Mateu 2:1-23
2 Jesu naabahwa mu Bheterehema ro Judheya mu njiku ja mambo Herodhi,* vazivi vo ndhondho vakavha Kumavhazuva voenda ku Jerusarema,
2 veciti: “Ari kwapi mambo wo Vajudha wakabahwari? Ngokuti takavona ndhondho yake patainga Kumavhazuva, wari itusu taviya kuzomugwadamira.”*
3 Paakazwa izvi, Mambo Herodhi wakanyangajwa maningi, pomwe no vandhu vese vainga mu Jerusarema.
4 Iyena wakaunganija vapiri vakuru vese no vatari, wovavhunjisa kwaizobarihwa Kristu.*
5 Ivona vakamudavira kuti: “Mu Bheterehema ro Judheya, ngokuti ndizvona zvakatahwa ngo muporofeti kuti:
6 ‘Iwewe Bheterehema ro nyika yo Judha, auripi dhorobha doko pakati po magovhernadhori o Judha, ngokuti mukati mako munozobuda mutungamiriri anozohavisa Vaiziraeri, vandhu vangu.’”
7 Perapo Herodhi wakadanija vazivi vo ndhondho ngo cifise-fise, wovavhunjisa nguva yakabuda ndhondho.
8 Paakavatuma kuti vaende ku Bheterehema, wakavavhunja kuti: “Endanyi komupsaka ushoni mwana uwu, mukamuwana viyanyi kuzondivhunja kuti ndiendevo komugwadamira.”
9 Pasure po kuzwa zvakananga mambo, ivona vakapinda. Asi ndhondho yavakavonaya pavainga Kumavhazuva yakaenda kumbeji kwavo, yoenda koima panyezuru po ndau yainga no mwana uwu.
10 Pavakavona ndhondho iyi, ivona vakadakara maningi.
11 Pavakanghwina mumba, vakavona mwana ana mai wake, Mariya, ivona vakagwadama vecimureremeja. Perapo vakafunungura zvinyede zvavo vomupa zvipo zvo goridhi, oribhano* no upfu hunonuhira hunodanijwa kuti mira.
12 Asi, zvecivoneka kuti ivona vakangwajwa ndi Mwari, mu hope kuti vatame kuhwirira ka Herodhi, ivona vakaenda kanyi kwavo ngo gwanja rimweni.
13 Novapinda, ngirozi ya Jehovha* yakagumira Josefa mu hope yeciti: “Mukai, torai mwana na mai wake utizire ku Ejipita, ugareyo mbhera ndikuvhunje kuti uhwirire, ngokuti Herodhi ari kuda kupsaka mwana uwu kuti amuuraye.”
14 Ngo kudaro, Josefa wakamuka co usiku, wotora mwana na mai wake woenda Ejipita.
15 Wakagareyo mbhera pa kufa ka Herodhi. Izvi zvakakwanirisa zvakananga Jehovha* ecishandisa muporofeti wake, eciti: “Ndakadanija mwanangu kuti abude ku Ejipita.”
16 Perapo, Herodhi paakavona kuti wacengejwa ngo vazivi vo ndhondho, wakanyangajwa maningi. Ngo kudaro, iyena wakatuma vandhu kuti vauraye vana vese vorume vo mu Bheterehema no vo mundharaundha jese, kuvhira vana vatete mbhera vana vainga no makore maviri, mukuzwirana no nguva yakanangwa ngo vazivi vo ndhondho.
17 Ngo kudaro, zvakakwanirisika zvakananga muporofeti Jeremiya, kuti:
18 “Zunga rakazika* mu Rama, kucema* no kucumba kukuru. Wainga Rakeri ecicema* vana vake, iyena aacaida kunyarajwa, ngokuti vana vake vainga vapera.”
19 WHerodhi paakafa, ngirozi ya Jehovha* yakagumira Josefa mu hope ku Ejipita
20 yonanga kudari: “Mukai, torai mwana na make uende ku nyika yo Iziraeri, ngokuti vaipsakaya kuuraya mwana uwu vafa.”
21 Ngo kudaro, wakamuka wotora mwana na make, woenda ku nyika yo Iziraeri.
22 Asi paakazwa kuti Arkerau ndiyena waitonga mu Judheya pa cigaro ca babake, Herodhi, Josefa wakathya kwendeyo. Wakaenda ku ndharaundha yo Garireya, ngokuti wainga wangwajwa ndi Mwari mu hope.
23 Iyena wakaenda kogara mu dhorobha ro Nazareta, kuti zvikwanirisike zvakanangwa ngo vaporofeti kuti: “Iyena anozodanijwa kuti Munazareta.”
Masoko o Pasi
^ Vonanyi Kudurujihwa ko Magama.
^ Kana: “kuzomureremeja.”
^ Kana: “Mesiya; Wokuzojwa.”
^ Kana: “zviro zvakacena zvinonuhira.”
^ Vonanyi Kudurujihwa ko Magama.
^ Vonanyi Kudurujihwa ko Magama.
^ Kana: “mbhere yakazika.”
^ Kana: “kurira.”
^ Kana: “ecirira.”
^ Vonanyi Kudurujihwa ko Magama.
