Ruka 10:1-42
10 Pasure po zviro izvi, Mambo wakagajazve makumanomwe o vajiji, wovatuma vaviri-vaviri, kuti vatungamire kwenda mu madhorobha ese no kundau jaaida kuzoenda.
2 Iyena wakavavhunja kuti: “Zvokadi, munda unoda kukotohwa, wakakura. Asi vashandi vashoma. Ngo kudaro, kumbiranyi Mune wo munda kuti atumire vashandi kuzokotora mu munda wake.
3 Endanyi! Ndiri kumutumira inga mavhuta pakati po mapumbhi.
4 Mucatora cikhwama co mare, kana cinyede co zvokuha no magwada. Mucacungamija ari wese* pamunonga mecifamba mugwanja.
5 Mukanghwina pa muzi uri wese, tanganyi ngo kunanga kudari: ‘Ngapave no runyararo pamuzi pano.’
6 Kudari pano vandhu vanoda runyararo, runyararo hwamunoda kwavari ngavave naho. Kudari pacina vanoda runyararo, garanyi muno runyararo hwenyu.
7 Ngo kudaro, garanyi pamuzi uno vandhu vanoda runyararo, meciha no kumwa zviri zvese zvavanomupa ngokuti mushandi anotendehwa kuashira mupocero wake. Mucandogara mecicinja-cinja pamuzi po kugara.
8 “Cimwenizve, kuri kwese kwamunonghwina mu dhorobha, vomuashira ushoni, ihanyi zvamunopuwa
9 no kurapa vanohwaja vari mukati maro, movavhunja kuti: ‘Umambo hwa Mwari hwakhwedera komuri.’
10 Kuri kwese kwamunonghwina mu dhorobha, votama kumuashira ushoni, budanyi moenda ku makwanja aro makuru, monanga kuti:
11 ‘Tinomupumbhujira bukuta ro dhorobha renyu, rabatirira soka jedu. Asi, zivanyi izvi, kuti Umambo hwa Mwari hwaaphedo.’
12 Ndinomuvhunja kuti njiku yondhoyo zvinozonesa maningi ku dhorobha iri kupinda Sodhoma.
13 “Uno nyathwa iwewe, Korazini! Uno nyathwa iwewe, Bhetsaidha! Ngokuti mabasa anoshamaisa akaitika mauri, naakaitika mu Tiro no Sidhoni, madhorobha aya aizodeno akhauya, osimira saku no kugara pa marota.
14 Ngo kudaro, zvinozonesa maningi kouri pa kutongwa, kupinda ku madhorobha o Tiro no Sidhoni.
15 Waro iwewe Kafarnaume, unozoenda kumatenga here? Haiwa! Unozoenda mu Guva.*
16 Wiya anomupurukira, anondipurukiravo. Wiya anomuramba, anondirambavo. Wiya anondiramba anorambavo wiya wakandituma.”
17 Makumanomwe o vajiji vaya, vakaviya vakadakara veciti: “Mambo, pikija madhimoni aitizwira ngo kushandisa zina renyu.”
18 Jesu wakavavhunja kuti: “Ndiri kuvona Sathana eciwa inga mbheni yecivha mudenga.
19 Inini ndakamupa simba ro kucika nyoka no zvinyamuthwa,* no simba rese ro muvengi. Apana ciro cinozomukhuvaza.
20 Mucadakara ngokuti mujimu iri kumuthya. Asi dakaranyi ngokuti mazina enyu atahwa kumatenga.”
21 Pa nguva yondhoyo kamare, mujimu mucena wakaita kuti Jesu adakare maningi, perapo woti: “Ndinomusimba imwimwi Baba, Mambo wo kumatenga no pasi, ngokuti zviro izvi amuzivi kuzvitatija vazivi no vakangwara, asi makazvitatija vana vadoko. Ndizvona Baba, ngokuti ndiwona maitiro amunoda.
22 Zviro zvese ndakazvipuwa ndi Baba wangu. Akuna anoziva kuti ndiyani Mwana kuciripi Baba. Nee akuna anoziva kuti ndiyani Baba kuciripi Mwana. Kudari Mwana acikadi kujijisa ari wese ngo pamusoro pa Babake, apana anganasa kuvaziva kamare.”
23 Ngo kudaro, wakavhunja vajiji vake pavainga vega kuti: “Anodakara majiso anovona zvamuri kuvonari.
24 Ndinomuvhunja kuti: Vaporofeti vazinji no majimambo, vaida maningi kuvona zvamuri kuvonari, asi avazivi kuzvivona; no kuzwa zvamuri kuzwari asi avazivi kuzvizwa.”
25 Muzivi wo Mutemo umweni wakamuka ecida kumueja, womuvhunjisa kuti: “Mujijisi, ndinodikana kuitenyi kuti ndigare utaka hwo upenyu hucikaperi?”
26 Jesu wakati kwaari: “Mu Mutemo makatahwa kudini? Unoverenga kudini?”
27 Iyena wakamudavira kuti: “‘Idai Jehovha* Mwari wako ngo mwoyo wako wese, upenyu hwako hwese, simba rako rese, murangariro wako wese’ no ‘kuda mudoni wako inga madire aunojiita.’”
28 Jesu wakamuvhunja kuti: “Wadavira ushoni; endererai mberi weciita kudaro, unozowana upenyu.”
29 Mwanarume uwu ecida kujivonesa kuti wakarurama, wakavhunjisa Jesu kuti: “Ndiyani kamare mudoni wangu?”
30 Jesu wakamudavira kuti: “Mundhu umweni waivha* Jerusarema, ecienda Jeriko. Paainga ecifamba mu gwanja, wakawira mu nyara jo magandanga, naapera kumutorera zvese no kumutaka, akapinda, omusiya woda kufa.
31 Zvakaitika kuti, mupiri umweni waipinda ngo gwanjero, asi paakamuvona, wakapinda ngo pamutivi.
32 Mukufananavo, Murevhi umweni paakaguma pondhopo, womuvona, wakapindavo ngo pamutivi.
33 Asi Musamariya umweni waiita hwendo hwake ngo gwanja iri, paakaguma pondhopo, womuvona, wakamuzwira pena.
34 Iyena wakamukhwederera no kumupomba mavonje ake, womazoja ngo mafuta no vhinyu. Tevere, wakamupakija pa mbongoyo yake no kumuendesa ku nyumba yo varendo, womuarika.
35 Pa njiku yakatevera, wakavhisa madhenariyo* maviri, womapa mushandi wo panyumba yo varendo, womuvhunja kuti: ‘Mungwarirei ushoni, ukashandisa mare yakawanda kupinda iyi, ndinozokupagari ndikaviya.’
36 Pa vandhu vatatu ava, ngowapi waunovona kuti wajiita mudoni wo mwanarume wakawiraya mu nyara jo magandanga?”
37 Iyena wakati: “Ngo wiya wakamuitira usizi.” Jesu wakamuvhunja kuti: “Endai woitavo kudaro.”
38 Povakaenderera mberi no hwendo hwavo, Jesu wakanghwina mu ndharaundha imweni. Kondhoyo mwanakaji umweni anodanijwa Marita wakamuashira pamuzi pake.
39 Iyena wainga no munukuna wake waidanijwa Mariya, iyena waigara phedo no soka ja Mambo, ecipurukira zvaainanga.
40 Ngo divi rimweni, Marita waikangaijika ngo kumunasiririra zviro zvakawanda. Ngo kudaro, iyena wakaviya kuna Jesu, womuvhunja kuti: “Mambo, ngenyi munoregera Mariya ecindisiya ndecishanda ndega? Muvhunjenyi kuti aviye kuzondibesa.”
41 Mambo wakamudavira kuti: “Marita, Marita uri kuthimwa-thimwa maningi ngo zviro zvakawanda.
42 Asipi zviro zvakawanda maningi zvinodika. Pikija ciro cimwe cinokwana. Mariya wasana divi rakanaka. Divi iri aazoritorehwi.”
Masoko o Pasi
^ Kana: “mucacungamija ari wese mecimukumbatira.”
^ Gama ngo Gama: “Haidhesi.”
^ Zvinyavada.
^ Vonanyi Kudurujihwa ko Magama.
^ Gama ngo Gama: “waiterera ecivha ku.”
^ Zingwenjere ro Ciroma rairema mutengo wo 3,85g, raidanijwa kuti dhenariyo.
