Ruka 24:1-53
24 Pa njiku yokutanga yo sumana, vanakaji vaya vakaguma pa guva* comangwanani matete, veciviisa zvinonuhira zvavainga vakanasirira.
2 Asi vakakhanda buwe riya rakamburumbujwa kuvha pa guva,*
3 pavakanghwinemo, avazivi kuukhanda muviri wa Mambo Jesu.
4 Pavainga vecikaya-kaya ngo pamusoro pazvo, vakavona vanarume vaviri vainga vakaima ngo pamutivi pavo, vakasimira nguvo jinomonikira.
5 Vanakaji vakathya vosikimara, ngo kudaro, vanarume vaya vakavavhunjisa kuti: “Ngenyi muri kupsaka mundhu ari penye pakati po vandhu vakafa?
6 Iyena aapo pano, wamuswa. Mucakanganwa zvaakamuvhunja aciri ku Garireya,
7 kuti Mwana wo mundhu anodikana kupuwa mu nyara jo vashaishi no kuuraihwa pa mutanda, wozomuswa pa njiku yocitatu.”
8 Perapo vanakaji ava vakaceuja masoko ake,
9 ivona vakaviya vecivha ku guva,* vovhunja vapostori vake Gumi na Umwe zvese zvainga zvaitika.
10 Vanakaji ava vainga Mariya Madharena, Jhuwana na Mariya mai va Jakobo. Vanakaji vamwenivo vavainga navo vakanangavo zviro izvi ku vapostori.
11 Asi masoko aya aiita inga o upenji ku vapostori, ngokuti ivona avacaizvitendepi zvainangwari ngo vanakaji ava.
12 Asi Pedhru wakamuka, wogogoma ecienda ku guva,* woguma wokotama ecisota muguvemo asi wakavona nguvo basi. Ngo kudaro wakapinda, ofamba ecijivhunjisa kuti zvicinyi zvainga zvaitika.
13 Mu njiku yondhoyo kamare, vajiji vaviri vakaita hwendo vecienda ku mutundhu unozwi Emausi, pa mumango wo gumi na rimwe ro makiromita kuvha Jerusarema,
14 Ivona vaifamba vecibhuya ngo pamusoro po zviro zvaingari zvaitika.
15 Pavainga vecibhuisana ngo zviro izvi, Jesu wakakhwedera wotanga kufamba navo.
16 Ivona vakamuvona asi avazivi kukwanisa kumuziva.
17 Iyena wakati kwavari: “Zvicinyi zvamuri kufambari mecibhuya?” Ivona vakaima, vomusota vakacamwa.
18 Umwe wavo waidaninjwa Kreopa wakamudavira kuti: “Kunanga kuti iwewe uri munyikanja anogara ega ku Jerusarema, wotama kuziva zviro zvakaitikeyo mu mazuva ano?”
19 Jesu wakavavhunjisa kuti: “Kwakaitikenyi?” Ivona vakananga kuti: “Kuno zviro zvakaitika ngo pamusoro pa Jesu wo Nazareta, waingaya muporofeti anosimba mu zviito no masoko ake pamberi pa Mwari no po vandhu vese.
20 Vapiri vakuru no vatungamiriri vedu, vakamupira kuti atongehwe rufu, vomukohomera pa mutanda.
21 Asi itusu taivetera kuti mundhu uwu ndiyena waizoponesa Vaiziraeri. Kusiyapo zvese izvi, iyi yaanjiku yocitatu zviro izvi pazvakapera kuitika.
22 Cimwenizve, itusu tiri kukahamaravo ngo masoko anangwa ngo vanakaji vamweni, vajiji doni vedu. Ivona vaenda ku guva* mangwanani matete.
23 Pavatama kukhanda muviri wake, vaviya vecinanga kuti vavona civoniso co ngirozi, jonanga kuti iyena ari penye.
24 Ngo kudaro, vamweni vedu vaendavo ku guva* vokhanda inga zvaingaya zvanangwa ngo vanakaji, asi ivona avazivi kumuvonavo.”
25 Ngo kudaro, iyena wakavavhunja kuti: “Imwimwi muri vandhu vacikazwisisi no kunonoka kutenda zvakanangwa ngo vaporofeti.
26 Azvicaisisira kuti Kristu awanane no matambujiko aya, perapo wonghwina mu nduma yake here?”
27 Iyena wakavadurujira zviro zvese zvinonangwa mu Matahwa ngo pamusoro pake. Wakatanga ngo zvakatahwa ndi Mosi no vaporofeti vese.
28 Pejisire, vakaguma phedo no mutundhu wovaienda, Jesu wakaita inga kuti ari kuenda ndhambo.
29 Asi ivona vakamuvangirija kuti agare navo, veciti: “Garanyi na itusu ngokuti kunja kuri kuita usiku.” Ngo kudaro, iyena wakaenda kanyi kwavo.
30 Iyena paaiha navo, wakatora pau, woita mukumbiro, woigura-gura, perapo wotanga kuvapa.
31 Ivona vakazozwisisa kuti iyena ndiyani, vomuziva; asi iyena wakangara-ngara kwavari.
32 Ivona vakavhunjana ngocavo kuti: “Mwoyo yedu aicaibwakepi paaivereketaya na itusu mu gwanja, ecitidurujira Matahwa?”
33 Pa nguva yondhoyo, ivona vakamuka vohwirira Jerusarema, vokhanda vapostori Gumi na Umwe no vajiji vamweni vakaungana,
34 vecinanga kuti: “Mambo wamuswadi, iyena wabudira Simoni!”
35 Ivona vakazwiranisa zvakavaitikira mugwanja no mazivire avakamuita paakagura pau.
36 Pavainga vacabhuya zviro izvi, Jesu wakaima pakati pavo, wovavhunja kuti: “Ivanyi no runyararo.”
37 Ngokuti ivona vaithya no kutetemera, vakarangarira kuti vari kuvona cisikwa co kumujimu.
38 Ngo kudaro, iyena wakavavhunja kuti: “Muri kuneseka ngenyi? Ngenyi muri kukana-kana mu mwoyo jenyu?
39 Vonanyi nyara no murenje yangu. Ndini kamare! Ndibatenyi, muvone! Cisikwa co kumujimu acina muviri no maphondo inga zvandinazvo wari.”
40 Paainanga izvi, waivatatija nyara jake no murenje jake.
41 Asi pavainga vacikazvitendi ngo kudakara maningi no kukahamara, iyena wakavavhunja kuti: “Imwimwi muno cokuha ciri cese pano?”
42 Ngo kudaro, ivona vakamupa dimbu ro hove yakakocwa,
43 iyena wakaitora, woiha vecizvivona.
44 Perapo iyena wakati kwavari: “Aya ndiwona masoko angu andakamuvhunja pandainga ndiciri na imwimwi, kuti zviro zvese zvakatahwa ngo pamusoro pangu mu Mutemo wa Mosi, zvakatahwa ngo Vaporofeti no mubhuku ra Nduyo, zvinodikana kukwanirisika.”
45 Pondhopo, iyena wakazonasa kufunungura murangariro yavo kuti vanase kuzwisisa zvinonanga Matahwa,
46 wovavhunja kuti: “Matahwa anonanga kuti: Kristu anodikana kutambujika, wozomuswa ko vakafa pa njiku yocitatu.
47 Ngo ndava yo zina rake, ku majinja ese kwaizocumaehwa kukhauya ko kuregerera zvishaishi. Kutangira Jerusarema.
48 Imwimwi munozova zvapupu ngo pamusoro po zviro izvi.
49 Zivanyi kuti ndinozomutumira zvakagondeswa ndi Baba wangu. Imwimwi garanyi mudhorobha mbhera muashire simba rinovha kudenga.”
50 Iyena wakavabudisa kunja mbhera ku Bhetaniya, womusa nyara jake, perapo wovaitira mukumbiro kuti vakomborehwe.
51 Paainga ecivaitira mukumbiro kuti vakomborehwe, wakaparajaniswa na ivona, wotohwa kwenda kudenga.
52 Ivona vakagwadama pamberi pake, vohwirira Jerusarema vecidakara maningi.
53 Ivona vaigara mu themberi njiku jese, vecikuja Mwari.
Masoko o Pasi
^ Kana: “guva rinoceukijwa.”
^ Kana: “guva rinoceukijwa.”
^ Kana: “guva rinoceukijwa.”
^ Kana: “guva rinoceukijwa.”
^ Kana: “guva rinoceukijwa.”
^ Kana: “guva rinoceukijwa.”
