Mateu 3:1-17
3 Ngo mazuva awo, Johani Mubhabhatiji wakaenda kocumaera mu zvipare zvo Judheya,
2 eciti: “Khauyanyi, ngokuti Umambo hwo kudenga hwaaphedo.”
3 Uwu ndiyena wakanangwaya ngo muporofeti Isaya, eciti: “Kuno izwi riri kuzika muzvipare, reciti: ‘Nasiriranyi gwanja ra Jehovha!* Rungamisanyi makwanja ake.’”
4 Johani waisimira nguvo ino ukuse hwo kamera, cihunu cake caisungwa ngo bhande ro dovo. Iyena waiha ndere no uci.
5 Vandhu vese vo Jerusarema, vo Judheya no vo mundharaundha yaitendeneja Jordhani, vaienda kwaari.
6 Ivona vaibhabhatijwa* ndiyena mu Murambo wo Jordhani, vecidekeca pambhene zvishaishi zvavo.
7 Paakavona Vafarisi no Vasadhusi vazinji veciviya kuzobhabhatijwa, iyena wakati kovari: “Imwimwi vana vo vhumbi, ndiyani wamuvhunja kuti mutize ushungu hwa Mwari hunozoviyari?
8 Asi tatijanyi kuti imwimwi makhauya.
9 Mucarangarira mu mwoyo mwenyu kuti, ‘itusu tiri vana va Abhirahama.’ Inini ndinomuvhunja kuti Mwari anokwanisa kucinja mapuwe aya kuti ave vana va Abhirahama.
10 Bheura* rapera kunasirihwa kuti riteme muji jo muti. Muti wese ucikabari mucero yakanaka unozotemwa, wokhandihwa pa muriro.
11 Inini pacangu ndinobhabhatija ngo kumwa ngokuti imwimwi makhauya, asi wiya anotevera sure kwangu, ano simba kupinda inini. Inini andifaneri kuvhisa magwada ake. Iyena anozomubhabhatija ngo mujimu mucena no muriro.
12 Ano foshoro mu nyara jake, iyena anozoparajanisa mucece no makoto* pa cimbuwa, anozounganija mucece yake mu nyumbu, asi iyena anozopisa makoto ngo muriro ucikajimiki.”
13 Jesu wakavha Garireya woenda Jordhani ka Johani, kuti abhabhatijwe ndiyena.
14 Asi Johani wakaeja kumurambira, eciti: “Ndini ndinodikana kubhabhatijwa ndimwi, muri kuviyazve kwandiri?”
15 Jesu wakamudavira kuti: “Ucandirambira. Ngokuti ukandibhabhatija, zvinosisira maningi kwatiri kuti zvakarurama zvese zviitike.” Perapo wakazomutendera.
16 Naapera kubhabhatijwa, Jesu wakabuda mu kumwa; pa nguva yondhoyo, gore rakafununguka, wovona mujimu wa Mwari wecibzuka inga njiva, weciviya panyezuru pake.
17 Kwakazikazve izwi raivha kumatenga reciti: “Nga uwu Mwana wangu anodiwa, anondidakajisa.”
Masoko o Pasi
^ Vonanyi Kudurujihwa ko Magama.
^ Kana: “vaindondomejwa; vaibijwa mu kumwa.”
^ Kana: “mureno.”
^ Kana: “mapwepwa.”
