Mateu 27:1-66
27 Pa kueja ko kunja, vapiri vakuru no madhodha o* vandhu vakaungana kuti vavhunjisane mauraire avangaita Jesu.
2 Pasure pokumusunga, vakamutora voenda komupekeja govhernadhori Pirato.
3 Judha wakamutengesaya, naavona kuti Jesu wainga atongehwa kufa, wakazvidemba, wohwirijira makumatatu o mangwenjere o sirivha ku vapiri vakuru no madhodha,*
4 eciti: “Ndakashaisha pandakatengesa ngazi icina ndava.” Ivona vakati: “Tinenyi nazvo itusu? Izvo ngo zvako!”
5 Ngo kudaro, iyena wakakhandira mangwenjere o sirivha mu themberi, wobuda. Tevere wakaenda kojiuraya.*
6 Asi vapiri vakuru vakatora mangwenjere o sirivha aya, veciti: “Azvitendehwi kumadira mundau inovigihwaya mare mu themberi ngokuti mangwenjere aya imare yo ngazi.”
7 Novapera kuzwirana ngo cavo, ivona vakatora mare iya, voenda kotenga ndiyona munda wo muumbi kuti uite svipa yo kuviga vandhu vanovha nyika jimweni.
8 Ngo kudaro, munda uwu wakadanijwa kuti Munda wo Ngazi kutangira pondhopo mbhera na nyamasi.
9 Ngo kudaro, zvakakwanirisika zvakanangwa ngo muporofeti Jeremiya kuti: “Ivona vakatora makumatatu o mangwenjere o sirivha. Uwu, ndiwona mutengo wo mare yakatengwa ndiyona mundhu, yainga yakatemwa ngo vana vo Vaiziraeri.
10 Ivona vakatenga ndiyona munda wo muumbi inga zvandakavhunjwa ndi Jehovha.”*
11 Jesu wainga ari pamberi pa govhernadhori, govhernadhoriwo wakamuvhunjisa kuti: “Ndiwe Mambo wo Vajudha?” Jesu wakamudavira kuti: “Ndimwi muri kutozvinanga.”
12 Asi paainga ecipumbhwa ngo vapiri vakuru no madhodha,* iyena aazivi kuvadavira.
13 Pirato wakamuvhunjisa kuti: “Auripi kuzwa zvese zvauri kupumbhwari?”
14 Asi iyena aazivi kumudavira nee gama rimwe haro. Ngo ndava yazvo, govhernadhori wakakahamara maningi.
15 Pa mutambo wese wo Phasika, govhernadhori wainga no cirovejeso co kubudisa musungwi umwe, waidiwa ngo mbungano kuti abudiswe.
16 Pa mukuvo wondhowo, vainga vakasunga mushaishi waizivika maningi, waidanijwa Bharabhasi.
17 Pavainga vakaungana, Pirato wakavavhunjisa kuti: “Munoda kuti ndimubudisire ani, Bharabhasi kana Jesu anodanijwaya kuti Kristu?”
18 Ngokuti Pirato waizviziva kuti vakamupa ngo cishatihwa.
19 Asi paainga akagara pa cigaro co kutonga, mukaji wake wakamutumira masoko eciti: “Mucadonghwinira mu ndava yo mururami uwo, ngokuti usiku ndakarota, ndecitambujika maningi ngo pamusoro pake.”
20 Vapiri vakuru no madhodha* vakakhohwesa mbungano kuti ikumbire kuti Bharabhasi abude, asi Jesu aurawe.
21 Govhernadhori wakati kwavari: “Pa vaviri ava munoda kuti ndimubudisire ani?” Ivona vakati: “Bharabhasi.”
22 Pirato wakavavhunjisa kuti: “Waro Jesu anodanijwaya kuti Kristu, ndomuitenyi?” Vese vakati: “Ngaaende pa mutanda!”*
23 Iyena wakati: “Ngenyi? Iyena washaishenyi?” Ngo kudaro, ivona vaidanijira veciti: “Ngaaende pa mutanda!”
24 Pirato paakavona kuti aacaikwanisa kuita ciri cese, asi mbungano yaiita joweyowe, iyena wakatora kumwa, wosamba nyara pamberi po vandhu vese eciti: “Inini andina ndava ngo ngazi yo mundhu uwu. Izvo ngo zvenyu.”
25 Vandhu vese vakamudavira kuti: “Ngazi yake ngaiwire itusu no vana vedu.”
26 Perapo wakabudisa Bharabhasi, asi woita kuti Jesu atakwe no kukohomehwa pa mutanda.
27 Pondhopo masoca a govhernadhori akatora Jesu oenda naye kumuzi ka govhernadhori. Cikwata cese co masoca cakaungana cecimutendeneja.
28 Pavakapeja kumuvhura nguvo, vakamusimija nguvo yakapsuka,
29 Vakaruka hata yo muzwa voidira mu musoro make; mu nyara yo muho vakamubatisa njanga. Vecigwadama pamberi pake, vaimuseka veciti: “Zviri kudini, Mambo wo Vajudha!”
30 Vecimupfirira mata, vakatora njanga votanga kumutaka mu musoro.
31 Pejisire, pasure pokumuseka, vakamuvhura nguvo iyana, vomusimija nguvo jake, voenda naye koomukohomera pa mutanda.
32 Pavaipinda, vakasongana no mundhu wo Sirene anodanijwa Simoni. Vakamuvangirija kuti athware mutanda wokutambujikira.*
33 Pavakaguma pa ndau inodanijwa Gorogota, zvinoreva kuti Ndau yo Dendhenya,
34 vakamupa vhinyu yakavhenganijwa no miti inovava kuti amwe; asi paakairavira, wakaramba kuimwa.
35 Pavakapera kumukohomera pa mutanda, vakakovanisana nguvo jake, vecipsanga ngo sorti,
36 vakagareyo vacimungwarira.
37 Vakatara panyezuru po musoro wake ndava yaaipumbhwa kuti: “Uwu ndi Jesu Mambo wo Vajudha.”
38 Mbavha mbiri jainga jakakohomehwavo pa mutanda ngo pamutivi pake, imwe ku mukono muho, imweni ku mukono boshwe.
39 Vaipinda ndipona, vaimutuka no kujunguja musoro yavo
40 veciti: “Iwewe waidaya kuphwanya themberi no kuivaka ngo njiku ndhatu, waro jiponesei! Kudari uri mwana wa Mwari, derukai* pa mutanda wokutambujikira!”*
41 Vapiri vakuru, vatari no madhodha* vakatangavo kumushora veciti:
42 “Waiponesa vamweni; iyena aakwanisi kujiponesa ega! Iyena ndi Mambo wo Vaiziraeri; waro ngaaderuke pa mutanda wokutambujikira,* tinozomutenda.
43 Iyena waithemba Mwari; Mwari wakewo ngaamuponese kudari Ecimuda, ngokuti wainanga kuti: ‘Ndiri Mwana wa Mwari.’”
44 Mbavha jainga jakakohomehwa na iyena, jaimutukavo ngo njira yondhoyo.
45 Kutangira pajaikhwedera kuita nguva gumi na mbiri jo masikati,* kwakaita cidima cakafukija pasi pese mbhera pa nguva ndhatu jo madeko.*
46 Pajaikhwedera kuita nguva ndhatu jo madeko,* Jesu wakadanijira ngo izwi guru eciti: “Eri, Eri, rama sabakitani?” zvinoreva kuti: “Mwari wangu, Mwari wangu, ngenyi wandisiya ndega?”
47 Vamweni vo vaingepo pavakazvizwa, vakatanga kunanga kuti: “Mundhu uwu ari kudanija Eriya.”
48 Ngo kukasika, umwe wavo wakagogoma woenda kootora ciponja wocibija mu vhinyu inoshasha, wocibaira pa njanga, perapo womupa kuti aimwe.
49 Asi vamweni vavo vainanga kuti: “Muregerenyi! Ngativone dangani Eriya anoviya koomuponesa.”
50 Jesu wakaphindazve kudanijira ngo izwi guru, perepo wakafa.
51 Pa mukuvo wondhowo, jira ro mu ndau yakacenesesa rakamweka ngo pakati, kuvha nyezuru mbhera pasi, pasi pakazungunyika, mapuwe akaphwanyika.
52 Makuva* akafununguka, mutembo jo vandhu va Mwari jakamuswa
53 (vandhu vakamuswa mu makuva pasure po kumuswa kwa Jesu, vakanghwina mu dhorobha rakacena), vakavoneka ngo vandhu vazinji.
54 Mutungamiriri wo masoca na vaya vaingwaririra Jesu, novavona kuzungunyika ko pasi no zviro zvainga zveciitika, vakathya maningi, vonanga kuti: “Zvokadi uwu wainga Mwana wa Mwari.”
55 Vaingepo vanakaji vazinji vairingisa ngo ndhambo, ivona vainga vakaperekeja Jesu kuvha Garireya kuti vamushandire;
56 pakati pavo, paingavo na Mariya Madharena, Mariya mai wa Jakobo na Josesi, no mukaji wa Zebhedhi.*
57 Zuva noravira, wakaza mukhupuki wo Arimateya, anodanijwa Josefa, waingavo mujiji wa Jesu.
58 Iyena wakaenda kuna Pirato, womukumbira muviri wa Jesu. Pirato wakatuma masoca kuti aupuwe.
59 Josefa wakatora muviri, woufukija ngo nguvo yo mutengo mukuru,
60 wouviga mu guva* rake ibza, rainga rakaciwa pa buwe. Pasure po kumburumbujira buwe guru pa musuvo wo guva,* iyena wakapinda.
61 Asi Mariya Madharena na Mariya umweni vakasarepo, vakagara pambeji po guva.
62 Pa njiku yakatevera, yainga njiku yo Kunasirira kuitira Sabudu,* vapiri vakuru no Vafarisi vakaungana pamberi pa Pirato,
63 veciti: “Mambo, ticaceuja kuti munyepi wiya paainga ari penye wainanga kuti: ‘Ndinozomuswa pasure po njiku ndhatu.’
64 Ngo kudaro, tumiranyi vandhu kuti vaende kongwarira guva rake mbhera pa njiku yocitatu, kuti vajiji vake vatame kuviya kuzomuba, vovhunja vandhu kuti: ‘Iyena wamuswa ko vakafa!’ Manyepo okupejisira aya, anozoshata maningi kupinda okutanga.”
65 Pirato wakavadavira kuti: “Toranyi cikwata co masoca muende kongwarira guvero. Endanyi, nasanyi kuringwarira mbhera pamunokwanisa.”
66 Ivona vakaenda, vovangisa guva ngo kurinama no buwe riya no kudira varindiri.
Masoko o Pasi
^ Kana: “no vakuru vo.”
^ Kana: “vakuru.”
^ Kana: “kojicungisa.”
^ Vonanyi Kudurujihwa ko Magama.
^ Kana: “vakuru.”
^ Kana: “vakuru.”
^ Kana: “ngaakohomehwe pa mutanda.”
^ Vonanyi Kudurujihwa ko Magama.
^ Vonanyi Kudurujihwa ko Magama.
^ Kana: “bzukai.”
^ Kana: “vakuru.”
^ Vonanyi Kudurujihwa ko Magama.
^ Gama ngo Gama: “nguva yocitandhatu.”
^ Gama ngo Gama: “nguva yocipfumbamwe.”
^ Gama ngo Gama: “nguva yocipfumbamwe.”
^ Kana: “makuva anoceukijwa.”
^ Gama ngo Gama: “na mai wo vana va Zebhedhi.”
^ Kana: “guva rinoceukijwa.”
^ Kana: “guva rinoceukijwa.”
^ Zvinoreva kuti: Mucishanu.
