Mateu 8:1-34
8 Naaderuka pa dundhu, mbungano yakamutevera.
2 Kwakaviya mundhu wainga no mapere, womugwadamira eciti: “Mambo, kudari mecida, mungandirapa.”
3 Jesu wakatambanuja nyara yake, womupsasa, woti: “Ndinoda! Mapere ako ngaapere.” Pa mukuvo wondhowo, mapere ake akapera.
4 Perapo Jesu wakamuvhunja kuti: “Bhasopai, ucadovhunja ariwese, asi endai kojitatija ku mupiri no kuita cipo cakanangwa mu mutemo wa Mosi, kuti vavone kuti wavangadi.”
5 Paakanghwina mu Kafarnaume, mutungamiriri wo masoca wakaenda kwaari, ecimudeketerera
6 eciti: “Mushandiri wangu wakavata kanyiyo ngo ndhendha yo kuoma muviri, iyena ari kutambujika maningi.”
7 Iyena wakati kwaari: “Ndinozomurapa ndikagumeyo.”
8 Mutungamiriri wo masoca wakadavira kuti: “Andifaneri kuti imwimwi munghwine mumba mangu, asi nanganyi gama rimwe basi, mushandiri wangu anozovanga.
9 Inini ndinotongwavo, asi ndino masoca andinotonga. Pandinovhunja musoca kuti, ‘endai inoo!’ iyena anoenda. Ndikavhunja umweni kuti, ‘viya kuno!’ iyena anoviya. Ndikavhunja muranda wangu kuti, ‘itai ici!’ iyena anoita.”
10 Jesu paakazwa izvi, wakakahamara wovhunja vaimutevera kuti: “Ndinomuvhunja cokwadi kuti, mu Iziraeri andizivi kuwana mundhu ano rutendo hwakakura inga hwo mwanarume uwu.
11 Asi ndinomuvhunja kuti vandhu vazinji vanozovha kumavhazuva no kumavirira, voviya koha pa meza na Abhirahama, Izaki na Jakobe mu Umambo hwo kumatenga;
12 kuveni vana vo Umambo vanozokhandihwa kunja kuno cidima. Kondhoyo vanozocema* no kugeda-geda meno.”
13 Jesu wakavhunja mutungamiriri wo masoca kuti: “Endai. Ngazviitike kwauri mukuzwirana no rutendo hwawakhombijari.” Mushandiri wake wakavanga pa nguva yondhoyo.
14 Jesu paakanghwina mu nyumba ya Pedhru, wakavona vambiyake Pedhru vakavata ngokuti vaihwaja*
15 Ngo kudaro, Jesu wakavapsasa nyara, kupisa muviri kwiya kwakapera, perapo vakamuka votanga kumushandira.
16 Zuva noravira, vakamuzisira vandhu vazinji vainga no madhimoni; iyena wakagogomera mujimu iji ngo gama rimwe, worapa vese vaihwaja,
17 kuti zvikwanirisike zvakananga muporofeti Isaya kuti: “Iyena wakatora ndhendha jedu, wothwara kuhwajihwa kwedu.”
18 Jesu paakavona mbungano yaimutendeneja, wakavhunja vajiji vake kuti vaambuke kuenda mwombera.
19 Kwakaviya mutari umweni, womuvhunja kuti: “Mujijisi, ndinozomutevera kwese kwamunoenda.”
20 Jesu wakati kwaari: “Muhwe jino maguru, shiri jino masaki, Mwana wo mundhu aana ndau yake kamare yo kuvata.”
21 Mujiji umweni wakati: “Mambo, nditenderenyi kuti nditange kuenda kooviga baba wangu.”
22 Jesu wakati kwaari: “Endererai mberi wecinditevera, siyai vakafa vavigane ngocavo.”
23 Paakapakira ngarava, vajiji vake vakamutevera.
24 Mujombe makamuka zibepo,* rakaitisa kuti mavimbi azaje ngarava ngo kumwa; asi Jesu waivata.
25 Vajiji vakaenda komumusa veciti: “Mambo, tiponesenyi, topera!”
26 Iyena wakavavhunja kuti: “Munothya ngenyi, imwimwi vandhu vacina rutendo hwakavanga?” Pondhopo iyena wakamuka, wovereketera ngo hasha mbhepo no jombe, zvese zvakagajana.
27 Ivona vakakahamara veciti: “Ndiyani mundhu uwu, anopurukihwa ngo mbhepo no jombe?”
28 Paakaguma mwombera ko jombe ku mutundhu wo Vagadhareni, vanarume vaviri vainga no madhimoni vakaenda kuna Jesu vecivha ngo mu makuva.* Ivona vainga no ushungu maningi, zvokuti apana mundhu waikwanisa kupinda ngo gwanja rondhoro.
29 Ivona vaimima* veciti: “Tinenyi itusu na iwewe, Mwana wa Mwari? Waviya kuzotitambuja, nguva icito yakwana?”
30 Kwainga no mushambi wo nghumba jaihava ngo ndhambo padoko.
31 Madhimoni akatanga kumudeketerera eciti: “Kudari ukatigogomera, tiendesei ku mushambi wo nghumba.”
32 Iyena wakamavhunja kuti: “Endanyi!” Iwona akabuda, onghwina mu nghumba. Mushambi wese wo nghumba wakagogoma wophuka ngo pagomokomo weciwira mu jombe; nghumba jese jakafira mu kumwa.
33 Vahavisi vakatiza vonghwina mu dhorobha, vonanga zvese zvainga zvaitika, kubatanijavo zvakaitikira vanarume vaingaya no madhimoni.
34 Vandhu vese vo mudhorobha vakaenda kuna Jesu, pavakamuvona, vakamukumbira kuti abude mu ndharaundha mavo.
Masoko o Pasi
^ Kana: “vanozorira.”
^ Gama ngo Gama: “ngokuti vaipisa muviri.”
^ Kana: “dutu.”
^ Kana: “makuva anoceukijwa.”
^ Kana: “vaikhuwa.”
