Mateu 13:1-58
-
MUEZANISO JO UMAMBO (1-52)
-
Mukusi (1-9)
-
Ngenyi Jesu waishandisa muezaniso (10-17)
-
Kudurujihwa ko muezaniso wo mukusi (18-23)
-
Tirigu no bungase (24-30)
-
Mucece wo mostardha no mbijo (31-33)
-
Kushandisa muezaniso kunokwanirisa ciporofeti (34, 35)
-
Kudurujihwa ko muezaniso wo tirigu no bungase (36-43)
-
Upfumi hwakavigika no perora ro mutengo mukuru (44-46)
-
Juya (47-50)
-
Upfumi hupsa no hwokare (51, 52)
-
-
Jesu anorambhwa mu ndharaundha yaakabarihwa (53-58)
13 Pa njiku yondhoyo, Jesu wakabuda pamuzi woenda kogara mumbhiripiri mo jombe.
2 Zvecivoneka kuti mbungano yaimutendeneja yainga yakakura, iyena wakapakira ngarava, wogara pasi. Asi mbungano yese yakasara ku mutundhu.
3 Pondhopo, iyena wakavavhunja zvizinji ngo muezaniso, eciti: “Mukusi wakaenda kokusa.
4 Paainga ecikusa, mbeu jimweni jakawira mumbhiripiri mo gwanja, shiri jakaviya jopera kuha mbeu jiya.
5 Jimweni jakawira pa ndau ino mapuwe pacina mavhu akawanda. Ijona jakakasika kumera* ngokuti painga pacina mavhu mazinji.
6 Asi zuva porakabuda, mbeu jiya jakapsa jonuvuka* ngokuti jainga jicina muji.
7 Mbeu jimweni jakawira pakati po muzwa, muzwa pojakakura jakavhunga mbeu jiya.
8 Jimwenizve jakawira mu mavhu akanaka. Jakatanga kubara mucero, iji jobara kupindirija zana,* jimweni kupindirija makumatandhatu, jimwenizve kupindirija makumatatu.
9 Ano njeve ngaazwe.”
10 Ngo kudaro, vajiji vakaviya vomuvhunjisa kuti: “Ngenyi munovereketa mecishandisa muezaniso?”
11 Jesu wakavapingura kuti: “Imwimwi munotendehwa kuzwisisa cakafisika ca Mwari co Umambo hwo kumatenga, asi ivona avatendehwi.
12 Ngo kudaro, ari wese anazvo, anozopuwa zvakawanda, asi wiya acina, anozotorehwa no zvidoko zvaanazvo waro.
13 Ngo zvinondiitisa kuti ndibhuye navo ngo muezaniso; ngokuti vanosota, asi avavoni, vanopurutana, asi avazwi, nee avazwisisi.
14 Ciporofeti ca Isaya ciri kukwanirisika kwavari. Icona cinoti: ‘Imwimwi munozwa asi amuzwisisi, imwimwi munosota asi amuvoni.
15 Ngokuti mwoyo yo vandhu ava yatindivara, vakazwa votama kuita ciri cese, vakafunga meso avo kuti vatame kuvona, vatamezve kuzwa ngo njeve javo no kuzwisisa ngo mwoyo yavo, vatame kutendeuka kuti ndivarape.’
16 “Asi, munodakara ndimwi ngokuti majiso enyu anovona, njeve jenyu jinozwa.
17 Ndinomuvhunja zvokadi kuti: Vaporofeti vazinji no varurami vaida maningi kuvona zvamuri kuvonari, asi avazivi kuzvivona; no kuzwa zvamuri kuzwari asi avazivi kuzvizwa.
18 “Wari purukiranyi muezaniso wo mukusi.
19 Mundhu paanozwa masoko o Umambo wotama kumazwisisa, mushati anoviya wovhisa zvinonga zvasimwa mu mwoyo make; mbeu iyi ngo yakawiraya mu mbhiripiri mo gwanja.
20 Mbeu yakawira pa ndau ino mapuwe, nga wiya anozwa soko perepo woriashira ngo kukasika no mudakaro.
21 Asi iyena aana muji pikija ecicijikira padoko. Kudari pakamuka zvineso no kuteverehwa, ngo pamusoro po soko, iyena anowa ngo kukasika.
22 Mbeu yakawira pakati po muzwa, nga wiya anozwa soko, wotama kubara mucero, ngo ndava yo kuthimwa-thimwa ngo upenyu hwake mu nyika ino no kucengeja ko upfumi. Ngokuti zviro izvi zvinovhunga soko, rotama kubara mucero.
23 Mbeu jakawira pa mavhu akanaka, nga vaya vanozwa soko vorizwisisa. Ivona vanobara mucero, ava vobara kupindirija zana,* vamweni kupindirija makumatandhatu, vamwenizve kupindirija makumatatu.”
24 Iyena wakavaitira muezaniso umweni, eciti: “Umambo hwo kumatenga hungaezaniswa no mundhu wakakusa mbeu yakanaka mu munda make.
25 Vandhu pavainga vakavata, muvengi wake wakaviya kuzokusavo bungase pakati po tirigu, perepo wopinda.
26 Mbeu payakakura yotumbuka yobara mucero, pakabudavo bungase.
27 Vashandi vo mune wo munda vakaviya vomuvhunjisa kuti: ‘Patarau, amuzivi kusima mbeu yakanaka mu munda mwenyu? Waro bungase razovha kwapi?’
28 Iyena wakavadavira kuti: ‘Pano muvengi wakaitari izvi.’ Vashandi vakamuvhunja kuti: ‘Munoda kuti tiende kovhita bungase, tiriunganije?’
29 Iyena wakati: ‘Haiwa, ngokuti pamunonga mecivhita bungase, mungazovhitavo no tirigu.
30 Zviregerenyi zvikure pamwepo mbhera pa kukotora. Pa mukuvo wo kukotora, ndinozovhunja vakotori kuti: Cokutanga, unganijanyi* bungase kuti muripise; perepo mounganija tirigu munyumbu yangu.’”
31 Iyena wakavaitira muezaniso umwenizve, eciti: “Umambo hwo kumatenga hwakaezana no mucece wo* mostardha wakatohwa ngo mundhu umweni wousima mu munda wake.
32 Mbeu yawo idoko maningi pa mushovo wese wo mbeu. Asi painokura, inopinda miti yese yo mumunda, wova zimuti. Shiri jinoviya kuzomata mu matavi awo.”
33 Iyena wakavaitirazve muezaniso umweni, eciti: “Umambo hwo kumatenga hunoezaniswa no mbijo yo mwanakaji yaanotora, woivhenganija mu mbende ndhatu jo upfu, mbhera upfu hwese hwokukumuka.”
34 Jesu wakavhunja mbungano zvese izvi ecishandisa muezaniso. Ndizvona kuti apana caaivavhunja acikashandisi muezaniso,
35 kuti zvikwanirisike zvakanangwa ngo muporofeti kuti: “Ndinozofunungura muromo wangu ngo muezaniso; ndinozotokotesa zviro zvakafisika kuvhira pa kutanga.”*
36 Paakapera kueneka mbungano, iyena wakaenda kanyi. Vajiji vake vakaenda kwaari voti: “Tidurujirenyi muezaniso wo bungase rakamera mumaminda.”
37 Jesu wakadavira kuti: “Mukusi wo mbeu yakanaka ndiyena Mwana wo mundhu;
38 munda i nyika. Ngo pamusoro po mbeu yakanaka, iyi inoimirira vana vo Umambo, asi bungase rinoimirira vana vo mushati.
39 Muvengi wakakusa bungase ndi Dhiyabhu. Kukotora kunoimirira kupera ko nyika,* vakotori i ngirozi.
40 Inga bungase rinouganijwa kuti ripiswe pa muriro, ndizvona zvinozoitikavo mu njiku jokupejisira.
41 Mwana wo mundhu anozotuma ngirozi jake. Ijona jinozounganija zviro zvese zvinokhugunya no vandhu vacikazwiri mutemo vanonga vari pakati po Umambo hwake.
42 Jinozovakhandira mu coto co muriro. Mondhomo vanozocema no kugeda-geda meno.
43 Pa mukuvo wondhowo, varurami vanozomonikira inga zuva mu Umambo hwa Baba wavo. Ano njeve ngaazwe.
44 “Umambo hwo kumatenga hwakaezana no upfumi hwakavigwa mu munda. Mundhu wakahuwana wohufisa. Ngo pamusoro po mudakaro waanawo, iyena anoenda kootengesa zvese zvaainga nazvo, wotenga munda wiya.
45 “Umambo hwo kumatenga hwakaezanazve no mutengesi waifamba ecipsaka maperora* o mutengo mukuru.
46 Paakawana perora* rimwe ro mutengo mukuru, wakaenda kotengesa ngo kukasika zviro zvese zvainga nazvo, wohutenga.
47 “Umambo hwo kumatenga hwakaezana no juya rakakhandihwa mu jombe, robata mushovo wese wo hove.
48 Parakazara, ivona vakarikwevera kunja, vogara pasi, vounganija hove jakanaka mu mujiyo, jakashata vojirasa kunja.
49 Ndizvona zvinozoitika mu njiku jokupejisira. Ngirozi jinozobuda, ijona jinozoparajanisa vakashata no vakarurama
50 jozokhandira vakashata mu coto co muriro. Mondhomo vanozocema no kugeda-geda meno.
51 “Mazwisisa zvazvinoreva zvese izvi?” Ivona vakamudavira kuti: “Hina.”
52 Iyena wakavavhunja kuti: “Zvikadaro, wiya anojijiswa ngo pamusoro po Umambo hwo kumatenga, wakaezana no mune wo nyumba anovhisa mu upfumi hwake zviro zvipsa no zviro zvokare.”
53 Jesu paakapeja kuita muezaniso iji, wakabudepo.
54 Paakaguma kumutundhu wake, iyena wakatanga kuvajijisa mu masinagoga avo, vandhu vokahamara veciti: “Mundhu uwu wakahuwanepi ungwaru uhu no simba ro kuita mushamaiso iji?
55 Andiyepi mwana wo muvezi wiya uwu? Make asipi Mariya, hama jake asipi Jakobo, Josefa, Simoni na Judha?
56 Hambzaji jake, andijopi jatinajo wari? Waro wakazozviwanepi zvese izvi?”
57 Ngo kudaro, ivona vakatanga kumuramba. Asi Jesu wakavavhunja kuti: “Muporofeti aareremejwi mu ndharaundha yake no pamuzi pake.”
58 Iyena aazivi kuitemo mushamaiso muzinji ngo ndava yo kutama kwavo rutendo.
Masoko o Pasi
^ Kana: “kudunga.”
^ Jofota.
^ 100.
^ 100.
^ Kana: “unganijanyi no kusunga.”
^ Kana: “no mbhumbha yo.”
^ Kangaije: “pa kusikwa ko nyika.”
^ Vonanyi Kudurujihwa ko Magama.
^ Mapuwe o mutengo mukuru.
^ Buwe ro mutengo mukuru.
