona kuti mbungano yaimukhwederera ngo kukasika, wakagogomera mujimu wakashata eciuvhunja kuti: “Iwe mujimu ucikavereketi no ucikazwi, ndinokuvhunja kuti, budai pa mundhu uwu. Audikani kuviyazve!”
26 Pasure po kukhuwa no kuitisa kuti mwana ajukutike,* mujimu wiya wakabuda, perapo mwana wakasara inga wakafa. Vandhu vazinji vainanga kuti: “Iyena wafa!”
27 Jesu wakamubata ngo nyara womumusa, iyena wakaima.
28 Paakanghwina mumba, vajiji vake vakamuvhunjisa pa vari vega kuti: “Ngenyi itusu takonehwa kuugogomera?”
29 Iyena wakavavhunja kuti: “Mushovo wo mujimu uwu, unobuda ngo kuita mukumbiro basi.”
30 Ivona vakavhepo vopinda ngo Garireya, asi iyena aacaidepi kuti mundhu ariwese azvizive.
31 Ngokuti iyena waijijisa vajiji vake no kuvavhunja kuti: “Mwana wo mundhu anozotengeswa mu nyara jo vandhu, ivona vanozomuuraya. Pikija kuti anozourawa, iyena anozomuswa pa njiku yocitatu.”
32 Ivona avazivi kuzwisisa zvaakanangaro, asi vaithya kumuvhunjisa.
33 Ivona vakanghwina mu Kafarnaume. Pavainga mumba, Jesu wakavavhunjisa kuti: “Maivereketesana ngo pamusoro penyi mu gwanja?”
34 Ivona vakanyararisa, ngokuti vaivereketesana mu gwanja ngo pamusoro pokuti mukuru ndiyani.
35 Ngo kudaro, wakagara pasi wodanija Gumi na vaviri, wovavhunja kuti: “Anoda kuva wokutanga ngaave wokupejisira no mushandiri wo vese.”
36 Wakatora mwana womudira pakati pavo, womukumbatira, wovavhunja kuti:
37 “Wiya anoashira mwana mudoko wakadari ngo ndava yo zina rangu, anondiashiravo; wiya anondiashira, aashiri inini basi, asi anoashiravo Wiya wakandituma.”
38 Johani wakamuvhunja kuti: “Mujijisi, takavona mundhu ecigogomera madhimoni ngo zina renyu, asi itusu takaeja kumukamisa, ngokuti aacaititeverepi.”
39 Asi Jesu wakati: “Mucamurambisa ngokuti akuna mundhu anoita mushamaiso ngo zina rangu, anozonanga zvakashata ngo pamusoro pangu.
40 Ngokuti wiya acikahwisani na itusu, ana itusu.
41 Wiya anomupa kopo yo kumwa ngokuti muri vandhu va Kristu, ndinomuvhunja cokwadi kuti aazoruzi mupfupo wake.
42 Asi wiya anokhugunyisa umwe wo vana ava vano rutendo, anodikana kusungihwa gwiyo rinosikiswaya ngo mbongoyo mu musipa mwake, perepo wokhandihwa mu jombe.
43 “Kudari nyara yako yecikukhugunyisa, itemei. Zviri nane kuwana upenyu wakaremara, kuciripi kukhandihwa mu Gehena* no nyara mbiri, muno muriro ucikajimiki.
44 *——
45 Kudari soka yako ikakukhugunyisa, itemei. Zviri nane kuwana upenyu ucithobinya kuciripi kukhandihwa mu Gehena* no soka mbiri.
46 *——
47 Kudari jiso rako rikakuitisa zvakashata, risvejei ndhambo. Ngokuti zviri nane kunghwina mu Umambo hwa Mwari uno jiso rimwe kuciripi kukhandihwa mu Gehena* no majiso maviri.
48 Mondhomo honye ajifi, muriro aujimiki.
49 “Muriro unozotumihwa panyezuru po vandhu vese, inga munyu unorunga zvokuha.
50 Munyu wakanaka. Asi kudari munyu ukatama kuvava,* munoitenyi kuti uvavezve?* Ivanyi no munyu, mugare no runyararo ngocenyu.”
Masoko o Pasi
^ Kana: “ivona avazivi kuzvivhunja ari wese.”
^ Gama ngo Gama: “ngo matambujiko akawanda.”
^ Kana: “apfuje.”
^ Kana: “apfuje.”
^ Vonanyi Kudurujihwa ko Magama.
^ Vonanyi masoko o pasi ari pana Mateu 17:21.
^ Vonanyi Kudurujihwa ko Magama.
^ Vonanyi masoko o pasi ari pana Mateu 17:21.
^ Vonanyi Kudurujihwa ko Magama.
^ Kana: “kujamunya.”
^ Kana: “ujamunyezve.”
