Mateu 23:1-39
23 Jesu wakavhunja mbungano no vajiji vake, kuti:
2 “Vatari no Vafarisi vakagara pa cigaro ca Mosi.
3 Ngo kudaro, itanyi no kuzwira zvese zvavanonanga, asi mucadoita zvavanoita, ngokuti zvavanonanga andizvopi zvavanoita.
4 Ivona vanosunga mutoro unorema voudira pa mapfuji o vamweni, asi ivona avadi kutoupsasa ngo cikunwe cavo.
5 Mabasa ese avanoita, vanomaitira kuti vavoneke ngo vandhu. Ivona vanoengejera zvimabhokiso zvo kudira matahwa zvavanosimira inga ndhimu kuti zvivajivirire ku zvakashata, no kurebesa zviuruji zvo nguvo javo.
6 Ivona vanoda ndau jino nduma mu mabuso no zvigaro zvo kumbeji* mu masinagoga.
7 Vanodazve kucungamijwa mu mabazari no kudanijwa Rabhi.*
8 Asi imwimwi, mucadanijwa Rabhi, ngokuti Mujijisi wenyu ndi umwe basi. Imwimwi mwese muri hama no hama.
9 Mucadana ariwese pasi pano kuti baba, ngokuti Baba wenyu ndi umwe ega: Vokumatenga.
10 Nee amudikani kudanijwa mutungamiriri, ngo kuti Mutungamiriri wenyu ndi umwe basi, Kristu.
11 Asi mukuru pakati penyu anodikana kuva mushandiri wenyu.
12 Mundhu wese anojikuja anozododokeswa, wiya anojidodokesa anozokujwa.
13 “Munonyathwa imwimwi vatari no Vafarisi, vacengejeri! Ngokuti munofungira vandhu Umambo hwo kumatenga. Imwimwi amuzonghwinimo, nee amutenderi kuti vamweni vanoda kunghwinemo, vanghwine.
14 *——
15 “Munonyathwa imwimwi vatari no Vafarisi, vacengejeri! Ngokuti munofamba mujombe no kumutundhu mecida kutendeuja mundhu kuti ave Mujudha, paanova Mujudha, munomuita kuti afanere kuenda mu Gehena,* wozova no ndava yakakura kupinda yenyu.
16 “Munonyathwa imwimwi, vatungamiriri vacikavoni, munonanga kuti: ‘Kudari mundhu akapika ngo zina ro themberi, azvina basa; asi kudari mundhu akapika ngo zina ro goridhi ro muthemberi, iyena anovangirijwa kuti akwanirise mbhiko yake.’
17 Imwi marethe no mapofu! Ngocapi cinosisira maningi, igoridhi kana kuti ithemberi inocenesa goridhi?
18 Munonangazve kuti: ‘Kudari mundhu akapika ngo zina ro artari, azvina basa; asi kudari mundhu akapika ngo zina ro cipo ciri panyezuru po artari, iyena anovangirijwa kuti akwanirise mbhiko yake.’
19 Imwi mapofu! Ngocapi cinosisira maningi, icipo kana kuti iartari inocenesa cipoco?
20 Ngo kudaro, wiya anopika ngo zina ro artari, ari kupika ndiyona no zviro zvese zviri panyezuru payo;
21 wiya anopika ngo themberi anopika ndiyona na Wiya anogaremo;
22 wiya anopika ngo kudenga, anopika ngo cigaro co umambo ca Mwari na Wiya anogarepo.
23 “Munonyathwa imwimwi vatari no Vafarisi, vacengejeri! Ngokuti munopa cogumi co masakani o minti, masakani o dhiri no mbeu yo kumini,* asi mecisiya zviro zvinosisira maningi zvo Mutemo, kunangira ururami, usizi no kugondeka. Izvi ndizvona zvamaidikana kuita, asi mucikaposi zvimweni.
24 Vatungamiriri vacikavoni, munovhisa mutunga wawira mu kopo asi munomija kamera!
25 “Munonyathwa imwimwi vatari no Vafarisi, vacengejeri! Ngokuti munosuka kunja ko kopo no paratu, asi mukati mo mwoyo jenyu makazara ngo svina no kuda kujidakajisa.
26 Imwi vafarisi vacikavoni, tanganyi kusuka mukati mo kopo no paratu, kuti kunja kwayo kucenevo.
27 “Munonyathwa imwimwi vatari no Vafarisi, vacengejeri! Ngokuti makaezana no makuva akapendwa ngo cinambo,* oita inga akaseja ngo kunja. Asi mukati mawo makazara ngo maphondo o vakafa no mushovo wese wo zviro zvicizivi kucena.
28 Ndizvona zvamakaitavo imwimwi, munoita inga vandhu vakarurama ngo kunja asi mukati makazara ngo kucengejera no kutama kuzwira mutemo.
29 “Munonyathwa imwimwi vatari no Vafarisi, vacengejeri! Munovaka makuva o vaporofeti, no kusejesa makuva* o vandhu vakarurama,
30 meciti: ‘Notakapona mukuvo wo majicekuru edu, aticaizova no ndava yo kuuraya vaporofeti.’
31 Ngo kudaro, imwimwi muri kujipupurira mwega kuti muri vana vo vandhu vakaurayaya vaporofeti.
32 Waro pejisanyi mabasa akatangwa ngo majicekuru enyu.
33 “Imwimwi muri nyoka, vana vo vhumbi. Mungatizisa kudini rutongeso hwo Gehena?*
34 Ngo ndava yazvo, ndiri kumutumira vaporofeti, vazivi no vajijisi. Munozouraya vamweni vavo. Vamweni munozovauraya perepo movakohomera pa mutanda. Vamwenizve munozovasvaputa mu masinagoga no kuvateverera mu dhorobha ngo dhorobha.
35 Ngo kuita kudaro, ngazi jo vandhu vakarurama vamakauraya, kuvhira ngazi yo mundhu wakarurama Abheri, mbhera ku ngazi ya Zakariya mwana wa Bharakiya wamakauraya pakati no pakati po ndau yakacena no artari, inozowira kwamuri.
36 Zvokadi ndinomuvhunja kuti: Zviro zvese izvi zvinozoviira mubarihwana uwu.
37 Jerusarema, Jerusarema, unouraya vaporofeti, no kufura ngo mapuwe vaunotumihwa. Kangana ndecieja kuunganija vana vako pamwepo, inga zvinoitaya huku painohwamira zvitiyo zvayo? Asi wakaramba.
38 Vonanyi! Nyumba yenyu yaramwijwa.*
39 Ndinomuvhunja kuti: Kuvhira wari, amucazondivonizve mbhera munange kuti, ‘Komboreranyi wiya anoviya ngo zina ra Jehovha!’”*
Masoko o Pasi
^ Kana: “zvakanakisisa.”
^ Kana: “mujijisi.”
^ Vonanyi masoko o pasi ari pana Mateu 17:21.
^ Vonanyi Kudurujihwa ko Magama.
^ Minti, dhiri no kumini, i mushovo wo masakani no mbeu inonakisa zvokuha.
^ Mavhu akacena inga marota.
^ Kana: “makuva anoceukijwa.”
^ Vonanyi Kudurujihwa ko Magama.
^ Kangaije: “vanozoisiihwa iri mathere.”
^ Vonanyi Kudurujihwa ko Magama.
