Ruka 1:1-80
-
Masoko kuna Tiyofiro (1-4)
-
Gabhriyeri anonanga ngo pamusoro po kubahwa ka Johani Mubhabhatiji (5-25)
-
Gabhriyeri anonanga ngo pamusoro po kubahwa ka Jesu (26-38)
-
Mariya anovhakacira Erizabheti (39-45)
-
Mariya anokuja Jehovha (46-56)
-
Johani anobahwa perepo woduhwa zina (57-66)
-
Ciporofeti ca Zakariya (67-80)
1 Vandhu vazinji vakavangisira kupsakisisa zviro zvese zvakaitika no kuzvitara, itusu tinotendavo zviitiko izvi ticikakani-kani,
2 inga zvo vakatizivisa vaya vakazvivona kuvhira pakutanga, voitwa vazivisi vo masoko,
3 ininivo, pasure po kupsakisisa zviro zvese zvakaitika kuvhira pakutanga, ndakasunga kuti ndimutarire ngo kutevererana ko zviitiko, imwimwi munoreremejwa va Tiyofiro,
4 kuti mukhohwe ngo zviro zvamakajijiswa ngo muromo.
5 Mu njiku ja Herodhi,* mambo wo Judheya, kwainga no mupiri umweni waidanijwa Zakariya, wo cikwata co vapiri cinodanijwa kuti Abhiya. Mukaji wake wainga mwana wa Aroni, zina rake rainga Erizabheti.
6 Vovaviri vainga vakarurama pamberi pa Mwari, ivona vainga vacina ndava mukuzwirana no zvinodiwa ngo mutemo ja Jehovha.*
7 Asi wainga acina vana ngokuti Erizabheti wainga shenje,* vovaviri vainga vaaharahwa.
8 Zakariya wainga ecishandira Mwari inga mupiri pa mukuvo wakagajwa cikwata cake,
9 yakaguma vhaza yake yokuita mupiro mukuzwirana no cirovejeso co upiri, paakanghwina mu ndau yakacena ya Jehovha.*
10 Vandhu vese vaiita mukumbiro kunja, pa nguva yo zvipo zvo rubani.
11 Ngirozi ya Jehovha* yakamugumira, yakaima ngo mukono muho wo artari yo rubani.
12 Zakariya paakaivona, wakakanjamuka, wozara ngo kuthya.
13 Asi ngirozi yakamuvhunja kuti: “Ucathya Zakariya, ngokuti mukumbiro wako wazika. Mukaji wako Erizabheti anozokubarira mwana, iwewe unozomudura zina rokuti Johani.
14 Unozodakara no kutamba, vazinji vanozodakara ngo kubahwa kwake,
15 anozova mundhu mukuru pamavonero a Jehovha.* Asi iyena aadikani kumwa vhinyu kana zvese zvinodhakwisa, iyena anozozara ngo mujimu mucena, pikija aciri mu ndani ma mai wake,
16 anozohwirija vana vazinji vo Vaiziraeri kuti vahwirire ka Jehovha* Mwari wavo.
17 Iyena anozoendazve pamberi pake* ngo mujimu no simba ra Eriya, kuti aviisezve mwoyo jo majibaba ku vana, vandhu vacikazwiri kuti vave no uzivi hwo varurami, kuti apekeje Jehovha* vandhu vakanasirihwa.”
18 Zakariya wakavhunja ngirozi kuti: “Ndingazvithembesa kudini kuti izvi ngo zvokadi? Ngokuti inini no mukaji wangu taaharahwa.”
19 Ngirozi yakamudavira kuti: “Ndini Gabhriyeri, anogara pamberi pa Mwari, ndatumwa kuti ndibhuye na iwewe no kukuvhunja masoko akanaka aya.
20 Asi izwai! kuvhira wari iwewe unozoita mbeveve mbhera njiku yazvinozoitika zviro izvi. Ngokuti auzivi kutenda masoko angu anozokwanirisika pa nguva yakagajwa.”
21 Pa nguva yondhoyo, vandhu vaindovetera Zakariya. Ivona vaikahamara ngokuti iyena wainga ecinonoka maningi mu ndau yakacena.
22 Paakabuda, iyena wainga acikavereketizve navo, ivona vakaziva kuti wainga akavona ciro cinoshamaisa mu ndau yakacena. Iyena waibhuya navo ngo nyara, ngokuti wainga acikavereketi.
23 Nojapera njiku jake jo basa, wakahwirira kanyi kwake.
24 Sure ko njiku nganani, mukaji wake, Erizabheti, wakava no mimba. Ngo kudaro wakagara pamuzi ko mweji mushanu, eciti:
25 “Izvi ndizvona zvandiitira Jehovha* mazuva ano. Iyena wandirangarira kuti avhise kupserujwa kwangu ngo vandhu.”
26 Pa mweji wocitandhatu, ngirozi Gabhriyeri yakatumwa ndi Mwari kuti iyende ku dhorobha ro Garireya rinodanijwa kuti Nazareta,
27 ku mbhandwe yainga yakagondeswa kucadha na* Josefa wo nyumba ya Dhavhidhi. Zina ro mbhandweyo rainga Mariya.
28 Payakaguma paainga ari, ngirozi yakati kwaari: “Masoko Mariya, iwewe waitihwa unyasha hukuru ndi Mwari. Jehovha* ana iwewe.”
29 Paakazwa masoko aya, iyena wakakahamara, wopsaka kuziva kuti kunoda kunangenyi kucungamija uku.
30 Ngirozi yakamudavira kuti: “Ucathya Mariya, ngokuti wawana unyasha pamberi pa Mwari.
31 Izwai! iwewe unozova no mimba, perapo wobara mwana. Unodikana kumudura zina rokuti Jesu.
32 Iyena anozoita mukuru, wozodanijwa kuti Mwana wo Mukuru-Kuru. Jehovha* Mwari anozomupa cigaro co umambo ca baba wake, Dhavhidhi,
33 iyena anozova Mambo wo nyumba ya Jakobe mbhera narini, Umambo hwake ahuzovi no magumo.”
34 Mariya wakavhunja ngirozi kuti: “Izvi zvingaitisa kudini, ngokuti inini andizivi kumbovata no mwanarume?”
35 Ngirozi yakamudavira kuti: “Mujimu Mucena unozoviya panyezuru pako no simba ro Mukuru-Kuru, rinozokufukija ngo munvuriri waro. Ngo ndava yazvo, anozobahwaro anozodanijwa kuti wakacena, Mwana wa Mwari.
36 Izwai! ukama hwako Erizabheti anonangwaya kuti ishenje* anozobaravo mwana, mu ukarahwa hwake. Uwu waamweji wo citandhatu;
37 ngokuti akuna zvinonanga Mwari zvicikakwanirisiki.”
38 Mariya wakati: “Inini ndiri muranda wa Jehovha!* Ngazviitike kwandiri mukuzwirana no zvamanangaro.” Sure kwazvo, ngirozi yakapinda.
39 Ngo njiku ijo, Mariya wakapinda ngo kukasika ecienda ku ndharaundha yo matundhu, ku dhorobha ro Judha.
40 Iyena wakaenda ku muzi wa Zakariya, wocungamija Erizabheti.
41 Ngo kudaro, Erizabheti paakazwa kucungamija kwa Mariya, mwana wainga mundani ma Erizabheti wakaphuka, iyena* wozara ngo mujimu mucena,
42 wokhuwa ngo izwi guru eciti: “Ndiwe wakakomborehwa pakati po vanakaji vese. Wakakomborehwa mwana ari mundani mako!
43 Ndini ani inini kuti mai wa Mambo wangu aviye kuzondivona?
44 Ngokuti pandazwa mucungamijo wako, mwana ari mundani mangu, waphuka ngo kudakara.
45 Anodakarazve ndiyena wakazvitenda, ngokuti zvese zvakanangwa ndi Jehovha,* zvinozonasa kukwanirisika kwaari.”
46 Mariya wakati: “Upenyu hwangu ngahukuje Jehovha,*
47 mujimu wangu aungatami kuzara ngo mudakaro ngo pamusoro pa Mwari, Muponesi wangu,
48 ngokuti iyena wavona urombo hwo muranda kaji wake. Kuvhira wari mubarihwana yese inozonanga kuti ndiri mwanakaji wakadakara,
49 ngokuti Mwari wo Simba wandiitira zviro zvikuru. Zina rake rakacena.
50 Ku mubarihwana no mubarihwana, usizi hwake huri panyezuru pa vaya vanomuthya.
51 Iyena watatija simba rake ngo mukono wake; woparajanisa vanojikuja mu mwoyo mavo.
52 Wakavhisa vandhu vano simba pa zvigaro zvo umambo, wokuja vanojidodokesa;
53 iyena wakagutisa vainga no njara ngo zviro zvakanaka, asi vakhupuki wakavapindisa vacina ciro.
54 Iyena wakaviya kuzobesera Vaiziraeri, vashandiri vake, kuti atatije kuti aazivi kukanganwa cigondiso cake co kutatijira usizi mbhera narini.
55 Ndizvona zvaainga akavhunja majicekuru edu, Abhirahama no mubarihwana* wake.”
56 Mariya wakagara naye ko mweji mutatu perepo wohwirira kanyi kwake.
57 Wakazoguma mukuvo wo kuti Erizabheti abare. Iyena wakabara mwana worume.
58 Vopacigarisano no ukama hwake pavakazwa kuti Jehovha* wainga amuitira usizi hwakakura, vakatanga kudakara pamwepo na iyena.
59 Mu njiku yocisere ivona vakaenda koosoka mwana wiya no kumudura zina ra babake ro kuti, Zakariya.
60 Asi mai wake vakadavira kuti: “Andizvopi! asi anozodanijwa Johani.”
61 Ivona vakamuvhunja kuti: “Mu ukama hwako amuna na umwe ano zina iri.”
62 Vakavhunjisa baba wake vecishandisa zvitatijo kuti, anoda kuti aduhwe ani.
63 Iyena wakakumbira tabwa wotara kuti: “Zina rake ndi Johani.” Vese vakakahamara ndizvona.
64 Pa mukuvo wondhowo kamare, muromo wake wakafununguka, rurumi hwake hwosujunuka perapo wotanga kuvereketa ecikuja Mwari.
65 Vese vaigara mu ndharaundhemo, vakazara ngo kuthya. Zviro izvi zvakatanga kubhuiwa mundharaundha yese yo Judheya.
66 Vese vaizvizwa vaizviviga mumwoyo veciti: “Mwana uwu anozova wakadini?” Ngokuti nyara ya Jehovha* yaingadi naye.
67 Ngo kudaro, baba wake Zakariya wakazara ngo mujimu mucena, woporofeta eciti:
68 “Ngaakujwe Jehovha* Mwari wo Vaiziraeri, ngokuti wavona vandhu vake, wovaponesa.
69 Iyena wakatiitira muponesi* ano simba mu nyumba ya Dhavhidhi mushandiri wake.
70 Izvi ndizvona zvaainga akananga ecishandisa vaporofeti vake vakagondeka kuvhira kare,
71 kuti atiponese ku vavengi vedu no munyara jo vandhu vese vanotizonda;
72 kuti akhombijire usizi ku majicekuru edu no kuceuja citenderano cake cakacena.
73 Citenderano ici i mbhiko yaakaitira Abhirahama cekuru wedu,
74 yo kutipa mukana wo kumuitira basa rakacena pasure po kuponeswa mu nyara jo vavengi vedu
75 ngo kugondeka no ururami pamberi pake njiku jedu jese.
76 Asi iwewe mwana wangu, unozodanijwa muporofeti wo Mukuru-Kuru, ngo kuti unozoenda kumbeji kwa Jehovha* kuti umunasiririre makwanja ake,
77 kuti upekeje vandhu zivo yo ruponeso ngo kuregerehwa ko zvishaishi zvavo,
78 ngo ndava yo pena ina Mwari wedu. Ngo ndava yo pena iyi, tinozovona ruvheneko hunovha kudenga, hwecimonikira inga kubuda ko zuva,
79 kuti avhenekere vanogara mu cidima no mumunvuriri wo rufu, wotungamirira mudanyu jedu mu gwanja ro runyararo.”
80 Mwana uwu wakakura kunyama no kumujimu. Iyena wakaenderera mberi ecigara mu zvipare mbhera njiku yaakajivonesa pambhene ku Vaiziraeri.
Masoko o Pasi
^ Vonanyi Kudurujihwa ko Magama.
^ Vonanyi Kudurujihwa ko Magama.
^ Kana: “ciumba; mwanakaji acikabari.”
^ Vonanyi Kudurujihwa ko Magama.
^ Vonanyi Kudurujihwa ko Magama.
^ Vonanyi Kudurujihwa ko Magama.
^ Vonanyi Kudurujihwa ko Magama.
^ Pa Mwari.
^ Vonanyi Kudurujihwa ko Magama.
^ Vonanyi Kudurujihwa ko Magama.
^ Kana: “mbhandwe yakabatihwa ndi.”
^ Vonanyi Kudurujihwa ko Magama.
^ Vonanyi Kudurujihwa ko Magama.
^ Mwanakaji acikabari.
^ Vonanyi Kudurujihwa ko Magama.
^ Erizabheti.
^ Vonanyi Kudurujihwa ko Magama.
^ Vonanyi Kudurujihwa ko Magama.
^ Gama ngo Gama: “mbeu.”
^ Vonanyi Kudurujihwa ko Magama.
^ Vonanyi Kudurujihwa ko Magama.
^ Vonanyi Kudurujihwa ko Magama.
^ Gama ngo Gama: “iyena wakatimusira nyanga yo ruponeso.”
^ Vonanyi Kudurujihwa ko Magama.
