Ruka 5:1-39
5 Pa mukuvo umweni Jesu wainga wakaima mumbhiripiri mo gandhwa ro Genezareti,* mbungano yaimutendeneja yecimupsinya ngo kuda kuzwa soko ra Mwari.
2 Iyena wakavona ngarava mbiri jakaceva mu mbhiripiri mo gandhwa, asi vatandi vainga vabzuka, vecisuka majuya avo.
3 Jesu wakanghwina mu ngarava imweni, yainga ya Simoni, womukumbira kuti aindundire padoko mukumwa. Perapo wakagara pasi, wotanga kujijisa mbungano ari mungaravemo.
4 Paakapera kuvereketa, wakavhunja Simoni kuti: “Vhuthai tiende pakati po gandhwa, imwimwi wisiranyi majuya, mutande.”
5 Simoni wakadavira kuti: “Mujijisi, tatanda usiku hwese atizivi kubata nee hove imwe, asi ngo kuda kwenyu, ndinowisira majuya.”
6 Ngo kudaro, pavakazviita, vakabata hove jakawanda maningi, majuya avo akatanga kumweka.
7 Ngo kudaro, vakadanija* vadoni vavo vainga mu ngarava imweni, kuti vaze kuzovabesa. Ivona vakaza, vozaja ngarava mbiri, joda kundondomera.
8 Simoni Pedhru naazvivona, wakagwadama pamberi pa Jesu, eciti: “Fundurukanyi kondiri, Mambo, ngokuti ndiri mushaishi.”
9 Ngokuti iyena no vaainga navo vakathya maningi ngo ndava yo kuwanda ko hove javainga vabata.
10 Ndizvonavo zvondhozvo zvakaitika na Jakobo na Johani vana va Zebhedhi vainga vadoni va Simoni. Asi Jesu wakavhunja Simoni kuti: “Ucathya. Kuvhira wari, unozobata vandhu inga mabatire aunoita hove.”
11 Ngo kudaro, ivona vakacevesa ngarava, vosiya zvese vomutevera.
12 Pa zuva rimweni, Jesu paainga mu dhorobha rimweni, wakaguma mwanarume umweni wakazara ngo mapere! Mwanarumewo paakavona Jesu, wakawa pasi ngo huma, womudeketerera eciti: “Mambo, kudari mecida, mungandirapa.”
13 Jesu wakatambanuja nyara yake, womupsasa, woti: “Ndinoda! Mapere ako ngaapere.” Pa mukuvo wondhowo, mapere ake akangara-ngara, iyena wovanga.
14 Jesu wakamuvhunja kuti atame kuvhunja ari wese, eciti: “Asi endai wojitatija ku mupiri no kuita zvipo, inga zvakanangwa mu mutemo wa Mosi, kuti vavone kuti wavangadi.”
15 Asi masoko ngo pamusoro pake aindotokota, vandhu vazinji vaiungana pamwepo kuti vamupurukire no kurapwa ndhendha javo.
16 Asi kazinji waienda ku ndau icina vandhu kooita mukumbiro.
17 Njiku imweni, Vafarisi no vajijisi vo Mutemo vakaviya kuvha ku mutundhu yese yo Garireya, Judheya no yo Jerusarema. Jesu paainga ecijijisa, ivona vainga vakagara pondhopo. Jehovha* wainga akapekeja Jesu simba rake kuti arape ndirona.
18 Vakaguma vanarume vaithwara mundhu wakaoma muviri ari pa makha, ivona vaipsaka kumunghwinisa no kumudira pamberi pa Jesu.
19 Pavakakonehwa kumunghwinisa ngo ndava yo kuwanda ko vandhu, vakakhwira pa denga ro nyumba, vodereja makha ngo padenga mbhera pakati po vandhu vainga pamberi pa Jesu.
20 Jesu paakavona rutendo hwavo, wakati: “Shamwari, zvishaishi zvako zvaregerehwa.”
21 Perapo, vatari no Vafarisi vakatanga kurangarira ngo mu mwoyo mavo kuti: “Ndiyani mundhu uwu ari kutukari Mwari? Ndiyani anokwanisa kuregerera zvishaishi kuciripi Mwari basi?”
22 Asi Jesu eciziva murangariro wavo, wakavadavira kuti: “Muri kurangarirenyi mu mwoyo mwenyu?
23 Zvakareruka kuti ari wese amuvhunje kuti: ‘Zvishaishi zvako zvaregerehwa.’ Asi kudari ari wese akati: ‘Mukai ufambe,’ kunanga kuti waizofamba here?
24 Asi, kuti muzive kuti Mwana wo mundhu ano simba ro kuregerera zvishaishi pa nyika . . .,” iyena wakavhunja mundhu waioma muviri kuti: “Ndinokuvhunja kuti: Mukai, torai makha ako upinde kanyi.”
25 Ngo kudaro, iyena wakamuka pamberi pavo, wotora caaivatira, woenda kanyi ecikuja Mwari.
26 Ngo kudaro vese vakakahamara, votanga kukuja Mwari. Vaithya maningi veciti: “Nyamasi tavona zviro zvinokahamaja!”
27 Pasure pazvo, wakapinda, wovona mushabisi anodanijwa kuti Revhi, akagara pa ndau yo kushabisa, womuvhunja kuti: “Ivai muteveri wangu.”
28 Iyena wakasiya zvese, womuka, wotanga kumutevera.
29 Sure kwazvo, Revhi wakaitira Jesu mabuso pamuzi pake. Paingavo no uzinji hwo vashabisi no vandhu vamweni vaihavo pondhopo.
30 Vafarisi no vatari vavo vakatanga kun’gun’gutira vajiji vake ngo pamusoro pazvo, veciti: “Ngenyi munoha pomwe no kumwa no vashabisi no vashaishi?”
31 Jesu wakavadavira kuti: “Vandhu vakavanga avadi murapi, asi vanohwaja vanoda murapi.
32 Inini andizivi kuviya kuzodanija vandhu vakarurama, asi ndakaviira vashaishi kuti vakhauye.”
33 Ivona vakamuvhunja kuti: “Vajiji va Johani vanozira maningi no kuita mukumbiro jo kudeketera. Vajiji vo Vafarisi vanozviitavo, asi vajiji vako vanoha vecimwa.”
34 Jesu wakavadavira kuti: “Mungaita kuti shamwari jo mukwambo jizire kuveni mukwambo aciri navo here?
35 Asi jinozoguma njiku jokuti mukwambo anozotohwa kamare; ijona jinozozira pa njiku jondhojo.”
36 Iyena wakavaitirazve muezaniso wokuti: “Apana mundhu anoceka cigamba co nguvo imbza, wosonera pa nguvo yokare. Kudari akazviita, icona cinokweva nguvo yokare. Cigamba co nguvo imbza acizwirani no nguvo yokare.
37 Apanazve mundhu anodira vhinyu imbza mu cinyede cokare. Kudari akazviita, vhinyu imbza inozomwesa cinyedeco, iyona yosvejeka, cinyedeco coruzika.
38 Asi vhinyu imbza inodikana kudihwa mu cinyede cipsa.
39 Mundhu anomwa vhinyu yokare anonanga kuti: ‘Yokarei ngo inonaka,’ woramba imbza.”
Masoko o Pasi
^ Zvinoreva kuti: Jombe ro Garireya.
^ Gama ngo Gama: “vakakupa; vakaitira citatijo.”
^ Vonanyi Kudurujihwa ko Magama.
