Mateu 19:1-30
19 Jesu naapera kunanga zviro izvi, wakavha Garireya woenda ku mugano wo Judheya, mwombera ko Jordhani.
2 Vandhu vazinji vakamutevera, iyena wakarapa vaihwaja.
3 Vafarisi vamweni vakaviya kwaari vecida kumueja, vomuvhunjisa kuti: “Zvinotendehwa kuti mwanarume arambe mukaji wake ngo ndava iri yese?”
4 Jesu wakavadavira kuti: “Amuzivi kuverenga kuti wiya wakavasika pakutanga wakaita mwanarume no mwanakaji,
5 wonanga kuti: ‘Ngo ndava yazvo, mwanarume anozosiya baba wake na mai wake wozobatana no mukaji wake, vovaviri vanozoita nyama imwe here?’
6 Ngo kudaro, avaciripizve vandhu vaviri, asi vaanyama imwe. Mundhu acadoparajanisa zvakabatanijwa ndi Mwari.”
7 Vafarisi vakamudavira kuti: “Waro, ngenyi Mosi wakatendera kuti mwanarume atare tsamba yo kurambana, apekeje mwanakaji, perepo womupindisa?”
8 Iyena wakavadavira kuti: “Ngo ndava yo kucunga ko mwoyo jenyu, Mosi wakamutendera kuti murambane no vakaji venyu, asi andizvopi zvo zvainga pakutanga.
9 Inini ndinomuvhunja kuti, ariwese anoramba mukaji wake kuciripi ngo ndava yo uhure,* wocadhazve no umweni, anoita upombo.”
10 Vajiji vakati kwaari: “Kudari ndizvona zvinoitika ku mwanarume no mukaji wake, zviri nane kutama kucadha.”
11 Iyena wakavadavira kuti: “Asipi vese vanokwanisa kuita zvandiri kunangari, asi ngavayani basi vakaashira cipo ici.
12 Ngokuti jiriyo ngomwa jakabahwa jiri ngomwa, jiriyo ngomwa jakaitiswa ngomwa ngo vandhu, jiriyozve ngomwa jakajiitisa ngomwa ngo ndava yo Umambo hwo kumatenga. Wiya anokwanisa kugara acikazivi kucadha, ngaagare akadaroko.”
13 Vandhu vakamuviisira vana vadoko kuti avacanjikire nyara no kuvaitira mukumbiro, asi vajiji vakavakamisa.
14 Asi Jesu wakati: “Regeranyi vana vadoko vaze kondiri, mucavakamisa, ngokuti Umambo hwo kumatenga ngo hwo vandhu vakadari inga ndivona.”
15 Iyena wakavacanjikira nyara, perepo wobuda pa ndaupo.
16 Mundhu umweni wakamukhwederera womuvhunjisa kuti: “Mujijisi, ngo zvapi zvakanaka zvandinodikana kuita kuti ndiwane upenyu hucikaperi?”
17 Jesu wakamudavira kudari: “Ngenyi unondivhunjisa ngo pamusoro po zvakanaka? Wakanaka ndi umwe basi. Wecida kuwana upenyu, endererai mberi wecizwira mutemo.”
18 Iyena wakamuvhunjisa kudari: “Mutemo japi?” Jesu wakati: “Ucauraya, ucaita upombo, ucaba, ucaita ucapupu hwo kunyepa,
19 kujai baba na mai wako, idai mudoni wako inga madire aunojiita.”
20 Mujaha wiya wakati: “Zvese izvi ndiri kuita; ngo capi casara?”
21 Jesu wakamudavira kuti: “Ucida kuva wakakwana, endai wotengesa zvaunazvo, utore mareyo uipe varombo, ukadaro, unozova no upfumi kudenga. Ukapeja, viyai uite muteveri wangu.”
22 Mujaha wiya paakazwa izvi, wakapinda wakacamwa, ngokuti wainga no zviro zvakawanda maningi.
23 Tevere, Jesu wakavhunja vajiji vake kuti: “Ndinomuvhunja zvokadi kuti, zvinozonesa maningi kuti mukhupuki anghwine mu Umambo hwo kumatenga.
24 Ndinomuvhunjazve kuti, zvakareruka kuti kamera inghwine ngo pacibovo co njingano, kuciripi mukhupuki kunghwina mu Umambo hwa Mwari.”
25 Vajiji pavakazwa izvi, vakakahamara maningi voti: “Waro ndiyani angaponeswa?”
26 Jesu wakavasotesesa, woti: “Izvi azvikwanisiki ku vandhu, asi kuna Mwari, zviro zvese zvinokwanisika.”
27 Pedhru wakadavira kuti: “Vonanyi! Itusu takasiya zviro zvese tomutevera; waro ngo zvapi zvatinozowana?”
28 Jesu wakati kwavari: “Ndinomuvhunja zvokadi kuti, zviro zvese pazvinonga zveciitwa zvipsa, Mwana wo mundhu paanozogara pacigaro cake co umambo cino nduma, munozogara pa zvigaro gumi na zviviri zvo umambo, mecitonga mavhumbo gumi na maviri o Vaiziraeri.
29 Wese wakasiya nyumba, hama no hambzaji kana baba na mai, vana kana maminda ngo ndava yo zina rangu, anozoashira zvakapetwa kazinji no kuzogara utaka hwo upenyu hucikaperi.
30 “Vazinji vari pakutanga, vanozoita vokupejisira, vokupejisira vanozoita vokutanga.
Masoko o Pasi
^ Mu Cigiriki, por·nei′a. Vonanyi Kudurujihwa ko Magama.
