Mateu 21:1-46
21 Pavaikhwedera ku Jerusarema, voguma Bhetifajhe pa Dundhu ro Maorivhe, Jesu wakatuma vajiji vaviri,
2 wovavhunja kuti: “Endanyi mu mutundhu wamuri kuvonaro, munozowaneyo mbongoyo yakasungihwa no cimwana cayo. Jisujunurenyi, mujiviise kuno.
3 Kudari ariwese akamuvhunja ciri cese, muvhunjenyi kuti: ‘Mambo ari kujida.’ Iyena anozomuregera.”
4 Izvi zvakaitika kuti zvikwanirise zvakanangwa ngo muporofeti kuti:
5 “Vhunjai mwana wokaji wo Ziyoni kuti: ‘Vonai! Mambo wako ari kuviya kouri, wakapfava, wakapakira pa mbongoyo, hina, pa cimbongoyo, mwana wo cinyama cinothwara mujiyo.’”
6 Vajiji vakaenda voita zvavakavhunjwa ndi Jesu.
7 Ivona vakaviisa mbongoyo no cimwana cayo, vodira nguvo javo pa nyezuru po mbongoyojo, Jesu wogarira pa nguvo jiya.
8 Vandhu vazinji vaiyaja nguvo javo mugwanja, kuveni vamweni vaigura matavi vacimandhandhanisa mugwanja.
9 Kusiyapo izvo, mbungano yaienda kumbeji, vamweni vaitevera ngo sure, vecimima kudari: “Mwari, tinodeketera kwamuri, ponesanyi Mwana wa Dhavhidhi! Komboreranyi wiya anoviya ngo zina ra Jehovha!* Muponesenyi, tinomukumbira, imwimwi muri kumusoro-soro!”
10 Paakanghwina mu Jerusarema, vandhu vese vakakahamara, veciti: “Ndiyani uwo?”
11 Mbungano yaidavira kuti: “Uwu ndi Jesu, muporofeti wo Nazareta yo Garireya!”
12 Jesu naanghwina mu themberi, wakagogomera vese vaitengesa no kutenga mu themberi, wovinduja meza jo vacinjanisi vo mare no kadera jo vaitengesa njiva.
13 Wovavhunja kuti: “Zvakatahwa kuti: ‘Nyumba yangu inozodanijwa kuti nyumba yo mukumbiro,’ asi imwimwi muri kuiita nyumba yo mbavha.”
14 Mapofu no vanothobinya vakamukhwederera mu themberi, iyena wakavarapa.
15 Vapiri vakuru no vatari pavakavona zviro zvinoshamaisa zvaaita, vovonazve vana vorume vaimima veciti: “Mwari, tinodeketera kwamuri, ponesanyi Mwana wa Dhavhidhi!” ivona vakanyangajwa,
16 vomuvhunja kuti: “Uri kuzwa zvavari kunangaro?” Jesu wakavadavira kuti: “Ndiri kuzvizwa. Amuzivi kuverenga kuti: ‘Pa muromo po vana no vana vatete, makapaita kuti pabude rukujo’?”
17 Paakavasiya, wakaenda ku dhorobha ro Bhetaniya, wovata kondhoyo.
18 Paaihwirira ku dhorobha co mangwanani matete, Jesu wakazwa njara.
19 Iyena wakavona mukuyu mu mbhiripiri mo gwanja, woenda kwauri, asi apana caakawana kuciripi masakani basi. Ngo kudaro, wakauvhunja kuti: “Aucazobarizve mucero.” Pa mukuvo wondhowo, mukuyu wiya wakavoma.
20 Vajiji pavakazvivona, vakakahamara voti: “Mukuyu uwu wavomesa kudini ngo kukasika?”
21 Jesu wakavadavira kuti: “Ndinomuvhunja zvokadi kuti, mukava no rutendo motama kukana-kana, amuzoiti zvandaitari ku mukuyu basi, asi munozotovhunja dundhu iri kuti: ‘Ivhai pano, ujikhandire mujombe,’ zvinozoitika.
22 Zviro zvese zvamunoitira mukumbiro muno rutendo, munozozviashira.”
23 Naanghwina mu themberi, vapiri vakuru no madhodha o* vandhu vakamukhwederera paaijijisa, vomuvhunjisa kuti: “Simba raunoitaro ndirona zviro izvi rakavha kwapi? Wakaripuwa ndiyani?”
24 Jesu wakapingura kuti: “Ndiri kudavo kumuvhunjisa ciro cimwe. Mukandidavira, ndinozomuvhunjavo kuti simba randinoitaro ndirona zviro izvi rakavha kwapi:
25 Rubhabhatijo hwa Johani hwakavha kwapi? Ngo hwo kudenga kana hwo vandhu?” Asi vakatanga kurangarira ngocavo veciti: “Kudari tikananga kuti: ‘Hwakavha kudenga,’ iyena anozotivhunjisa kuti: ‘Waro, ngenyi amuzivi kumutenda?’
26 Asi kudari tikananga kuti: ‘Hwakavha ku vandhu,’ tinothya mbungano ngokuti inovona Johani inga muporofeti.”
27 Ngo kudaro, vakadavira Jesu kuti: “Atizvizivi.” Jesu wakavapingura kudari: “Andimuvhunjivo kwakavha simba randinoita ndirona zviro izvi.
28 “Munorangarirenyi? Mwanarume umweni wainga ano vana vaviri. Wakavhunja mwana wokutanga kuti: ‘Mwana, nyamasi endai koshanda ku munda wo muuvha.’
29 Iyena wakadavira kuti: ‘Andidi.’ Asi pasure pazvo, wakajidemba* woenda.
30 Wakaenda ku mwana wocipiri, womuvhunjazve zvondhozvo. Wocipiriwo wakadavira kuti: ‘Ndinoenda, baba.’ Asi aazivi kwenda.
31 Pa vaviri ava, ngowapi wakaita kuda ka babake?” Ivona vakadavira kuti: “Wokutanga.” Jesu wakavavhunja kuti: “Ndinomuvhunja zvokadi kuti, vashabisi no hure vanomutangira kunghwina mu Umambo hwa Mwari.
32 Ngokuti Johani wakaviya komuri ngo gwanja ro ururami, asi imwimwi amuzivi kumutenda. Asi vashabisi no hure vakamutenda. Imwimwi makazvivona, asi amuzivi kuzvidemba* kuti mumutende.
33 “Izwanyi muezaniso umweni: Mwanarume umweni, wainga mune wo munda wo muuvha. Wakasima muuvha jake wojitendeneja ngo fenzi, woca pokusvinira uvha mu mundemo, wovaka nyumba yakareba;* tevere wakausiira varimi woita hwendo.
34 Nowaguma mukuvo wo kuivha ko mucero, mune wo munda wakatuma varanda vake kuti vaende ku varimi koashira mucero jake.
35 Asi, varimi vakavabata, umwe votaka, umweni vomuuraya, umweni vomufura ngo mapuwe.
36 Wakatumazve varanda vamweni vakawanda kupinda vokutanga, asi varimi vakaitazve zvondhozvo naivona.
37 Pejisire, wakatumira mwana wake, eciti: ‘Vanozoreremeja mwana wangu.’
38 Pavakamuvona mwana wiya, varimi vakavhunjana ngocavo kuti: ‘Nga uwu anozogara utaka. Viyanyi, ngatimuuraye, titore utaka hwake!’
39 Vakamubata, vomukhandira kunja ko munda wo muuvha, vomuuraya.
40 Waro paanozoviya mune wo munda wo muuvha, anozoitenyi ku varimi ava?”
41 Ivona vakamudavira kuti: “Zvecivoneka kuti ivona vakashata, anozovauraya wosiira varimi vamweni munda wo muuvha, vaya vanozomupa mucero ikaguma nguva yo kukotora.”
42 Jesu wakavavhunja kudari: “Matahwa anoti: ‘Buwe rakarambwa ngo vavaki, rakazova buwe guru ro pacikina. Buwe iri rinovha kuna Jehovha,* irona rinoshamaisa.’ Amuzivi kumboverenga matahwa aya here?
43 Ngo iyo ndava, ndinomuvhunja kuti: Umambo hwa Mwari hunozovhiswa pakati penyu hwozopuwa jinja rimweni rinobara mucero jinodiwa.
44 Cimwenizve, mundhu anowira pa buwe iri, anozokhuvazika maningi. Wiya anowihwavo ndirona, anozocangajika.”
45 Vapiri vakuru no Vafarisi pavakazwa muezaniso uwu, vakazviziva kuti iyena wainga ecinangira ivona.
46 Pikija vaida kumusunga, ivona vaithya mbungano ngokuti yaimuvona inga muporofeti.
Masoko o Pasi
^ Vonanyi Kudurujihwa ko Magama.
^ Kana: “no vakuru vo.”
^ Kana: “wakazvivaza.”
^ Kana: “kuzvivaza.”
^ Iyi indau yo kuvonerera, kuti mbavha no zvinyama zvimweni zvitame kunghwina mu mundemo.
^ Vonanyi Kudurujihwa ko Magama.
