Mateu 22:1-46
22 Jesu wakabhuyazve navo ecishandisa muezaniso, eciti:
2 “Umambo hwo kumatenga hungaezaniswa na mambo wakaitira mwana wake mabuso o mucadho.
3 Iyena wakatuma varanda vake kuti vaende kodanija vakakokwa kuti vaviye pa mabuso o mucadho, asi ivona avacaida kuviya.
4 Iyena wakatumazve varanda vamweni eciti: ‘Vhunjanyi vakakokwaya kuti: “Vonanyi! Ndapeja kunasirira zvokuha, ndauraya n’gombe jangu no zvinyama zvakanuna. Zviro zvese zvapera kunasirihwa. Viyanyi ku mabuso o mucadho.”’
5 Asi vakokwi vakaramba, umwe wakaenda ku munda wake, umweni woenda ku nyagoso yake;
6 asi vamweni vakabata varanda vaya, vovataka no kuvauraya.
7 “Mambo wakanyangajwa maningi, wotumira cikwata cake co masoca, couraya vaurayi vese no kupisa dhorobha ravo.
8 Perapo wakavhunja varanda vake kudari: ‘Mabuso o mucadho apera kunasirihwa, asi vakokwaya avafaneri.
9 Ngo kudaro, endanyi mu zvitaka zvinovha mu dhorobha, mukoke ariwese wamunowana kuti aviye ku mabuso o mucadho.’
10 Varanda vakaenda muzvitaka, vounganija vese vovakawana, vakanaka no vakashata; nyumba yo mabuso o mucadho yakazara ngo vakokwi.
11 “Mambo paakanghwina kosotesesa vakokwi, wakawana mwanarume umweni wainga acina nguvo yo mucadho.
12 Womuvhunja kuti: ‘Shamwari, wanghwinisa kudini muno ucina nguvo yo mucadho?’ Iyena wakatama zvokudavira.
13 Perapo mambo wakavhunja vashandi vake kudari: ‘Musungenyi murenje no mukono, mu mukhandire kunja kuno cidima. Kondhoyo anozocema no kugeda-geda meno.’
14 “Ngokuti kuno vakawanda vakakokwa, asi vashoma vakasanwa.”
15 Perapo Vafarisi vakaenda kovhunjana kuti vamubate ngo magama ake.
16 Vakamutumira vajiji vavo no vateveri va Herodhi, veciti: “Mujijisi, tinoziva kuti makazara ngo cokwadi, munojijisa cokwadi ngo pamusoro pa Mwari, amupsaki kudakajisa mundhu, ngokuti amusoti mavonekero okunja o vandhu.
17 Waro tivhunjenyi. Mavonero enyu ngo api? Zvinotendehwa kushabira Sezari kana kuti azvitendehwi?”
18 Jesu eciziva kushata kwavo, wakati: “Vacengejeri, ngenyi munoda kundieja?
19 Ndikhombijenyi cereni ro kushaba ndirona.” Vakamuviisira dhenariyo* rimwe.
20 Iyena wakavavhunja kudari: “Pikica iyi no zvakatahwari ngo zvani?”
21 Ivona vakati: “Ngo zva Sezari.” Iyena wakavavhunja kuti: “Ipanyi Sezari zviro zva Sezari, ipanyivo Mwari, zviro zva Mwari.”
22 Povakazwa izvo, vakashamaisika, vomusiya, vopinda.
23 Pa njiku yondhoyo, Vasadhusi vanonangaya kuti akuna kumuka ko vakafa, vakaviya vomuvhunjisa kudari:
24 “Mujijisi, Mosi wakati: ‘Kudari mwanarume akafa acina vana, hama yake inodikana kugara utaka, yomusijira mubarihwana wa nyakufa.’
25 Pakati pedu painga no hama nomwe. Nevanji wavo vakarovora, vofa vacizivi kubara mwana, vosiira utaka munukuna.
26 Zvondhozvo ngo zvakaitikavo no hama yocipiri no yocitatu, mbhera kufa ko vanomwe vese.
27 Pakupejisira, mwanakaji wiya wakafavo.
28 Pakumuswa ko vanomwe vese, mwanakaji uwu anozova mukaji wani? Ngokuti vese vakava majimwamuna ake.”
29 Jesu wakavadavira kuti: “Imwimwi makarasika, ngokuti amuzivi Matahwa no simba ra Mwari;
30 ngokuti pa kumuswa ko vakafa vanarume avazorovori, vanakaji avazorovohwi, asi vanozoezana no ngirozi jo kudenga.
31 Amuzivi kuverenga zvamakavhunjwa ndi Mwari ngo pamusoro po kumuswa ko vakafa, kuti:
32 ‘Inini ndiri Mwari wa Abhirahama, Mwari wa Izaki na Mwari wa Jakobe’? Iyena asipi Mwari wo vakafa, asi ndi Mwari wo vanopona.”
33 Mbungano payakazwa izvi, yakakahamara ngo majijisiro ake.
34 Vafarisi novazwa kuti Vasadhusi vakakonehwa kudavira Jesu, vakaungana voita cikwata cimwe.
35 Umwe wavo waiziva maningi Mutemo, wakamueja ngo kumuvhunjisa kuti:
36 “Mujijisi, ngo wapi mupango mukuru mu Mutemo?”
37 Jesu wakamudavira kuti: “Idai Jehovha* Mwari wako ngo mwoyo wako wese, upenyu hwako hwese no murangariro wako wese.’
38 Uwu ndiwona mupango mukuru no wokutanga.
39 Wocipiri wakaezana no wondhowo, nga uwu: ‘Idai mudoni wako inga zvaunojiita.’
40 Pa mupango muviri iji, ndipona panovha Mutemo wese no Vaporofeti.”
41 Vafarisi pavainga vakaungana Jesu wakavavhunjisa kuti:
42 “Munovona kudini ngo pamusoro pa Kristu? Iyena, mwana wani?” Ivona vakamudavira kuti: “Wa Dhavhidhi.”
43 Jesu wakavavhunjisa kuti: “Waro zvingaitisa kudini kuti Dhavhidhi ngo kufemehwa amudanije kuti Mambo, paakati:
44 ‘Jehovha* wakavhunja Mambo wangu kuti: “Garai pa mukono muho wangu mbhera ndidire vavengi vako pasi po soka jako”?
45 Kudari Dhavhidhi wakamudanija Mambo, zvingaitisa kudini kuti aite mwana wake?”
46 Akuna wakakwanisa kumudavira no gama rimwe haro. Kuvhira pa njiku yondhoyo, na umwe hake wakazocunga kumuitirazve muvhunjo.
Masoko o Pasi
^ Zingwenjere ro Ciroma rairema mutengo wo 3,85g.
^ Vonanyi Kudurujihwa ko Magama.
^ Vonanyi Kudurujihwa ko Magama.
