Mateu 11:1-30
11 Jesu paakapera kupa ndhungamiriro vajiji vake gumi na vaviri, iyena wakavhepo woenda kojijisa no kucumaera mu madhorobha avo.
2 Asi Johani paakazwa ngo pamusoro po mabasa a Kristu naari mu kadheya, iyena wakatuma vajiji vake
3 kuti vamuvhunjise kuti: “Ndimwi Wiya Anozoviya, kana kuti tinodikana kuvetera umweni?”
4 Jesu wakavadavira kuti: “Endanyi koovhunja Johani zvamuri kuzwa no kuvona:
5 Mapofu ari kuvona, zvigono zviri kufamba, vano mapere vari kuraphwa, vano mandondo vari kuzwa, vakafa vari kumuswa no varombo vari kuvhunjwa masoko akanaka.
6 Anodakara wiya acikakhugunyiki ngo ndava yangu.”
7 Pavainga vecipinda, Jesu wakatanga kuvhunja mbungano ngo pamusoro pa Johani eciti: “Makaenda koovonenyi mu zvipare? Makaenda koovona njanga iri kuzungunyiswa ngo mbhepo?
8 Waro makaenda koovonenyi? Makaenda koovona mundhu wakasimira nguvo jakaseja? Haiwa! Vanosimira nguvo jakaseja vanogara mu nyumba jo majimambo.
9 Waro makaenderenyi? Koovona muporofeti? Hina, ndinomuvhunja kuti Johani, muporofeti. Asi iyena waisisira maningi kupinda vaporofeti vamweni.
10 Uwu ndiyena waingaya akatahwa ngo zvake kuti: ‘Vonanyi! Ndiri kumutumira ndhumwa inozonasirira gwanja renyu pambeji penyu!’
11 Ndinomuvhunja kuti pakati po vandhu vakabahwa ngo mwanakaji, apazivi kubuda mundhu mukuru anopinda Johani Mubhabhatiji. Asi mundhu mudoko mu Umambo hwo kumatenga, wakakura kupinda iyena.
12 Kuvhira mu njiku ja Johani Mubhabhatiji mbhera wari, Umambo ndihwona huri kupsakwa maningi ngo vandhu, asi vaya vari kuvangisira vanokwanisa kuhuwana.
13 Ngokuti zvaizoitika mbhera kuna Johani zvainga zvakanangwa ngo Vaporofeti no Mutemo;
14 iyena kamare ndi ‘Eriya wiya anozoviya,’ kudari mecida kuzvitenda, zvitendenyi.
15 Ano njeve ngaazwe.
16 “Mubarihwana uwu ndingauezanisa naani? Wakaita inga vana vadoko vakagara pa bazari vecidanijira vadoni vavo,
17 veciti: ‘Takamurijira mutoriro, asi imwimwi amuzivi kutamba; itusu takacumba, asi imwimwi amuzivi kucema.’*
18 Mukufananavo, Johani wakaviya acikahi nee kumwa, asi vandhu vanonanga kuti: ‘Iyena ano dhimoni.’
19 Mwana wo mundhu wakaviya eciha no kumwa, asi vandhu vari kunanga kuti: ‘Vonanyi! Mundhu uwu anohisa, anomwa maningi vhinyu, ano ushamwari no vashabisi pomwe no vashaishi.’ Asi ungwaru hunovoneswa kuti hwakarurama ngo mabasa ahwo.”
20 Perapo wakatanga kushora madhorobha ayani aakaitira mabasa mazinji anoshamaisa, iwona acikakhauyi:
21 “Uno nyathwa iwewe, Korazini! Uno nyathwa iwewe, Bhetsaidha! Ngokuti mabasa anoshamaisa akaitika mauri, naakaitika mu Tiro no Sidhoni, madhorobha aya aizodeno akhauya, osimira saku no kugara pa marota.
22 Asi ndinomuvhunja kuti: Mu Njiku yo Kutongwa, zvinozova zvakareruka maningi ku madhorobha o Tiro no Sidhoni kuti acungirire kupinda imwimwi.
23 Waro iwewe Kafarnaume, unozoenda kumatenga here? Haiwa! Unozoenda mu Guva.* Ngokuti mabasa anoshamaisa akaitwa mauri naakaitihwa mu Sodhoma raizodeno ricizivi kuparajwa mbhera na nyamasi.
24 Asi ndinomuvhunja kuti: Mu Njiku yo Kutongwa, zvinozova zvakareruka maningi ku nyika yo Sodhoma kuti icungirire kupinda iwewe.”
25 Pa mukuvo wondhowo Jesu wakati: “Ndinomusimba imwimwi Baba, Mambo wo kumatenga no pasi, ngokuti zviro izvi amuzivi kuzvitatija vazivi no vakangwara, asi makazvitatija vana vadoko.
26 Ndizvona Baba, ngokuti ndiwona maitiro amunoda.
27 Zviro zvese ndakazvipuwa ndi Baba wangu. Akuna anonasa kuziva Mwana kuciripi Baba. Nee akuna anonasa kuziva Baba kuciripi Mwana. Kudari Mwana acikadi kujijisa ari wese ngo pamusoro pa Babake, apana anganasa kuvaziva kamare.
28 Izanyi kuno imwimwi mwese munoshanda ngo simba no kuremehwa, inini ndinozomuzoroja.
29 Thwaranyi kanga yangu. Jijanyi ndini. Ngokuti inini ndiri mundhu wakapfava no kuthiva mwoyo. Mukadaro, imwimwi munozotondhojwa.
30 Ngokuti kanga yangu ainesi kuthwara, mutoro wangu wakareruka.”
Masoko o Pasi
^ Kana: “amuzivi kujitaka pacifuva ngo kucumba.”
^ Kana: “Haidhesi,” kufa kunoita vandhu vese. Vonanyi Kudurujihwa ko Magama.
