Mateu 24:1-51
24 Jesu paainga ecibuda mu themberi, vajiji vake vakamukhwederera kuti vamutatije themberi no mapiravira ayo.
2 Iyena wakavavhunja kuti: “Amuripi kuvona zvese izvi? Ndinomuvhunja zvokadi kuti, apana buwe rinozosara panyezuru po rimweni ricizivi kuwiswa.”
3 Paainga akagara pasi, pa Dundhu ro Maorivhe, vajiji vake vakamukhwederera vari vega vomuvhunjisa kuti: “Tivhunjenyi, zviro izvi zvinozoitika rini, ngocapi citatijo co kuvepo* kwenyu no cokupera ko nyika ino?”*
4 Jesu wakavavhunja kuti: “Bhasopanyi, mucacengejwa ngo mundhu ariwese.
5 Ngokuti vazinji vanozoviya ngo zina rangu veciti: ‘Inini ndini Kristu.’ Ngo kudaro, vanozocengeja vandhu vakawanda.
6 Munozozwa ngo zvo hondo no marehwa-rehwa o hondo. Bhasopanyi, mucathya, ngokuti zviro izvi zvinodikana kuitika, asi, asipi magumo.
7 “Ngokuti majinja no majinja anozomukirana, umambo no umambo hunozomukirana, kunozova no njara no kuzungunyika ko nyika mu ndau jakawanda.
8 Zvese izvi, kunonga kuri kutanga ko matambujiko basi.
9 “Vandhu vanozoita kuti mutambujwe no kumuuraya. Munozonyenywa ngo majinja ese ngo ndava yo zina rangu.
10 Vandhu vazinji vanozosiya kutenda Mwari, vecitengesana ngocavo no kunyenyana.
11 Kunozobuda vaporofeti vakawanda vo kunyepa, vanozocengeja vandhu vazinji;
12 rudo hwo vazinji hunozopera ngo ndava yo kuwanda ko ushaishi.
13 Asi wiya anocungirira mbhera ku magumo, anozoponeswa.
14 Masoko akanaka o Umambo aya, anozocumaehwa pasi pese, kuti vandhu vese vamazwe,* perepo kunozoviya kupejwa ko zvese.
15 “Ngo kudaro, kudari mukavona ciro cinoparaja, cinonyangaja, cakanangwa ngo muporofeti Dhaniyeri, cakaima pa ndau yakacena (muverengi ngaashandise murangariro wake),
16 vari mu Judheya, ngavatizire ku matundhu.
17 Ari pa denga, aavhiri kuderuka* kootora zviri mumba,
18 ari ku maminda aavhiri kuviya kanyi kootora nguvo yake.
19 I nyatwa ku vanakaji vano mimba no vanomwisa mu njiku jondhojo!
20 Endereranyi mberi meciita mukumbiro kuti zvicaitika mu mweji jokutondhora no mu Sabudu;
21 ngokuti kunozova no dambujiko guru ricizivi kumboitika kuvhira pa kusikwa ko nyika mbhera wari, rikapera, aricazoitikizve.
22 Zvokadi, kudari akatama kupunguhwa mazuva awo, apana mundhu waizoponeswa; asi ngo ndava yo vakasanwa, mazuva awo anozopunguhwa.
23 “Kudari ariwese akamuvhunja kuti: ‘Vonanyi! Kristu ari pano,’ kana ari ‘inoo!’ mucazvitenda.
24 Ngokuti kunozobuda Makristu o kunyepa no vaporofeti vo kunyepa veciita zvitatijo zvikuru no mushamaiso, kuti vacengeje vandhu vakasanwa ndi Mwari.
25 Inini ndamungwaja nguva iciripo.
26 Ngo kudaro, kudari mukavhunjwa kuti: ‘Vonanyi! Iyena ari ku bani,’ mucaendeyo; kana kuti ‘ari kanyi,’ mucazvitenda.
27 Kudari inga kurazva ko mbheni kunovheneka kuvha kumavhazuva mbhera kumavirira, ndizvona zvondhozvo zvinozoitika pa kuvepo* ko Mwana wo mundhu.
28 Kuno mutembo, ndikona kunoungana ngwanga.
29 “Sure ko matambujiko o njiku jondhojo, zuva rinozoita cidima, mweji auzobwaki, ndhondho jinozombhwera, masimba okumatenga anozozungunyiswa.
30 Mudenga munozovoneka citatijo co Mwana wo mundhu, mavhumbo ese o pasi anozojitaka paditi. Ivona vanozovona Mwana wo mundhu eciviya mu makore o kudenga no simba pamwepo no nduma huru.
31 Anozotuma ngirozi jake ngo izwi guru ro mbhayapaya, jinozounganija vakasanwa vake vo mativi marongomuna o nyika, kuvhira ku divi rimwe ro kumatenga mbhera ku divi rimweni.
32 “Wari jijanyi ngo muezaniso wo mukuyu: Matavi awo paanovhikitira, omera masakani, munoziva kuti cirimo ciri phedo.
33 Na imwimwivo, mukavona zvese izvi, zivanyi kuti iyena waaphedo, waapamusuvo.
34 Zvokadi ndinomuvhunja kuti: Mubarihwana uwu auzoperi zviro zvese izvi zvicito zvaitika.
35 Denga no nyika zvinopera, asi masoko angu aazoperi.
36 “Ngo pamusoro po njiku no nguva, apana anozviziva, nee ngirozi jo kumatenga nee Mwana, asi Baba vega ndivona vanozviziva.
37 Kudari inga zvakaitika mu njiku ja Nowa, ngo zvinozoitikazve pa kuvepo* ko Mwana wo mundhu.
38 Kudari inga mazuva awo, ndambi huru icito ikaza, vandhu vaiha no kumwa, vanarume vairovora, vanakaji vairovohwa mbhera pa njiku Nowa yaakanghwina mu piketi,*
39 ivona avazivi kuita ciricese mbhera ndambi huru yakaviya yovapsaira vese, ngo zvinozoitikavo pa kuvepo ko Mwana wo mundhu.
40 Vanarume vaviri vanozova ku maminda, umwe anozotohwa umweni wosiiwa.
41 Vanakaji vaviri vanozokwiya ngo gwiyo, umwe anozotohwa umweni wosiiwa.
42 Garanyi makarinda, ngokuti amuizivi njiku yaanozoviya Mambo wenyu.
43 “Asi zivanyi ciro cimwe: Kudari mune wo muzi naaiziva nguva inoguma mbavha, aacaizovata no kutendera kuti nyumba yake iphwanywe.
44 Ngo ndava yazvo, garanyivo makanasirira, ngokuti Mwana wo mundhu anozoviya pa nguva yamucingarangariri.
45 “Ndiyani muranda wakagondeka no wakangwara, wakadihwa ndi mambo pambeji po vashandi vese, kuti avape zvokuha ngo nguva kwayo?
46 Anodakara muranda wiya anowanika ndi mambo wake eciita kudaro!
47 Ndinomuvhunja zvokadi kuti, iyena anozomugaja kuti avonerere zviro zvake zvese.
48 “Asi kudari muranda wakashata akananga ngo mu mwoyo mwake kuti: ‘Mambo wangu ari kunonoka,’
49 wotanga kutaka varanda doni vake, eciha no kumwa no zvidhakwa,
50 mambo wake anozoviya pa njiku yaacikaveteri no nguva yaacikazivi.
51 Iyena anozomutambuja no kuzomukhandira mu ndau yo vacengejeri. Mondhomo anozocema no kugeda-geda meno.
Masoko o Pasi
^ Vonanyi Kudurujihwa ko Magama.
^ Vonanyi Kudurujihwa ko Magama.
^ Gama ngo Gama: “kuti ave ucapupu ku majinja ese.”
^ Kana: “kubzuka.”
^ Vonanyi Kudurujihwa ko Magama.
^ Vonanyi Kudurujihwa ko Magama.
^ Kana: “arka.”
