Ruka 17:1-37
17 Perapo wakavhunja vajiji vake kuti: “Zvikhugu atingazvipeji. Asi inyathwa kwa wiya anoviisa zvikhugu!
2 Zvainga zviri nane kwaari kumusungira gwiyo mu musipa mwake, perepo wondondomejwa mu jombe kuti atame kukhugunya umwe wo vana vadoko ava.
3 Jingwarirei. Kudari hama yako ikakushaishira, ipangirei, kudari ikakhauya, iregererei.
4 Pikija ikakushaishira runomwe pa njiku, yeciviya kwauri yeciti: ‘Ndiregererei,’ unodikana kuiregerera.”
5 Vapostori vakavhunja Mambo kuti: “Engejeranyi rutendo hwedu.”
6 Tevere, Mambo wakati: “Kudari nomainga no rutendo hwakakura inga mucece wo* mostardha, maizovhunja mushongo uwu kuti: ‘Jivhitei,* uende kojisima mujombe!’ iwona waizomuzwira.
7 “Ndiyani pakati penyu anovhunja muranda wake anonga avha korima kana kohavisa zvipfuyo kuti: ‘Viyai pa meza ngo kukasika kuti tihe’?
8 Asi iyena anomuvhunja kuti: ‘Cinjai nguvo, undinasirire zvo kuha perapo undiperekerere zvandinoda mbhera ndipere kuha no kumwira. Iwewe unozohavo no kumwira ndikapeja.’
9 Kunanga kuti iyena angabonga muranda ngokuti waita zvaakagajwa kuti aite here?
10 Ngo njira yondhoyo, pamunopera kuita zviro zvamakagajwa kuita, nanganyi kuti: ‘Tiri varanda vacikashandi. Taita zvataidikana kuita.’”
11 Paaienda Jerusarema, wakakhirira ngo pakati po Samariya no Garireya.
12 Paainghwina mu mutundhu umweni, gumi ro vandhu vainga no mapere vakamutandamija, asi vakaima ngo ndhambo.
13 Vakadanijira veciti: “Jesu, Mujijisi, tiitirenyivo usizi!”
14 Paakavavona, wakati kwavari: “Endanyi kojitatija ku mupiri.” Pavainga vecienda, mapere avo akarapika.
15 Umwe wavo, paakajivona kuti warapika, wakahwirira ecikuja Mwari ngo izwi guru.
16 Wakagwadama pamberi po soka ja Jesu ecimubonga. Iyena wainga Musamariya.
17 Jesu wakamuvhunjisa kuti: “Avazivi kurapwa gumi weya? Waro vapfumbamwe vamweni vari kwapi?
18 Akuna na umwezve wakaviya kuzokuja Mwari. Asi mwanarume uwu ega wo jinja rimweni ndiyena waviya basi.”
19 Perapo wakamuvhunja kuti: “Mukai upinde; rutendo hwako hwakuponesa.”
20 Vafarisi vakamuvhunjisa kuti Umambo hwa Mwari hunoviya rini, iyena wakavadavira kuti: “Umambo hwa Mwari ahuzoviyi ngo njira inonasa kuvoneka;
21 nee vandhu avazonangi kuti: ‘Vonanyi, huri kuno!’ kana kuti: ‘Huri inoo!’ Asi Umambo hwa Mwari huri pakati penyu.”
22 Iyena wakavhunja vajiji kuti: “Unozoguma mukuvo wamunozoda kuvona njiku yo Mwana wo mundhu, asi amuzoivoni.
23 Vandhu vanozomuvhunja kuti: Vonanyi, ari inoo!’ kana kuti: ‘Ari kuno!’ Mucaendeyo kana kuvatevera.
24 Kudari inga kurazva ko mbheni kunovheneka kuvha ku divi rimweni ro kudenga mbhera ku divi rimweni ro kudenga, ndizvona zvondhozvo zvinozoita Mwana wo mundhu pa njiku yake.
25 Asi pakutanga, anodikana kutambujika maningi* no kurambiwa ngo mubarihwana uwu.
26 Inga zvakaitika mu njiku ja Nowa, ngo zvinozoitikazve mu njiku jo Mwana wo mundhu.
27 Vandhu vaiha no kumwa, vanarume vairovora, vanakaji vairovohwa mbhera pa njiku Nowa yaakanghwina mu piketi,* ndambi huru yakaviya youraya vandhu vese.
28 Ndizvonavo zvondhozvo zvakaitika mu njiku ja Roti: Vandhu vaiha, vaimwa, vaitenga, vaitengesa, vaisima no kuvaka nyumba.
29 Asi, pa njiku Roti yaakabuda mu Sodhoma, kudenga kwakana muriro no enshofre,* zvouraya vandhu vese.
30 Ndizvona zvinozoitika pa njiku inozovoneswa Mwana wo mundhu.
31 “Mu njikuyo, mundhu ari pa denga aadikani kuderuka* kuti aende kootora zviro zvake zviri mumba. Mukufananavo, mundhu ari kumaminda aadikani kuhwirira kumuzi kuti aende kootora zviro zvake.
32 Ceukijanyi mukaji wa Roti.
33 Wiya anopsaka kuponesa upenyu hwake, anozohuruza. Asi wiya anoruza upenyu hwake, anozohuponesa.
34 Ndinomuvhunja kuti, vandhu vaviri vanozova pa bonde rondhoro; umwe anozotohwa, asi umweni anozosiiwa.
35 Vanakaji vaviri vanozokwiya ngo gwiyo rondhoro; umwe anozotohwa, asi umweni anozosiiwa.”
36 *—-—
37 Ivona vakamudavira kuti: “Mambo, zvinozoitikira kwapi?” Iyena wakavadavira kuti: “Pano mutembo, ndipona panozoungana hokotora.”
Masoko o Pasi
^ Kana: “inga mbhumbha yo.”
^ Kana: “bzurikai.”
^ Gama ngo Gama: “ngo matambujiko akawanda.”
^ Kana: “arka.”
^ Gama rokuti enshofre, rinonangira mukhaindi umweni wo mapuwe anobwaka.
^ Kana: “kubzuka.”
^ Vonanyi masoko o pasi ari pana Mateu 17:21.
