Ruka 4:1-44
4 Jesu naazara ngo mujimu mucena, wakabuda mu murambo wo Jordhani, iyena wakatungamirihwa ngo mujimu mucena kuti aende mu zvipare*
2 pa makumarongomuna o njiku, eciejwa ndi Dhiyabhu. Pa njiku jese iji, Jesu apana caakaha. Pa kupera ko njiku iji, iyena wakazwa njara.
3 Dhiyabhu wakamuvhunja kuti: “Kudari uri mwana wa Mwari, vhunjai buwe iri kuti ripinduke kuita pau.”
4 Asi Jesu wakamudavira kuti: “Zvakatahwa kuti: ‘Mundhu aadikani kupona ngo pau basi.’”
5 Ngo kudaro, wakaenda naye pa ndau yakakhwirira, womutatija umambo hwese hwo nyika pa mukuvo mushomani.
6 Perapo Dhiyabhu wakamuvhunja kuti: “Inini ndinozokupa umambo hwese uhu no nduma yaho, ngokuti inini ndakahupuwa. Ndinozohupavo wandinoda.
7 Kudari ukagwadama wondinamata kamwe basi, zvese izvi zvinozoita zvako.”
8 Jesu wakamudavira kuti: “Zvakatahwa kuti: ‘Ndi Jehovha* Mwari wako waunodikana kunamata, ndiyena basi waunodikana kuitira basa rakacena.’”
9 Perapo wakamuendesa ku Jerusarema, womudira pa ndau yakakhwira maningi yo themberi womuvhunja kuti: “Kudari uri mwana wa Mwari, jikhandirei pasi,
10 ngokuti zvakatahwa kuti: ‘Iyena anozotuma ngirozi ngo pamusoro pako, kuti jikungwarire,’
11 ‘ijona jinozokuhaka kuti soka jako jitame kutaka pa mapuwe.’”
12 Jesu wakamudavira kuti: “Zvakatahwazve kuti: ‘Ucadoeja Jehovha* Mwari wako.’”
13 Dhiyabhu paakapeja kuita muejo jese iji, wakapinda ecivetera mukuvo umweni wo kumuejazve.
14 Jesu wakahwirira ku Garireya wakazara ngo simba ro mujimu mucena. Masoko ngo pamusoro pake akazika mu mutundhuwo wese.
15 Iyena wakatangazve kujijisa mu masinagoga avo, ecikujwa ngo vandhu vese.
16 Tevere wakaenda ku Nazareta, kwaakakurira. Mukuzwirana no cirovejeso co njiku yo Sabudu, iyena wakanghwina mu sinagoga, woima kuti averenge Matahwa.
17 Ngo kudaro, Jesu wakapuwa muphukutu wo muporofeti Isaya. Iyena wakaufunungura, wowana ndau yaitahwa kuti:
18 “Mujimu wa Jehovha* una inini, ngokuti wakandizoja kuti ndizivise masoko akanaka ku varombo. Iyena wakandituma kuti nditokotese rusujunuko ku vasungwi, koita kuti meso o mapofu avone, kosujunura vandhu vari kutambujwa,
19 no kocumaera ngo pamusoro po nguva ya Jehovha,* yaanozoitira vandhu unyasha.”
20 Naapera kuverenga, wakapombera muphukutu wiya, wouhwirija ku mubeseri wo musinagoga, wogara pasi; vandhu vese mu sinagogemo vakamusotesesa.
21 Perapo wakatanga kuvavhunja kuti: “Matahwa amaperari kuzwa, akwanirisika nyamasi.”
22 ndhu vese vakatanga kumusimba no kukahamara ngo masoko anodakajisa aivha pa muromo pake, veciti: “Andiyepi mwana wa Josefa uwu?”
23 Iyena wakavavhunja kuti: “Pacina kukana-kana, imwimwi munozondivhunja* kuti: ‘Murapi jirapei. Zvese zvotakazwa kuti wakazviita mu Kafarnaume, zviitevo mu nyika yako ino.’”
24 Ngo kudaro, iyena wakati: “Ndinomuvhunja zvokadi kuti akuna muporofeti anoreremejwa mu ndharaundha yake.
25 Inga muezaniso, ndinomuvhunja zvokadi kuti: Ku Iziraeri, kwainga no noni jakawanda mu njiku ja Eriya. Pakava no mukuvo wokuti nvura aizivi kuna mukati mo makore matatu no mweji mutandhatu. Kwakaitika njara mu nyika yese.
26 Eriya aazivi kutumihwa ku umwe wo noni iji. Asi wakatumihwa ku noni yainga ku Zarefati mu nyika yo Sidhoni.
27 Mu Iziraeri maingazve no vandhu vakawanda vainga no mapere mu mukuvo wo muporofeti Erizeu; asi apana na umwe wakaraphwa. Wakaraphwa basi ndi Naamani wainga mu Siriya.”
28 Vese vakazwa zviro izvi mu sinagoga vakanyangajwa maningi,
29 ivona vakamuka voenda naye kunja ko dhorobha ngo kukasika, vomuendesa pa mbhiri po gomokomo ro dundhu rainga rakavakihwa dhorobha ravo, kuti vamusukumijire pasi.
30 Asi iyena wakanghwina ngo pakati pavo, wotobata gwanja wopinda.
31 Jesu wakaenda ku Kafarnaume, dhorobha ro Garireya. Iyena waivajijisa ngo Musabudu.
32 Ivona vakakahamara ngo majijisiro ake, ngokuti iyena waivereketa zvaivha kuna Mwari.
33 Mu sinagogemo mainga no mwanarume ano dhimoni; mujimu wakashata, ecikhuwa ngo izwi guru kuti:
34 “Haa! Tinenyi itusu na imwimwi, Jesu wo Nazareta? Maviya kuzotiparaja here? Ndinonasa kumuziva kuti ndimwi ani, imwimwi muri Wakacena wa Mwari.”
35 Asi Jesu wakarivhunja kuti: “Nyararai. Budai mu mundhu uwu.” Dhimoni riya rakamuburukutisa pasi pakati pavo, robuda ricizivi kumukhuvaza.
36 Ngo kudaro, vese vakakahamara votanga kuvhunjana kuti: “Mavereketere o mushovonyi aya? Iyena ano simba ro kugogomera mujimu yakashata, iyona yecitobuda!”
37 Masoko ngo pamusoro pake akazika ku mativi ese o ndharaundheyo.
38 Paakabuda mu sinagoga wakaenda kumuzi ka Simoni. Vambiya va Simoni, vainga vakavata ngokuti vaihwaja,* vokumbira Jesu kuti avabese.
39 Ngo kudaro, iyena wakavakhwederera wogogomera ndhendha yavo, iyona yopera. Pondhopo kamare vambiya va Simoni vakamuka votanga kuvashandira.
40 Zuva parakavira, vese vainga no vandhu vaihwaja ndhendha jakasiyana-siyana, vakaviisa vatenda vavo kwaari. Iyena waivarapa ngo kuvacanjikira nyara.
41 Madhimoni aibudavo mu vandhu vazinji, ecikhuwa kuti: “Imwimwi muri Mwana wa Mwari.” Asi iyena waimanyaraja acikamatenderi kuti averekete ngo pamusoro pake, ngo kuti iwona aimuziva kuti iyena ndi Kristu.
42 Ngo kudaro, kunja no kwaeja, iyena wakabuda woenda ku ndau yainga icina vandhu. Asi mbungano yakatanga kumupsaka mbhera ngo kumuwana. Ivona vakaeja kumurambisa kuti atame kupinda ovasiya.
43 Asi iyena wakati kwavari: “Ndinodikanavo kuzivisa masoko akanaka o Umambo hwa Mwari ku madhorobha amweni, ngokuti ndizvona zvondakatumihwa.”
44 Ngo kudaro, iyena wakaenda kocumaera ku masinagoga o Judheya.
Masoko o Pasi
^ Kana: “mapani.”
^ Vonanyi Kudurujihwa ko Magama.
^ Vonanyi Kudurujihwa ko Magama.
^ Vonanyi Kudurujihwa ko Magama.
^ Vonanyi Kudurujihwa ko Magama.
^ Gama ngo Gama: “imwimwi munozondishandisira magama aya.”
^ Gama ngo Gama: “ngokuti muviri wavo waipisa maningi.”
