Ruka 11:1-54
11 Jesu wainga ku ndau imweni eciita mukumbiro, paakapeja kuita mukumbiro, umwe wo vajiji vake wakamuvhunja kudari: “Mambo, tijijisenyi kuita mukumbiro, inga Johani wakajijisavo vajiji vake.”
2 Ngo kudaro, iyena wakavavhunja kuti: “Pamunoita mukumbiro, nanganyi kuti: ‘Baba, zina renyu ngariceneswe. Umambo hwenyu ngahuviye.
3 Tipenyi zvokuha zvo njiku no njiku, mukuzwirana no zvatinoda pa njiku yondhoyo.
4 Tiregererenyi zvishaishi zvedu, ngokuti itusu tinoregereravo vandhu vese vanotishaishira. Mucatisiya teciwira mu muejo.’”
5 Jesu wakavavhunjazve kuti: “Ngatiti umwe wenyu anoshamwari yake, woenda kumuzi kwake pakati po usiku, womuvhunja kuti, ‘Shamwari, ndipevo pau ndhatu,
6 ngokuti ndagumihwa ngo shamwari yangu wari, inini andina cokuipa.’
7 Asi, shamwari iyi inodavira iri ngo mumba yeciti: ‘Ucandinyangaja. Musuvo wapera kufungwa; inini no vana vangu tapera kuvata. Andikwanisi kumuka kuti ndikupe ciri cese.’
8 Ndinomuvhunja kuti: Zvokadi iyena anozomuka woenda koipa ciri cese. Aamuki ngokuti ishamwari yake, asi anomuka ngo ndava yo kuvangirira kwayo.
9 Ngo kudaro, ndinomuvhunja kuti: Endereranyi mberi mecikumbira, munozopuwa; endereranyi mberi mecipsaka, munozowana; endereranyi mberi mecigogoja, munozofunungurihwa.
10 Ngokuti wese anokumbira anopuwa, wese anopsaka anowana, wese anogogoja, anozofunungurihwa.
11 Zvokadi, ndi baba vapi pakati penyu vangapekeja nyoka mwana, kuveni iyena wakumbira hove?
12 Kana kuti akavakumbira zanda, vanomupa cinyamuthwa?*
13 Nee imwimwi vashaishi, munopekeja zvakanaka vana venyu. Ngo kudaro, Baba vari kudenga vanozopekejavo mujimu mucena kuna vaya vanovakumbira.”
14 Tevere Jesu wakagogomera dhimoni raiitisa kuti mundhu umweni atame kuvereketa. Dhimoni parakagogomehwa mwanarume wiya wakakwanisa kuvereketa, mbungano yokahamara ndizvona.
15 Vamweni vavo vakati: “Iyena anogogomera madhimoni ngo zina ra Bherizebhu,* mutongi wo madhimoni.”
16 Vamweni, ngo kuda kumueja, vakamukumbira civoniso cinovha kudenga.
17 Jesu eciziva zvavairangarira, wakavavhunja kuti: “Umambo huri hwese hwakaparajana ngocaho, hunozopera. Ukama hunoparajana ngocahwo, hunozowa.
18 Mukufananavo, kudari Sathana akaparajana pacake, umambo hwake hunozocijikirisa kudini? Imwimwi munonanga kuti inini ndinogogomera madhimoni ngo zina ra Bherizebhu.*
19 Asi kudari inini ndecigogomera madhimoni ngo zina ra Bherizebhu,* vana venyu vanogogomera ngo zina raani? Ngo zvinozoitisa kuti ivona vaite vatongi venyu.
20 Asi, kudari ndecigogomera madhimoni ngo cikunwe ca Mwari, Umambo hwa Mwari hwaguma kwamuri.
21 Mundhu wakavanga wosimira zvijito, paanongwarira nyumba yake, zviro zvake zvinogara zvakangwaririka.
22 Asi, mundhu wakavanga kupinda iyena paanoviya kuzohwisana naye, womunyisa, anomutorera zvijito zvake zvaanothemba, wokovanisa zviro zvaamutoreraro.
23 Wiya aciripi na inini, anohwisana na inini, wiya acikaunganiji vandhu na inini, anovagogomera.
24 “Mujimu wakashata paunobuda pa mundhu, unopinda ngo mu ndau jicina kumwa wecipsaka pandau yokuzororera, pasure po kutama kupawana, unoti: ‘Ndinozohwirira kanyi kwangu kwandakavha.’
25 Paunoguma, nyumba iya inonga yakapsaihwa no kurongwa ushoni.
26 Iwona unoenda kotora mujimu munomwe imweni yakashata maningi kupinda iwona, painonghwina mu nyumba iyi, mujimu iya inogaremo. Ngo kudaro, magariro o kupejisira o mundhu uwo, anozoshata maningi kupinda o kutanga.”
27 Paainga acananga zviro izvi, mwanakaji umweni wainga pakati po mbungano, wakamima ngo izwi guru, eciti: “Inodakara ndani yakakubara no mazamu akakumwisa!”
28 Jesu wakati: “Andizvopi, vanodakara nga vaya vanozwa soko ra Mwari no kuita zvarinonanga!”
29 Mbungano payaibatana, Jesu wakatanga kunanga kuti: “Mubarihwana uwu, mubarihwana wakashata; iwona unopsaka citatijo, asi akuna citatijo caunopuwa kuciripi citatijo ca Jona.
30 Kudari inga ndi Jona wainga citatijo ku Vaninivhe, Mwana wo mundhu anozovavo citatijo ku mubarihwana uwu.
31 Vahosi vo kakusi vanozomuswa pamwepo no vandhu vo mubarihwana uwu pa njiku yo kutongwa, vovapa ndava, ngokuti vakavha ku magumo o nyika, voviya kuzozwa ungwaru hwa Soromona. Asi mundhu mukuru anopinda Soromona ari pano.
32 Vaninivhe vanozomukira mubarihwana uwu pa njiku yo kutongwa, voupa ndava, ngokuti ivona vakatendeuka ngo pamusoro po masoko akacumaera Jona. Asi mundhu mukuru anopinda Jona ari pano.
33 Pasure po kubwakija cibani,* mundhu aacidiri pa ndau yakafisika. Aacidumaiji ngo citengu, asi anocidira panyezuru po meza, kuti vese vanonghwina mumba vavhenekehwe.
34 Ruvheneko hwo muviri, ijiso rako. Kudari jiso rako rakanaka,* muviri wako wese unozovhenekehwavo; asi parinova rakashata, muviri wako unocidima.
35 Asi ngwariranyi kuti ruvheneko hwamunahwo, hutame kuita cidima.
36 Kudari muviri wako wakavhenekehwa, pacina divi riri mu cidima, muviri wese unozovhenekehwa inga cibani* cinovheneka ngo kubwaka kwaco.”
37 Paakapera kunanga izvi, Mufarisi umweni wakamukumbira kuti ahe naye. Iyena wakanghwina wogara pa meza.
38 Asi Mufarisi wiya wakakahamara ngo kumuvona kuti aazivi kusamba* nyara acito akaha.
39 Asi Mambo wakamuvhunja kuti: “Munonyathwa imwimwi Vafarisi, ngokuti munosuka kunja ko kopo no paratu, asi mukati mo mwoyo jenyu makazara ngo svina no kuita zvakashata.
40 Imwi mapenji! Andizvopi here kuti wakaita kunja ndiyena wakaitavo mukati?
41 Ipanyi zvipo zvo kubesera varombo,* zviro izvi ngazvivhe mukati, ngo kudaro, zviro zvenyu zvese zvinozoceneswa.
42 “Munonyathwa imwimwi Vafarisi, ngokuti munopa cogumi co masakani o minti, muringa* no mukhaindi jimweni jo masakani. Asi munosiya ururami no rudo hwa Mwari! Zviro izvi ngo zvamaidikana kuita mucikasiyi zviro zvimweni.
43 Munonyathwa imwimwi Vafarisi, ngokuti munoda zvigaro zvo kumbeji* mu masinagoga no kucungamijwa mu mabazari!
44 Munonyathwa imwimwi, ngokuti makaezana no makuva* ayani acikanasi kuvoneka,* vandhu vecifamba ngo panyezuru pawo, vacikazvizivi!”
45 Umwe wo vazivi vo Mutemo wakadavira Jesu kuti: “Mujijisi, ngo kunanga zviro izvi, muri kutitukavo.”
46 Jesu wakamudavira kuti: “Munonyathwavo imwimwi, vazivi vo Mutemo, ngokuti munopekeja vandhu mutoro unorema, asi imwimwi amupsasi mutorowo ngo cikunwe cenyu!
47 “Munonyathwavo imwimwi, ngokuti munovaka makuva* o vaporofeti, asi majicekuru enyu akavauraya!
48 Ngo kudaro, imwimwi muri zvapupu zvo zviito zvo majicekuru enyu. Imwimwi munozvitendera ngokuti ivona vakauraya vaporofeti, asi imwimwi muri kuvaka makuva avo.
49 Ngo ndava yazvo, ngo uzivi hwake, Mwari wakati: ‘Ndinozovatumira Vaporofeti no Vapostori. Ivona vanozouraya vamweni, voteverera vamweni,
50 kuti vandhu vo mubarihwana uwu vave no ndava yo ngazi yo vaporofeti vakafa kuvhira pa kutanga ko nyika,
51 kuvhira ku ngazi ya Abheri mbhera ku ngazi ya Zakariya wakauraihwaya pakati po artari no themberi.’ Zvokadi, ndinomuvhunja kuti ndava yo ngazi yavo inozowira ku mubarihwana uwu.
52 “Munonyathwa imwimwi vazivi vo Mutemo, ngo kuti munotorera vandhu mukana wokuti vave no zivo.* Imwimwi amunghwini, asi munophingaija vanoda kunghwina.”
53 Paakabuda pondhopo, vatari no Vafarisi vakatanga kumuvereketera maningi vecimuvhunjisa zviro zvakawanda,
54 vecimuteera murawu kuti vamubate ngo magama ake.
Masoko o Pasi
^ Cinyavada.
^ Zina rimweni ra Sathana.
^ Zina rimweni ra Sathana.
^ Zina rimweni ra Sathana.
^ Cigabhu-gabhu.
^ Kana: “recivona.”
^ Cigabhu-gabhu.
^ Kana kuti: kusamba nyara ko mutango-mutango.
^ Kana: “cipo co usizi.”
^ Mu Cigiriki, ‘pe′ga·non.’ Muti unoshandiswa pa kurapa no kudihwa mu zvokuha.
^ Kana: “zvakanakisisa.”
^ Kana: “makuva anoceukijwa.”
^ Kana: “makuva acina citatijo.”
^ Kana: “makuva anoceukijwa.”
^ Gama ngo Gama: “munotorera vandhu shavhi yo zivo.”
