Ruka 14:1-35
14 Pa ciitiko cimweni, iyena wakaenda koha kumuzi ko umwe wo vakuru vo Vafarisi ngo Musabudu. Ivona vaimusotesesa.
2 Kumbeji kwake kwainga no mundhu wainga no ndhendha yo kuzvimba muviri.
3 Ngo kudaro, Jesu wakavhunjisa vazivi vo Mutemo no Vafarisi ava kuti: “Zvinotendehwa here kurapa ngo Musabudu kana kuti azvitendehwi?”
4 Asi ivona vakanyarara. Ngo kudaro, iyena wakamubata, womurapa no kumupindisa.
5 Perapo Jesu wakavavhunja kuti: “Ndiyani wenyu acikabudisi ngo kukasika mwana wake kana n’gombe yake ikawira mu mwimbo* ngo njiku yo Sabudu?”
6 Ivona avazivi kukwanisa kumudavira.
7 Jesu paakavona kuti vandhu vakakokwa vaijikhetera zvigaro zvinosisira maningi, iyena wakavaitira muezaniso, wovavhunja kuti:
8 “Paunokokwa ngo mundhu kuenda ku mabuso o mucadho, ucagara pa ndau inosisira maningi. Kangaije pakokwavo mundhu anoreremejwa maningi kupinda iwewe.
9 Perapo mundhu wamakokwaro ndiyena anozoviya wokuvhunja kuti: ‘Pekejai mundhu uwu ndau yakoyo.’ Iwewe unozoenda kogara pa ndau imweni wecipseruka.
10 Asi, paunokokwa endai kogara pa ndau yokupejisira, kuti paanozoviya wakukokaro, akuvhunje kuti: ‘Shamwari, endai pakanaka.’ Perapo unozoreremejwa pamberi po vakokwi doni vese.
11 Ngokuti mundhu wese anojikuja anozododokeswa, wiya anojidodokesa anozokujwa.”
12 Perapo wakavhunja mundhu wakamukokaya kuti: “Ukada kupa vandhu zvo kurarira kana zvo kusvusvura, ucadanija shamwari jako, hama jako, ukama hwako no vocigarisano vako vakakhupuka. Ngokuti ivona vangazokukokavo, zvoita inga vari kukupagari.
13 Asi paunokoka vandhu kuti vaviye ku mabuso, kokai varombo, zvigono, vanothobinya no mapofu;
14 iwewe unozodakara, ngokuti avana cavanozokupagari ndicona. Iwewe unozopagahwi pa kumuswa ko vandhu vakarurama.”
15 Mundhu umweni waingepo paakazvizwa, wakati kwaari: “Anodakara nga wiya anoha mu Umambo hwa Mwari.”
16 Jesu wakamuvhunja kuti: “Mwanarume umweni ecinasirira mabuso makuru okurarira, wakakoka vandhu vazinji.
17 Payakaguma nguva yokuha, iyena wakatuma muranda wake kuti aende kovhunja vakokwi kuti: ‘Viyanyi, ngokuti zviro zvese zvapera kunasirihwa.’
18 Asi vese vakatanga kuramba. Wokutanga wakananga kuti: ‘Ndatenga munda wangu, ndinodikana kuti ndiyende kouvona; andikukwanisi.’
19 Umweni wakati: ‘Ndatenga gumi ro n’gombe jo kurima, ndiri kojieja; andikukwanisi.’
20 Umwenizve wakati: ‘Ndavha kucadha wari, ngo kudaro, andikwanisi kuzeyo.’
21 Muranda wiya wakaviya, wozvivhunja patarau wake. Patarau wake wakanyangajwa, wovhunja muranda wake kuti: ‘Endai ngo kukasika mu zvitaka zvikuru no muzvimakwanja zvo mudhorobha, viisai kuno varombo, zvigono, vanothobinya no mapofu.’
22 Muranda wiya paakaviya, wakati: ‘Patarau, zvamanangaya zvaithwa, asi jicindoripo ndau jimweni.’
23 Patarau wiya wakavhunja muranda kuti: ‘Endai ku zvitaka no makwanja, vavangirijei vaviye, kuti nyumba yangu izare.
24 Ngokuti ndinomuvhunja kuti, apana na umwe hake wo vakakokwa anozoravira mabuso angu.’”
25 Vandhu vazinji vainga vecifamba naye, iyena wakasota sure wovavhunja kuti:
26 “Kudari mundhu akaviya kondiri, wotama kunyenya baba wake, mai wake, mukaji wake, vana vake, hama jake no hambzaji jake, kubatanijavo no upenyu hwake, aakwanisi kuva mujiji wangu.
27 Wiya acikathwari mutanda wake wokutambujikira* wonditevera, aakwanisi kuva mujiji wangu.
28 Inga muezaniso, ndiyani wenyu ecida kuvaka nyumba,* aagari pasi kuti averenge mare yake kuti avone dangani, ano mare inokwana kuipeja?
29 Akatama kuita kudaro, angatanga kuivaka, wokonehwa kuipeja. Vese vanozvivona vanozotanga kumuseka,
30 veciti: ‘Mundhu uwu wakatanga kuvaka nyumba, asi wakonehwa kuipeja.’
31 Kana ndi mambo wapi anoenda kohwisana na mambo umweni acikatangi kugara pasi kuti avone dangani anokwanisa kohwisana ano gumi ro zviuru* zvo masoca, na wiya anoviya kwaari ano makumaviri o zviuru* zvo masoca?
32 Kudari acikakwanisi, mambo umweni aciri ndhambo, iyena anotuma ndhumwa, iyende kokumbira kuti vazwirane.
33 Ngo maitiro ondhowo, kudari umwe wenyu akatama kusiya zvese zvaanazvo, aazovi muteveri wangu.
34 “Zvokadi, munyu wakanaka. Kudari munyu ukatama kuvava, icinyi cinozoita kuti uvavezve?*
35 Auzoshandi ciro nee ku mavhu, nee auzoitisi ndimo. Vandhu vanozousveja. Ano njeve jo kuzwa, ngaazwe.”
Masoko o Pasi
^ Kana: “dima.”
^ Vonanyi Kudurujihwa ko Magama.
^ Gama ngo Gama: “rusingo.”
^ 10.000.
^ 20.000.
^ Kana: “ujamunyezve.”
