Ruka 2:1-52
2 Mu njiku jondhojo, Sezari Augustu wakabudisa mutemo wainanga kuti vandhu vese vaidikana kwenda kotaririswa.
2 (Ndhariro yo kutanga iyi yakaitika Kirino paainga govhernadhori wo Siriya.)
3 Vandhu vese vakaenda kotaririswa. Umwe nga umwe waienda ku dhorobha raakabarihwa.
4 Josefa wakavhavo Garireya mu dhorobha ro Nazareta woenda Judheya ku dhorobha ra Dhavhidhi, rinodanijwa kuti Bheterehema, ngokuti iyena wainga umwe wo pamuzi pomwe no wo pambhuri ya Dhavhidhi.
5 Iyena wakaenda no mukaji wake Mariya kotaririsa, ari phedo no kubara.
6 Pavainga kondhoyo, wakaguma mukuvo wokuti iyena abare.
7 Iyena wakabara mwana worume, wo dangwe, wo mufukijira ngo nguvo perapo wo murajika munohira zvinyama, ngokuti kwainga kucina ndau yo kuti vagaremo.
8 Kwaingavo no vahavisi ku ndharaundha yondhoyo, vaigara kubani cousiku vecingwarira mushambi yavo.
9 Ngo civhumbu, ngirozi ya Jehovha* yakaima pambeji pavo, pakavoneka ruvheneko pavaingaro vakagara, hwecivonesa nduma ya Jehovha.* Ngo kudaro, ivona vakathya maningi.
10 Asi ngirozi yakavavhunja kuti: “Mucathya, ngokuti ndiri kumuzivisa masoko akanaka o mudakaro mukuru ku vandhu vese.
11 Ngokuti mabarihwa muponesi nyamasi mu dhorobha ra Dhavhidhi, anodanijwa kuti Kristu Mambo.
12 Citatijo cakona nga ici: Munozovona mwana wakafukijihwa ngo nguvo, worajikwa munohira zvinyama.”
13 Ngo civhumbu, ngirozi iya yainga yaano cikwata co ngirozi jimweni, jecisimba Mwari, jeciti:
14 “Ngaakujwe Mwari kumatenga, ngavagarisike pasi pano vandhu vanodiwa ndiyena.”
15 Ngirozi pajakahwirira kudenga, vahavisi vakatanga kuvhunjana ngocavo kuti: “Ngatende ku Bheterehema kovona zvaitika, zvotaziviswa ndi Jehovha.”*
16 Ivona vakaenda ngo kukasika, vowana Mariya, Josefa no mwana wakarajikwa munohira zvinyama.
17 Pavakazvivona, vakatanga kuvaverengera masoko ovakavhunjwa ngo pamusoro po mwana uwu.
18 Vese vakazvizwa vakakahamara ngo kuzwa zvainanga vahavisi,
19 asi Mariya wakatanga kuviga masoko ese aya, ecirangarira revo yawo mu mwoyo make.
20 Perapo, vahavisi vakahwirira vecikuja Mwari no kumusimba ngo zvese zvovakazwa no kuvona, inga zvavakavhunjwa.
21 Pasure po njiku sere, powakaguma mukuvo wokuti mwana asokwe, wakaduhwa zina rokuti Jesu, rakanangwaya ngo ngirozi mimba yake icito yaithwa.
22 Pawakaguma mukuvo wo kuceneswa mukuzwirana no Mutemo wa Mosi, ivona vakaenda naye Jerusarema pamberi pa Jehovha,* vecitatija kuti mwana uwu ngo wake,
23 inga zvakatahwa mu Mutemo wa Jehovha* kuti: “Dangwe rese rorume rinozova rakacena kuna Jehovha.”
24 Ivona vakaita mupiro mukuzwirana no zvinonangwa mu Mutemo wa Jehovha* kuti: “Magovora maviri kana zvinjiva zviviri.”
25 Mu Jerusarema mainga no mwanarume waidanijwa kuti Simiyoni, iyena wainga akarurama, waithya Mwari, ecivetera nguva yaizobesehwa Vaiziraeri ndi Mwari. Mujimu mucena wainga panyezuru pake.
26 Cimwenizve, iyena wainga akavoneswa ndi Mwari ecishandisa mujimu mucena, kuti aacaizofepi acito avona Kristu, Wakasanwa ndi Jehovha.*
27 Iyena wakanghwina mu themberi ecitungamirihwa ngo mujimu. Vabari va Jesu pavainghwina kuti vaite cirovejeso co Mutemo,
28 Simiyoni wakabata mwana munyara, wosimba Mwari eciti:
29 “Mambo Mukuru-kuru, muranda wenyu ngaacife hake mu runyararo, mukuzwirana no zvamakananga,
30 ngokuti majiso angu avona wiya anozoviisa ruponeso
31 hwamakanasirira kuti huvoneke ngo vandhu vese.
32 Ndiyena ruvheneko hunovhisa nguvo yaifukijira vo majinja no nduma yo vandhu venyu, Vaiziraeri.”
33 Baba na mai wo mwana vaindokahamara ngo zviro zvaibhuiwa ngo pamusoro pake.
34 Simiyoni wakavakomborera, wovhunja Mariya, mai wo mwana kuti: “Izwanyi! Mwana uwu anozoitisa kuti vandhu vazinji mu Iziraeri vawe no kumuka. Iyena anozova citatijo co kunangihwa zvakashata
35 (zvokadi banga rakareba rinozokupiningija), kuti murangariro iri mu mwoyo yo vazinji ibudiswe pambhene.”
36 Kwainga no muporofetikaji anozwi Ana, mwana wa Fanuweri wo vhumbo ra Azeri. Mwanakaji uwo wainga waaharahwa, iyena paakapera kucadha,* wakagara no mwamuna wake makore manomwe.
37 Iyena wainga noni ino makumasere o makore no makore marongomuna. Aacaishwa kuenda ku themberi, eciita basa rakacena usiku no masikati, ecizira no kuita mukumbiro jo kudeketera.
38 Iyena wakaguma phedo navo, wotanga kubonga Mwari no kubhuya ngo pamusoro po mwana ku vese vaivetera ruponeso hwo Jerusarema.
39 Pavakapera kuita zvese mukuzwirana no Mutemo wa Jehovha,* ivona vakahwirira Garireya, ku dhorobha ravo ro Nazareta.
40 Mwana uwu wakaenderera mberi ecikura no kuvanga, ecizara ngo uzivi. Unyasha hwa Mwari hwaienderera mberi huri panyezuru pake.
41 Vabari vake vainga no cirovejeso co kuenda ku Jerusarema ku mutambo wo Phasika makore ese.
42 Jesu paainga no gumi ro makore no makore maviri, ivona vakaenda mukuzwirana no cirovejeso co mutambo uwu.
43 Pajakapera njiku jo mutambo, ivona vakahwirira. Jesu wakasara ku Jerusarema, asi vabari vake vainga vacikazvizivi.
44 Vecirangarira kuti ari pakati po vandhu vaiitavo hwendo, ivona vakafamba mumango wo njiku imwe, perapo votanga kumupsanga pakati po ukama hwavo no vadoni vavo.
45 Povakatama kumuwana, wakahwirira ku Jerusarema, vomupsanga ushoni.
46 Pasure po njiku ndhatu, vakamuwanira mu themberi akagara pakati po vajijisi, ecivapurukira no kuvaiitira muvhunjo.
47 Vese vaimuzwa vaikahamara ngo kuzwisisa kwake no mupinguro jake.
48 Vabari vake pavakamuvona vakakahamara, mai wake vomuvhunja kuti: “Mwana wangu, zvicinyi zvawatiitirari? Inini na baba wako tatambujika ngo kukupsanga.”
49 Asi iyena wakavadavira kuti: “Maindipsangirenyi? Amucaizviziva kuti ndinodikana kugara pa nyumba ya Baba wangu?”
50 Asi ivona avacaizvibata zvaaivavhunjaro.
51 Iyena wakahwirira navo Nazareta, iyena wakaenderera mberi ecivazwira. Mai wake vaiviga masoko aya ese mu mwoyo mavo.
52 Jesu waikura mu uzivi no muviri wake, ecitendehwa ndi Mwari no vandhu.
Masoko o Pasi
^ Vonanyi Kudurujihwa ko Magama.
^ Vonanyi Kudurujihwa ko Magama.
^ Vonanyi Kudurujihwa ko Magama.
^ Vonanyi Kudurujihwa ko Magama.
^ Vonanyi Kudurujihwa ko Magama.
^ Vonanyi Kudurujihwa ko Magama.
^ Vonanyi Kudurujihwa ko Magama.
^ Gama ngo Gama: “kuvha mu umbhandwe hwake.”
^ Vonanyi Kudurujihwa ko Magama.
