Mateu 4:1-25
4 Jesu wakaendeswa mu zvipare* ngo simba ra Mwari, perapo Dhiyabhu wakamueja.
2 Naapera kuzira pa makumarongomuna o njiku, usiku no masikati, iyena wakazwa njara.
3 Dhiyabhu wakaviya kuzomueja wo muvhunja kuti: “Kudari uri mwana wa Mwari, vhunjai mapuwe aya kuti apinduke kuita pau.”
4 Asi wakamudavira kuti: “Zvakatahwa kuti: ‘Mundhu aadikani kupona ngo pau basi, asi anodikana kupona ngo masoko ese anovha pa muromo wa Jehovha.’”*
5 Dhiyabhu wakamutora woenda naye ku Jerusarema, womudira pa ndau yakakhwira maningi yo themberi
6 womuvhunja kuti: “Kudari uri mwana wa Mwari, jikhandirei pasi, ngokuti zvakatahwa kuti: ‘Iyena anozotuma ngirozi ngo pamusoro pako,’ ‘ijona jinozokuhaka kuti soka jako jitame kutaka pa mapuwe.’”
7 Jesu wakati kwaari: “Zvakatahwazve kuti: ‘Ucadoeja Jehovha* Mwari wako.’”
8 Dhiyabhu wakamutorazve woenda naye pa dundhu rakareba maningi, womutatija umambo hwese hwo nyika no upfumi hwayo.
9 Wakamuvhunja kuti: “Kudari ukagwadama wondinamata kamwe basi, zvese izvi ndinozokupa.”
10 Jesu wakati kwaari: “Ivhai Sathana! Ngokuti zvakatahwa kuti: ‘Ndi Jehovha* Mwari wako waunodikana kunamata, ndiyena basi waunodikana kuitira basa rakacena.’”
11 Ngo kudaro, Dhiyabhu wakamusiya. Ngirozi jakaviya jomuvangisa.
12 Iyena paakazwa kuti Johani wakafungihwa mu kadheya, Jesu wakaenda ku Garireya.
13 Cimwenizve, paakavha ku Nazareta, wakaenda kogara mu Kafarnaume ngo mumbhiripiri mo jombe rinowanika mu madhistiritu o Zebhuroni no Naftari,
14 kuti zvikwanirisike zvakanangwa ngo muporofeti Isaya kuti:
15 “Imwimwi vandhu vo nyika yo Zebhuroni no Naftari, nyika jinowanika mu gwanja rinoenda kujombe, ngo mwombera mo Jordhani, nyika yo Garireya inogahwa ngo vandhu vo majinja!
16 Vandhu vanogara mu cidima, vakavona ruvheneko hwakakura. Vaya vaigara mu ndharaundha yo munvuriri unouraya, vakavhenekehwa.”
17 Kuvhira pondhopo, Jesu wakatanga kucumaera eciti: “Khauyanyi, ngokuti Umambo hwo kudenga hwaaphedo.”
18 Ecifamba ngo mumbhiripiri mo Jombe ro Garireya, Jesu wakavona Simoni anodanwa Pedhru na Andereya munukuna wake vecikhandira juya mu jombe, ngokuti vainga vatandi.
19 Jesu wakati kwavari: “Nditeverenyi, ndinozomuita vatandi vo vandhu.”
20 Pondhopo vakasiya majuya avo vomutevera.
21 Jesu naafamba padoko, wakavonazve Jakobo mwana wa Zebhedhi na Johani munukuna wa Jakobo. Vainga mungarava na baba wavo Zebhedhi vecisona majuya avo, iyena wakavadanija.
22 Pondhopo ivona vakasiya ngarava na baba wavo, vomutevera.
23 Jesu waifamba mu Garireya mwese ecijijisa mu masinagoga avo no kucumaera masoko akanaka o Umambo, ecirapa mushovo wese wo ndhendha jainga no vandhu.
24 Kutokota kwake kwakaguma mu Siriya mwese. Vandhu vaizisa kwaari vese vaihwaja ndhendha jakasiyana-siyana no vaitambujika ngo ndhwaji pomwe no vainga no madhimoni, njwiti* no vaioma muviri. Iyena waivarapa vese.
25 Ngo kudaro, uzinji hwo vandhu hwaimutevera, hwaivha Garireya, Dhekapori, Jerusarema, Judheya, no vaivha mwombera mo Jordhani.
Masoko o Pasi
^ Kana: “mapani.”
^ Vonanyi Kudurujihwa ko Magama.
^ Vonanyi Kudurujihwa ko Magama.
^ Vonanyi Kudurujihwa ko Magama.
^ Kana: “unjwiti.”
