Ruka 18:1-43
18 Perapo wakavaitira muezaniso unovonesa kuti vanodikana kuita mukumbiro mukuvo wese vacikarembi,
2 eciti: “Mudhorobha rimweni mainga muno mutongi wainga acikathyi Mwari, nee aacaireremejepizve vandhu.
3 Mudhorobha mondhomo maingazve muno noni yaindoenda ku mutongi uwu, yecimuvhunja kuti: ‘Nditongerenyi ndava yangu no muvengi wangu.’
4 Ngo kudaro, mutongi uwu wainga acikadi kumutongera ndava yake, asi iyena wakajivhunja kuti: ‘Pikija ndicikathyi Mwari, nee anditoreremejizve mundhu ari wese,
5 zvecivoneka kuti noni iyi iri kundondinyangaja, ndinoenda koitongera ndava yayo kuti itame kuviyazve kuzondinesa yecindiphandisa musoro.’”
6 Mambo wakati: “Mazwa zvananga mutongi uwu pikija ari mundhu wakashata?
7 Waro, Mwari aazotongi ngo njira yakarurama ku vasanwi vake vanokhuwa kwaari usiku no masikati paanonga ecisengerera kwavari?
8 Ndinomuvhunja kuti iyena anozoita kuti vaitihwe ururami ngo kukasika. Ngo kudaro, Mwana wo mundhu paanozoviya anozokhanda kamare rutendo hwakadari pa nyika?”
9 Iyena wakaitirazve muezaniso ku vandhu vamweni vaijivona inga vakarurama kupinda vamweni, vecivavona inga vacikasisiri, eciti:
10 “Vandhu vaviri vakaenda ku themberi koita mukumbiro, umwe wainga Mufarisi, umweni wainga mushabisi.
11 Mufarisi wakaima wotanga kukumbira eciti: ‘Mwari wangu, ndinomubonga ngokuti andizivi kuezana no vandhu vamweni vakadari inga: Mbavha, vacizivi kururama no hure. Ndakasiyana maningi no mushabisi uwu.
12 Ndinozira kaviri pa sumana; ndinopa cogumi co zvese zvandinowana.’
13 Asi mushabisi wainga akaima ngo ndhambo, nee aacaidepi kumusa musoro kuti asote kumatenga, asi waijitaka paditi eciti: ‘Mwari wangu, ndiitirenyivo usizi inini mushaishi.’
14 Inini ndinomuvhunja kuti: Mwanarume uwu wakaenda kanyi ari mundhu wakarurama kupinda Mufarisi. Ngokuti Mundhu wese anojikuja anozododokeswa, wiya anojidodokesa anozokujwa.”
15 Vandhu vaitora vana vavo vopanyara vecienda navo kuna Jesu kuti avapsase; asi vajiji vake pavakazvivona, vakatanga kuvakamisa.
16 Asi Jesu wakavadanija kuti vaviye, eciti: “Regeranyi vana vadoko vaze kondiri, mucavakamisa, ngokuti Umambo hwa Mwari ngo hwo vandhu vakadari inga ndivona.
17 Zvokadi ndinomuvhunja kuti, wiya acikaashiri Umambo hwa Mwari inga maashirire anoita mwana mudoko, aazonghwinimo.”
18 Mutongi umweni wakamuvhunjisa kuti: “Mujijisi Wakanaka, ngo zvapi zvandinodikana kuita kuti ndigare utaka hwo upenyu hucikaperi?”
19 Jesu wakamudavira kuti: “Uri kundidanijirenyi kuti Mujijisi Wakanaka? Akuna mundhu wakanaka. Wakanaka ndi Mwari basi.
20 Unoiziva mupango yokuti: ‘Ucaita upombo, ucauraya, ucaba, ucaita ucapupu hwo kunyepa, kujai baba na mai wako.’”
21 Iyena wakati: “Zvese izvi ndiri kuzviita kuvhira pa udoko hwangu.”
22 Naapera kuzwa izvi, Jesu wakamuvhunja kuti: “Kucino ciro cimwe casara kwauri: Endai, tengesai zvese zvaunazvo, utore mareyo uikovanise varombo, ukadaro, unozova no upfumi kumatenga. Ukapeja, viyai uite muteveri wangu.”
23 Paakazwa izvi, iyena wakacamwa maningi, ngokuti wainga akakhupuka maningi.
24 Jesu wakamusota wonanga kuti: “Zvinonesa maningi kuti vandhu vano mare vanghwine mu Umambo hwa Mwari.
25 Zvakareruka kuti kamera inghwine ngo pacibovo co njingano, kuciripi mukhupuki kunghwina mu Umambo hwa Mwari.”
26 Vaya vaizvizwa vakati: “Waro ndiyani angazoponeswa?”
27 Iyena wakati: “Zviro zvicikakwanisiki ku vandhu, kuna Mwari zvinokwanisika.”
28 Asi Pedhru wakati: “Vonanyi! Itusu takasiya zviro zvatainga nazvo, tomutevera.”
29 Iyena wakavavhunja kuti: “Ndinomuvhunja zvokadi kuti, mundhu wese wakasiya nyumba, mukaji, hama, mai na baba kana vana ngo ndava yo Umambo hwa Mwari,
30 anozowana zvakawanda maningi mu mukuvo uno. Iyena anozowanazve upenyu hucikaperi pa nguva inozari.”
31 Jesu wakadanija Gumi na Vaviri pamutivi wovavhunja kuti: “Vonanyi! Tiri kuenda Jerusarema. Zviro zvese zvakatahwa ngo vaporofeti ngo pamusoro po Mwana wo mundhu, zvinozokwanirisika.
32 Inga muezaniso, iyena anozopuwa munyara jo vandhu vomajinja, ivona vanozomushora, kumushupha no kumupfirira mata.
33 Pasure po kumutaka, vanozomuuraya, asi anozomuswa pa njiku yocitatu.”
34 Asi ivona avazivi kubata ciri cese pa masoko aya ngokuti masoko ese aya ainga akafisika kwavari. Avazivi kuzwisisa zvainangwaro.
35 Jesu paaikwedera ku Jeriko, mundhu umweni wainga bofu waigara mu mbhiripiri mo gwanja ecipembha.
36 Zvecivoneka kuti iyena wakazwa mutungwa wo vandhu wecipinda ngo pagwanjepo, wakavhunjisa zvainga zveciitika.
37 Ivona vakamuvhunja kuti: “Ndi Jesu wo Nazareta ari kupindaro!”
38 Naazvizwa, wakakhuwa eciti: “Jesu, Mwana wa Dhavhidhi, ndiitirevo usizi!”
39 Vandhu vainga kumbeji vakatanga kumukamisa, vecimuvhunja kuti anyarare, asi iyena waiengejera kukhuwa, eciti: “Mwana wa Dhavhidhi, ndiitirevo usizi!”
40 Jesu wakaima, wotuma vandhu kuti vaende komudanija. Paakaviya, Jesu wakamuvhunjisa kuti:
41 “Unoda kuti ndikuitirenyi?” Iyena wakati: “Mambo, ndirapenyi meso angu.”
42 Ngo kudaro, Jesu wakamuvhunja kuti: “Meso ako ngaavange; rutendo hwako hwakuponesa.”
43 Kuvhira pondhopo, iyena wakatanga kuvona, womutevera ecikuja Mwari. Vandhu vese pavakazvivona, vakakujavo Mwari.
