Ruka 19:1-48
19 Jesu wakanghwina mu Jeriko, ecikhirira ngo mudhorobhemo.
2 Mwanarume umweni waidanijwa Zakeu wainga mondhomo; wainga mutungamiriri wo vashabisi. Iyena wainga ari mukhupuki.
3 Asi waipsaka kuvona Jesu, asi aacaikwanisa kumuvona ngo ndava yo mbungano, ngokuti wainga akafupika.
4 Ngo kudaro, wakagogoma ecienda kumbeji, wokhwira mu mukhowani kuti amuvone, ngokuti waida kupinda ndipona.
5 Jesu paakaguma pa ndau yondhoyo wakasota mudenga, womuvhunja kuti: “Zakeu, bzukai ngo kukasika ngokuti nyamasi ndiri kuda kuenda kumuzi kwako.”
6 Iyena wakabzuka ngo kukasika, womuashira ngo mudakaro wese.
7 Vandhu vese pavakazvivona, vakatanga kun’gun’guta veciti: “Iyena anoenda kogara pamuzi po mushaishi.”
8 Asi Zakeu wakamuka wovhunja Mambo kuti: “Mambo, vonanyi, ndinozopa varombo bindikati ro zviro zvandinazvo. Ciri cese candakatorera mundhu ngo kumunyepera, ndinomuhwirijira zvakapetwa karongomuna.”
9 Jesu wakamuvhunja kuti: “Ruponeso hwaguma pa nyumba iyi nyamasi, iwewevo uri mwana wa Abhirahama.
10 Ngokuti Mwana wo mundhu wakaviya kuzopsaka no kuponesa vandhu vainga vakasvejeka.”
11 Pavainga vecizwa zviro izvi, iyena wakavaitirazve muezaniso umweni, ngokuti wainga ecikhwedera phedo no Jerusarema. Ivona vairangarira kuti Umambo hwa Mwari hwaizoviya pa nguva yondhoyo kamare.
12 Ngo kudaro, Jesu wakati: “Mwana wa mambo umweni, wakaenda ku nyika yo ndhambo kuti aende kogajwa umambo no kuviya.
13 Iyena wakadanija gumi ro vashandiri vake, wovapa gumi ro mamina,* ecivavhunja kuti: ‘Itanyi nyagoso ngo mare iyi mbhera ndiviye.’
14 Vandhu vo munyika yake vakamunyenya, votuma cikwata co ndhumwa kuti jimutevere, jeciti: ‘Mundhu uwu atimudi kuti aite mambo wedu.’
15 “Paakapera kugajwa umambo, iyena wakahwirira, wodanija vashandi vake vaakapaya mare, kuti azive mare yovakawana ngo nyagoso yovakaita.
16 Ngo kudaro, wokutanga wakaviya kwaari womuvhunja kuti: ‘Mambo, mina yenyu yabara gumi ro mamina.’
17 Iyena wakamuvhunja kuti: ‘Waita zvakanaka, mushandi waushoni! Ngokuti wagondeka pa zviro zvidoko. Tongai gumi ro madhorobha.’
18 Wocipiri wakaviya wonanga kuti: ‘Mambo, mina yenyu yabara mamina mashanu.’
19 Iyena wakamuvhunjavo kuti: ‘Iwewe tongaivo madhorobha mashanu.’
20 Umweni wakaviyavo, woti: ‘Mambo, nga iyi mina yenyu yandainga ndakasungira pa muceka.
21 Ndaimuthya ngokuti muri mundhu wakacunga, munotorera camucizivi kupa no kukotora camucizivi kusima.’
22 Iyena wakamudavira kuti: ‘Iwe muranda wakashata, ndinokutonga ngo masoko akowo kamare. Iwewe waizviziva here kuti ndiri mundhu wakacunga, anotorera caacizivi kupa no kukotora caacizivi kusima?
23 Ngenyi auzivi kuviga mare yangu ku ndau inovigwa mare, kuti pakuviya kwangu, ndiashire mare yangu yawanda.’
24 “Iyena wakavhunja vandhu vaingepo kuti: ‘Mutorerenyi mineyo, muipe wiya ano gumi ro mamina.’
25 Ivona vakamuvhunja kuti: ‘Mambo, iyena waano gumi ro mamina!’—
26 ‘Inini ndinomuvhunja kuti, wiya anazvo anozopuwa zvizinji, asi wiya acina, anozotorehwavo no zvishoma zvaanazvo waro.
27 Kusiyapo izvo, viisanyi kuno vavengi vangu ava, vakarambaya kuti ndiite mambo wavo, muvauraye pambeji pangu.’”
28 Paakapera kunanga zviro izvi, wakatungamira ecienda Jerusarema.
29 Jesu paaikhwedera Bhetifajhe no Bhetaniya pa Dundhu rinodanijwa kuti Maorivhe, wakatuma vajiji vake vaviri,
30 eciti: “Endanyi mu mutundhu wamuri kuvonaro uwoo, mukanghwinemo, munozowana cimwana co mbongoyo cakasungihwa, cicizivi kumbopakihwa ngo mundhu. Cisujunurenyi, muciviise kuno.
31 Kudari ari wese akamuvhunjisa kuti: ‘Muri kucisujunurirenyi?’ muvhunjenyi kudari: ‘Mambo ari kucida.’”
32 Ngo kudaro, vakatumwaya vakapinda, vokhanda inga zvavakavhunjwa.
33 Asi pavainga vecisujunura cimbongoyo ciya, veno vaco vakavavhunjisa kuti: “Muri kusujunurirenyi cimbongoyoco?”
34 Ivona vakati: “Mambo ari kucida.”
35 Ivona vakacitora, voenda naco kuna Jesu, ivona vakadira nguvo javo panyezuru paco, Jesu wocipakira.
36 Paainga ecifamba, ivona vaiwaja nguvo javo mugwanja.
37 Paakandokhwedera pa gwanja rinoenda ku Dundhu ro Maorivhe, mbungano yese yo vajiji vake yakatanga kudakara no kusimba Mwari ngo izwi guru ngo ndava yo mushamaiso yese yo vainga vavona,
38 veciti: “Komboreranyi wiya anoviya inga Mambo ngo zina ra Jehovha!* Kudenga ngakuve no runyararo. Ngaakujwe Mwari wo kudenga kumusoro-soro!”
39 Asi Vafarisi vamweni vainga pakati po mbungano, vakati kwaari: “Mujijisi, vhunjanyi vajiji venyu kuti vanyarare.”
40 Asi Jesu wakavadavira kuti: “Ndinomuvhunja kuti, kudari ava vakagara vakanyarara, mapuwe anozodanijira.”
41 Paaikhwedera phedo, wakavona dhorobha wocema* ngo pamusoro paro,
42 eciti: “Kudari iwewe, pikija iwewe, nowaiziva zviro zvinonanga runyararo nyamasi . . . Asi wari zvavigwa pa meso pako.
43 Ngokuti jinozoguma njiku, kuti vavengi vako vanozokutendeneja* ngo majiro akapinjira. Ivona vanozokupsinya mu mativi ese.
44 Ivona vanozokuwisa pasi pamwepo no vana vako. Mudhorobha iri, akuna buwe rinozosara riri panyezuru po buwe rimweni, ngokuti Mwari wakaviya kuzokutonga, asi iwewe auzivi kuzvizwisisa.
45 Perapo, iyena wakanghwina mu themberi, wotanga kugogomera vaitengesa,
46 ecivavhunja kuti: “Zvakatahwa kuti: ‘Nyumba yangu inozova nyumba yo mukumbiro,’ asi imwimwi muri kuiita nyumba yo mbavha.”
47 Iyena wakaenderera mberi ecijijisa mu themberi njiku jese. Asi vapiri vakuru, vatari no vatungamiriri vo vandhu vaipsaka kumuuraya;
48 asi ivona vakakonehwa njira yo kuzviita ndiyona, ngokuti vandhu vese vainasa kumupurukira.
Masoko o Pasi
^ Mina imwe yo Cigiriki yairema 340 g. Inonangwa kuti yaiezana no 100 ro mangwenjere ro madhrakima.
^ Vonanyi Kudurujihwa ko Magama.
^ Kana: “worira.”
^ Kana: “vanozokubiya.”
