Ruka 15:1-32
15 Vashabisi vese no vashaishi vaiungana vecimutendeneja kuti vazwe zvaainanga.
2 Vafarisi no vatari vaindon’gun’guta veciti: “Mundhu uwu anoashira vashaishi ecitoha navo.”
3 Perepo, wakavavhunja muezaniso uwu:
4 “Ngatiti mundhu umweni ano zana* ro mavhuta. Kudari rikasvejeka rimwe, aacaizoregerepi makumapfumbamwe na mapfumbamwe mu bani kuti aende kopsaka rasvejekaya mbhera kuriwana?
5 Akambhera ngo kuriwana, anoripingata pa mapfuji, wodakara.
6 Akaguma kumuzi, anodanija shamwari jake no vocigarisano, wovavhunja kuti: ‘Dakaranyi na inini ngokuti vhuta rangu rainga rakasvejeka, ndariwana.’
7 Ndinomuvhunja kuti, ngo njira yondhoyo, kudenga kunozova no mudakaro wakakura ngo ndava yo mushaishi anokhauya, kupinda makumapfumbamwe na vapfumbamwe o vandhu vakarurama vacikadikani kukhauya.
8 “Kana kuti mwanakaji wapi ano gumi ro madhrakima,* kudari akasvejekehwa nga rimwe rawo, acingabwakiji cibani,* wopsaira ecinasa kusotesesa mbhera koriwana?
9 Akambhera ngo kuriwana, anodanija shamwari jake no vocigarisano, wovavhunja kuti: ‘Dakaranyi na inini ngokuti ndariwana dhrakima* raingaya rasvejeka.’
10 Ndinomuvhunja kuti, ngo njira yondhoyo, ngirozi ja Mwari jinodakara maningi ngo ndava yo kukhauya ko mushaishi umwe.”
11 Perapo wakati: “Mundhu umweni wainga no vana vaviri.
12 Wo mudoko, wakavhunja babake kuti: ‘Baba ndipenyi divi ro utaka hwangu.’ Ivona vakakovanisa vana vavo zviro zvavainga nazvo.
13 Pa njiku nganani jakatevera, mwana wo mudoko wakarongeja zviro zvake zvese woenda ndhambo, ku nyika yo kunja. Kondhono iyena wakapera kumosha zviro zvese zvaainga nazvo ngo kuva no upenyu hwakashata.
14 Paainga apeja zviro zvese, kwakabuda njara huru mu nyika yese yaaingaro, iyena wakatanga kutambujika ngo njara.
15 Iyena wakaguma pa kukumbira basa ku mwanarume umweni waigara mu nyikemo. Mwanarume uwu wakamutumira kongwarira nghumba kumaminda ake.
16 Iyena waida kuguta ngo mucero waihiwa ngo nghumba, asi apana waimupa ciro.
17 “Paakazotanga kunasa kurangarira, wakati: ‘Vashandi vangana va babangu vanoha pau jakawanda jecisara, kuveni inini ndiri kufa ngo njara kuno?
18 Ndiregerenyi ndihwirire kuna baba wangu, ndiende kovavhunja kuti: “Baba, ndakashaishira Mwari* na imwimwi.
19 Andifaneri kudanijwa mwana wenyu. Ndivonenyi inga ndiri umwe wo vashandiri venyu.”’
20 Iyena wakabata gwanja woenda kuna baba wake. Paainga aciri ndhambo, baba wake vakamuvona vomuzwira pena, vogogoma kwenda komutandamija, vakamukumbatira, vomubhejhari kamare.
21 Mwana wakavavhunja kuti, ‘Baba, ndakashaishira Mwari* na imwimwi. Andifaneri kudanijwa mwana wenyu.’
22 Asi baba vakavhunja varanda vavo kuti: ‘Kasikanyi! viisanyi nguvo yakareba yoseja, mumusimije. Musimijenyizve mbhete pa cikunwe no magwada mu soka jake.
23 Perepo, viisanyi cimwana co n’gombe* cakanuna, muciuraye, ticihe teciita mabuso,
24 ngokuti mwana wangu uwu wainga wafa, asi wari wamuka mukupona; wainga asvejeka, asi wari wawanika.’ Ivona vakatanga mabuso.
25 “Mwana wokutanga wainga ku maminda, asi paainga eciviya ecikhwedera pamuzi, wakazwa kuimba no kutamba.
26 Wakadanija mushandi, womuvhunjisa zvainga zveciitika.
27 Mushandi wakati kwaari: ‘Munukuna wako waviya. Babako vauraya mwana wo n’gombe* wakanuna ngokuti munukuna wako waviya ano uhomi hwakanaka.’
28 Asi iyena wakanyangajwa, woramba kunghwina. Babake vakabuda votanga kumudeketerera kuti anghwine.
29 Iyena wakadavira babake kuti: ‘Ndakamushandira ko makore akawanda ndecimuzwira nguva jese, asi amuzivi kumbondiurairavo cimbuji kuti ndibuse no shamwari jangu.
30 Asi ngo kuguma ko mwana wenyu uwu wakamoshaya zviro zvenyu no mahure, imwimwi mamuuraira n’gombe yakanuna.’
31 Baba vaya vakati kwaari: ‘Mwanangu, nguva jese iwewe wainga na inini. Zviro zvese zvandinazvo ngozvako.
32 Asi itusu taida hedu kubusa no kudakara, ngokuti munukuna wako wainga akafa asi wari woraramazve; wainga asvejeka asi wawanika.’”
Masoko o Pasi
^ 100.
^ Dhrakima yainga mare yo sirivha yaishandiswa ngo Vagiriki.
^ Cigabhu-gabhu.
^ Dhrakima yainga mare yo sirivha yaishandiswa ngo Vagiriki.
^ Gama ngo Gama: “kudenga.”
^ Gama ngo Gama: “kudenga.”
^ Thoyo; buru.
^ Thoyo; buru.
