Mateu 26:1-75
-
Vapiri vanoda kuuraya Jesu (1-5)
-
Jesu anodururihwa mafuta anonuhira (6-13)
-
Phasika yo kupejisira no kutengeswa (14-25)
-
Ndhungamiriro yo Cirariro ca Mambo (26-30)
-
Jesu anonanga kuti Pedhru anozomuramba (31-35)
-
Jesu anoita mukumbiro mu Getsemani (36-46)
-
Jesu anosungwa (47-56)
-
Kutongwa pamberi po Sinedhriyo (57-68)
-
Pedhru anoramba Jesu (69-75)
26 Jesu naapera kunanga masoko aya ese, wakavhunja vajiji vake kuti:
2 “Munozviziva kuti jasara njiku mbiri kuti Phasika igume, Mwana wo mundhu anozoendeswa mu nyara jo vavengi kuti akohomehwe pa mutanda.”
3 Vatungamiriri vo vapiri no madhodha o* vandhu, vakaungana pa ruvanje po mupiri mukuru, waidanijwa Khaifasi,
4 vakazwirana kuti vabate* Jesu ngo ungwaru no kumuuraya.
5 Asi ivona vainanga kuti: “Atidikani kuzviita pa mutambo, kuti vandhu vatame kuita mapope.”
6 Jesu paainga mu Bhetaniya pamuzi pa Simoni nyamapere,
7 wakakhwederehwa ngo mwanakaji umweni wainga no botiri* rainga no mafuta anonuhira, aidhura maningi, wotanga kumadururira mu musoro make paainga eciha.
8 Vajiji pavakazvivona, vakanyangajwa, vonanga kudari: “Mafuta aya ari kusvejehwenyi?
9 Zvainga zviri nane kutengesa mafutewo ngo mutengo mukuru kakupekeja varombo.”
10 Jesu eciziva izvo, wakavavhunja kuti: “Muri kuda kumutambujirenyi mwanakajiwo? Iyena wandiitira zvakanaka maningi.
11 Imwimwi muno varombo mukuvo wese, asi amuzovi na inini mukuvo wese.
12 Mwanakaji uwu paandidururira mafuta pa muviri wangu, wazviita kuti andinasirire kuti ndiyende kovigwa.
13 Zvokadi ndinomuvhunja kuti, kuri kwese kunocumaihwa masoko akanaka aya mu nyika yese, zvaitari mwanakaji uwu, zvinozonangwavo kuti aceukijwe.”
14 Perapo, umwe wo Gumi na Vaviri, waidanijwa Judha Iskariyote, wakaenda ku vapiri vakuru
15 wovavhunja kuti: “Munondipa cinyi kudari inini ndikamupa mu nyara jenyu?” Ivona vakamugondesa kuti vaizomupa makumatatu o mangwenjere o sirivha
16 kuvhira pa nguva yondhoyo, iyena waipsanga manera okuda kumutengesa.
17 Pa njiku yokutanga yo Pau Jicina Mbijo, vajiji vakakhwederera Jesu, vomuvhunjisa kuti: “Munoda kuti tinasirire kwapi kuti muhireyo Phasika?”
18 Iyena wakavadavira kuti: “Endanyi ku dhorobha ku mundhu wakatikuti, momuvhunja kuti: ‘Mujijisi wativhunja kudari: “Nguva yangu yakagajwa yaaphepo; ngo kudaro, ndinoda kuha Phasika no vajiji vangu kumuzi kwakoyo.”’”
19 Ngo kudaro, vajiji vakaita zvovakavhunjwa ndi Jesu no kunasirira Phasika.
20 Zuva noravira, iyena wainga akacamira pa meza no vajiji vake gumi na vaviri.
21 Pavaiha, iyena wakati: “Ndinomuvhunja zvokadi kuti, umwe wenyu anozonditengesa.”
22 Ivona vakanyangajwa maningi pavakazwa izvi. Umwe na umwe wavo waimuvhunjisa kudari: “Mambo, ndini here?”
23 Iyena wakavadavira kuti: “Wiya anoseva na inini mu ndiro yondhoyo, ndiyena anozonditengesa.
24 Zvokadi, Mwana wo mundhu anopinda inga zvinonanga Matahwa ngo pamusoro pake. Asi, i nyathwa kuna wiya anotengesa Mwana wo mundhu! Zvainga zviri nane kwaari kutama kubahwa.”
25 Judha, wiya waizomutengesa, wakamuvhunjisa kuti: “Rabhi, ndini here?” Jesu wakamudavira kuti: “Ndiwe watozvinangaro.”
26 Pa nguva yo vaiha, Jesu wakatora pau, woita mukumbiro, pasure pazvo, wakagura-gura pau wopa vajiji vake, eciti: “Toranyi, ihanyi. Pau iyi inoimirira muviri wangu.”
27 Wakatora kopo woita mukumbiro, wovapa eciti: “Imwanyi imwimwi mwese,
28 ngokuti iyi inoimirira ‘ngazi yangu yo citenderano,’ inozopopomejwa kuti zvishaishi zvovazinji zviregerehwe.
29 Asi, inini ndinomuvhunja kuti: Andicazomwizve vhinyu iyi, mbhera njiku yo ndinozoimwazve nga papsa na imwimwi, mu Umambo hwa Baba wangu.”
30 Pakupejisira, pasure po kuimba ndumbo jo kusimba, vakaenda ku Dundhu ro Maorivhe.
31 Jesu wakavavhunja kuti: “Usiku huno, mwese munozokhugunyika ngo ndava yangu, ngokuti zvakatahwa kuti: ‘Ndinozobaya muhavisi; mavhuta o mushambi anozoparajika.’
32 Asi, ndikamuswa ku vakafa, ndinotungamira kuenda Garireya.”
33 Asi Pedhru wakamudavira kuti: “Pikija vese vakakhugunyika ngo ndava yenyu, inini mbhikwa, andizokhugunyiki!”
34 Jesu wakamuvhunja kudari: “Zvokadi ndinokuvhunja kuti, Jongwe ricito rarira usiku huno, iwewe unozondiramba katatu.”
35 Pedhru wakamudavira kuti: “Pikija zvikadika kuti ndife na imwimwi, inini andizomurambi.” Vajiji vese vainangavo zvondhozvo.
36 Jesu wakaguma navo pa ndau inodanijwa Getsemani, wovhunja vajiji vake kuti: “Garanyi pano, inini ndiri kuenda inoo koita mukumbiro.”
37 Wakatora Pedhru no vana vaviri va Zebhedhi, woamba kusuruvara no kuneseka maningi.
38 Iyena wakavavhunja kuti: “Ndakacamwa maningi, zvokuti ndiri kuda kutofa. Garanyi pano, muenderere mberi mecirinda na inini.”
39 Wakaenda pambeji padoko, wogwadama, wodira huma pasi, ecikumbira kuti: “Baba wangu, kudari zvecikwanisika, kopo iyi ngaifunduruke kondiri. Zvicadoitika ngo kuda kwangu, asi ngazviitike ngo kuda kwenyu.”
40 Wakahwirira ku vajiji vake, wovakhanda vakavata, perapo wovhunja Pedhru kuti: “Amukwanisi here kugara makarinda na inini nee nguva imwe hayo?
41 Garanyi makarinda, meciita mukumbiro mukuvo wese, kuti mutame kuejwa. Ndizvona, mujimu unoda, asi nyama yakaremba.”
42 Wakaendazve hwocipiri, woita mukumbiro eciti: “Baba wangu, kudari zvicikakwanisiki kuti kopo iyi ifunduruke kondiri ndicizivi kuimwa, ngazviitike ngo kuda kwenyu.”
43 Naaviyazve, wakavakhanda vakavata, ngokuti majiso avo airema ngo hope.
44 Ngo kudaro, wakavasiya woendazve hwocitatu koita mukumbiro, ecinanga zviro zvondhozvo.
45 Perapo wakaviya, wovhunja vajiji kuti: “Pa mukuvo wakadari inga uwu, muri kutovata henyu mecizorora! Vonanyi! Nguva yakhwedera kuti Mwana wo mundhu atengesehwe mu nyara jo vashaishi.
46 Mukanyi, ngatende. Vonanyi! Anodaya kunditengesa waaphedo.”
47 Jesu paainga acavereketa, Judha, umwe wo Gumi na Vaviri, wakaviya no vandhu vazinji vainga no mapanga no muponda. Vandhu ava vakatumwa ngo vapiri vakuru no madhodha o* vandhu.
48 Wiya waizomutengesa wakavapa citatijo eciti: “Wandinozobhejhari, ndiyena. Musungenyi.”
49 Ecienda kuna Jesu, iyena wakati: “Mabozinoti, Rabhi!” perapo womubhejhari.
50 Jesu wakamuvhunjisa kuti: “Shamwari, waviirenyi kuno?” Vandhu vaya vakaenda kuna Jesu vomubata no kumusunga.
51 Ngo civhumbu, umwe wo vainga na Jesu, wakavhomora banga rake wotema muranda wo mupiri mukuru, womuceka njeve yake.
52 Jesu wakamuvhunja kuti: “Hwirijai banga rako pa ndau yaro, ngokuti wese anotema vamweni ngo banga, anozofavo ngo banga.
53 Unorangarira kuti andikwanisi kukumbira Baba wangu kuti vanditumire gumi ro zvikwata no zvikwata zviviri zvo masoca o ngirozi here?
54 Waro, anozokwanirisika kudini Matahwa anonanga kuti zvaidikana kuitika kudaro?”
55 Pa nguva yondhoyo, Jesu wakavhunja mbungano kuti: “Ngenyi maviya kondisunga muno mapanga no muponda inga ndiri mbavha? Njiku jese ndaigara pasi ndecijijisa mu themberi, asi imwimwi amuzivi kundisunga.
56 Zvese izvi zvaitika kuti zvikwanirisike zvakatahwa ngo vaporofeti.” Vajiji vese vakamusiya votiza.
57 Vaya vainga vakasunga Jesu vakaenda naye ku nyumba yo mupiri mukuru Khaifasi, kwaiungana vatari no vakuru.
58 Pedhru waimutevera ngo ndhambo, mbhera pa muzi wo mupiri mukuru. Wakanghwina, wogara pamwepo no varanda kuti avone maperero azvo.
59 Vapiri vakuru no Sinedhriyo yese, vaipsaka kuitira Jesu ucapupu hwo kunyepa kuti vamuuraye.
60 Asi apana ucapupu hwovakawana, pikija kuti pakava no zvapupu zvakawanda zvokunyepa. Pakupejisira pakabuda zvapupu zviviri
61 zvoti: “Mundhu uwu wakati: ‘Ndinokwanisa kuphwanya themberi ya Mwari no kuivaka ngo njiku ndhatu.’”
62 Mupiri mukuru paakazwa izvi, wakamuka womuvhunjisa kuti: “Audaviri ciro kani? Unoti kudini ngo pamusoro po zvavari kukupumbhari?”
63 Asi Jesu wakanyararisa. Ngo kudaro, mupiri mukuru wakati kwaari: “Ndinokuvhunja kuti pikai pamberi pa Mwari anopona, kuti tikhohwe kuti iwewe ndiwe Kristu Mwana wa Mwari!”
64 Jesu wakati: “Ndimwi muri kutozvinanga. Ndinomuvhunja kuti: Kuvhira wari, mwese munozovona Mwana wo mundhu wakagara pa mukono muho wo simba, eciviya pa makore o kudenga.”
65 Perapo mupiri mukuru wakamwesa nguvo yake, eciti: “Iyena watuka Mwari. Ticadirenyizve zvapupu zvimweni? Mavona! Mapera kumuzwa ecituka Mwari.
66 Munovona kudini?” Ivona vakapingura kuti: “Anofanera kufa!”
67 Perapo vakamupfirira ku meso no kumutaka ngo soko.* Vamweni vaimupamura,
68 veciti: “Kristu, kudari uri muporofeti, tivhunjei ndiyani wakutaka?”
69 Pedhru waigara pasi kunja, pa ruvanje. Muranda kaji umweni wakamukhwederera, womuvhunja kuti: “Iwewe waingavo na Jesu wo Garireya!”
70 Asi iyena wakaramba pamberi po vese, eciti: “Andizvizivi zvauri kunangaro.”
71 Paakabuda pa musuvo wo ruvanje, musikane umweni wakamuvona, wovhunja vaingepo kuti: “Mundhu uwu wainga na Jesu wo Nazareta.”
72 Iyena wakamurambazve, ecipika kuti: “Inini andimuzivi mundhu uwu!”
73 Pasure po mukuvo mushoma, vandhu vaingepo vakakhwederera Pedhru, vomuvhunja kuti: “Zvokadi iwewe uri umwe wavo, ngokuti unobatika ngo mavereketere ako.”
74 Perapo wakatanga kutuka no kupika kuti: “Inini andimuzivi mundhu uwu!” Pa mukuvo wondhowo jongwe rakarira.
75 Pedhru wakarangarira zvakanangaya Jesu, kuti: “Jongwe ricito rarira, iwewe unozondiramba katatu.” Iyena wakabuda kunja ecicema* ngo kuhwajihwa.
Masoko o Pasi
^ Kana: “no vakuru vo.”
^ Kana: “vasunge.”
^ Gama ngo Gama: “botiri ro arabhasto.” Mujiyo wo botiri rakaitwa ngo buwe rakawanika phedo no Arabhastroni ku Ejipita.
^ Kana: “no vakuru vo.”
^ Kana: “zvibhakera.”
^ Kana: “kurira.”
