Ruka 8:1-56
-
Vanakaji vaiperekeja Jesu (1-3)
-
Muezaniso wo mukusi (4-8)
-
Ngenyi Jesu waishandisa muezaniso (9, 10)
-
Kudurujihwa ko muezaniso wo mukusi (11-15)
-
Civheneko acidikani kufukijwa (16-18)
-
Mai no hama ja Jesu (19-21)
-
Jesu anonyaraja zibepo (22-25)
-
Jesu anogogomera madhimoni kuti aende ku nghumba (26-39)
-
Mwana wokaji wa Jairosi; mwanakaji anopsasa nguvo ya Jesu (40-56)
8 Pasure po nguva nganani, Jesu wakafamba dhorobha ngo dhorobha, mutundhu ngo mutundhu ecicumaera no kutokotesa masoko akanaka o Umambo hwa Mwari. Vajiji Gumi na Vaviri vainga naye,
2 pamwepo no vanakaji vainga vakaraphwa mujimu yakashata no ndhendha: Mariya waidanijwa kuti Madharena, wakabudiswa madhimoni manomwe;
3 Jhuwana mukaji wa Kuza, muvonereri wo nyumba ya Herodhi; Suzana; no vanakaji vazinji, vaimushandira vecishandisa upfumi hwavo.
4 Mbungano huru payakabatana no vandhu vamweni vaivha mu dhorobha ngo dhorobha, iyena wakabhuya navo ecishandisa muezaniso wokuti:
5 “Mukusi wakaenda kokusa mbeu yake. Paainga ecikusa, mbeu jimweni jakawira mu mbhiripiri mo gwanja, jocikwa, shiri jo mudenga jakajiha.
6 Mbeu jimweni jakawira pa mapuwe, pojakamera, jakaoma ngokuti painga pacina mutota.
7 Mbeu jimweni jakawira pakati po muzwa, muzwa pojakakura jakavhunga mbeu jiya.
8 Asi jimweni jakawira mu mavhu akanaka, pojakamera jakabara mucero kupindirija zana.”* Paakapera kubhuya zviro izvi, wakananga ngo izwi guru kuti: “Ano njeve jo kuzwa, ngaazwe.”
9 Vajiji vake vakamuvhunjisa zvawaireva muezaniso wiya.
10 Iyena wakati: “Imwimwi munotendehwa kuzwisisa cakafisika co Umambo hwa Mwari, asi vamweni vanojijiswa zvese ngo muezaniso, kuti ivona vasote asi vatame kuvona, vazwe asi vatame kuzwisisa.
11 Muezaniso unonanga kuti: Mbeu ndirona soko ra Mwari.
12 Mbeu jakawira mu mbhiripiri mo gwanja, nga vaya vanozwa soko ra Mwari, perapo Dhiyabhu anoviya wovhisa soko riya mu mwoyo mwavo kuti vatame kutenda no kuponeswa.
13 Asi jakawira pa mapuwe, nga vaya vanozwa soko ra Mwari voriashira ngo mudakaro, asi avana muji. Ivona vanoritenda pa mukuvo wakati kuti, asi pa mukuvo wo zviejo vanoregera kutenda.
14 Mbeu jakawira pakati po muzwa, nga vaya vanozwa soko ra Mwari, asi pavanovaraijwa ngo kuthimwa-thimwa, ngo upfumi no zvinodakajisa zvo upenyu huno, ivona vanopsinywa votama kubara mucero jakaivha.
15 Mbeu jiya jakawira pa mavhu akanaka, nga vayani vazwa soko ngo mwoyo wakanakisisa. Ivona vanoriviga no kubara mucero ngo kucungirira.
16 “Akuna anobwakija cibani* wocidumaija ngo mujiyo kana kucidira pasi po mubhedhu, asi anocidira panyezuru po meza, kuti vese vanonghwina mumba vavhenekehwe.
17 Ngokuti apana cakafisika cicikazobudi pambhene, apanazve cakavigika cicikazozivikanwi, cotama kubuda pa mbhene.
18 Ngo kudaro, nasanyi kupurukira mazwiro amunoita, ngokuti ari wese anazvo, anozopuwa zvakawanda, asi wiya acina, anozotorehwa no zvidoko zvaanorangarira kuti anazvo.”
19 Mai wake no hama jake vakaviya, asi avazivi kukwanisa kumukhwederera ngo pamusoro po mbungano.
20 Ngo kudaro, vakamuvhunja kuti: “Mai wako no hama jako vakaima ngo kunja, vari kuda kukuvona.”
21 Jesu wakavadavira kudari: “Mai wangu no hama jangu, nga ava varikuzwari soko ra Mwari no kurishandisa.”
22 Njiku imweni, Jesu no vajiji vake vakapakira ngarava, wovavhunja kuti: “Ngatiambuke mwombera mo gandhwa.” Ngo kudaro, ivona vakapinda.
23 Asi pavainga vecipinda, Jesu wakavata. Mugandhwemo* makamuka mbhepo huru, ngarava yavo yakatanga kuzara ngo kumwa, yoda kundondomera.
24 Vajiji vakaenda komumusa veciti: “Mujijisi, Mujijisi, topera!” Iyena wakamuka wovereketera ngo hasha mbhepo iya no mavimbi ano simba. Mbhepo yakapera, mova makagajana.
25 Perapo wakavavhunja kuti: “Rutendo hwenyu huri kwapi?” Asi ivona vakathya maningi no kukahamara, vecivhunjana ngocavo kuti: “Ndiyani kamare uwu? Ngokuti anozwihwa ngo mbhepo no kumwa.”
26 Ivona vakaguma mwombera, ku mutundhu wo Vagerasa, kunowanika ngo kudivi rimweni ro Jombe ro Garireya.
27 Jesu naabzuka mu ngarava, mwanarume umweni wainga no dhimoni, wakavha mu dhorobhemo, wakaenda kosongana naye. Iyena wainga waano mukuvo muzinji acikasimiri nguvo no kugara pamuzi, asi waigara mu makuva.*
28 Paakavona Jesu, wakakhuwa ngo izwi guru, wogwadama pamberi pake eciti: “Ndinenyi inini na iwewe, Jesu Mwana wa Mwari Mukuru-Kuru? Ndinokukumbira kuti ucanditambuja.”
29 (Ngokuti Jesu wainga wavhunja mujimu wakashata kuti ubude pa mwanarume uwu. Iwona wainga wamubata ruzinji. Mwanarume uwu wainga wasungwa ruzinji mukono no murenje ngo magaragajero no kungwarihwa ngo mungwariri, asi iyena waidajura magaragajero aya, dhimoni riya romuendesa ku ndau jicina vandhu.)
30 Jesu wakamuvhunjisa kuti: “Zina rako ndiwe ani?” Iyena wakati: “Cikwata,” ngokuti wainga wakabatwa ngo madhimoni akawanda.
31 Iwona aindomudeketerera kuti atame kumaendesa mu rindi rakajikisisa.
32 Painga no mushambi wo nghumba waihava pa dundhu. Madhimoni aya akamudeketerera kuti amatendere kuenda ku mushambi wo nghumba, Jesu wakamatendera.
33 Madhimoni akabuda pa mwanarume wiya, onghwina mu nghumba. Mushambi wese wo nghumba wakagogoma wophuka ngo pagomokomo weciwira mu gandhwa, wondondomera.
34 Vahavisi pavakazvivona, vakatiza vonghwina mu dhorobha no mu ndharaundha, vonanga zvese zvainga zvaitika.
35 Perapo vandhu vakabuda voenda kovona zvainga zvaitika. Ivona vakaenda kuna Jesu, vokhanda mwanarume wavhiswaya madhimoni wakasimira, ano hwiru kwaho, wakagara na Jesu. Ivona vakathya maningi.
36 Vaya vakavona ciitiko ici, vakasumurira vakavhaya ku dhorobha no mundharaundha, zvese zvainga zvakaitikira mundhu wainga no dhimoni, waingaya wavanga.
37 Vandhu vakawanda vakavha mu ndharaundha yo Vagerasa vakakumbira Jesu kuti abude mu ndharaundha mavo, ngokuti vaithya maningi. Perapo, iyena wakapakira ngarava kuti apinde.
38 Mwanarume wakavhiswaya madhimoni waindodeketerera Jesu kuti agare naye, asi iyena wakamupindisa, eciti:
39 “Hwirirai kanyi, uvhunje vandhu vese zvowakaitihwa ndi Mwari.” Ngo kudaro, iyena wakapinda, wotokotesa mu dhorobhero rese zvaakaitihwa ndi Jesu.
40 Jesu paakahwirireyo, mbungano yakamuashira ngo kunaka mwoyo, ngokuti vandhu vese vaimuvetera.
41 Asi pakaguma mwanarume umweni anodanijwa Jairosi; wainga mutungamiriri wo sinagoga. Iyena wakagwadama pa soka ja Jesu, womudeketerera kuti aende kanyi kwake,
42 ngokuti mwana wake umwe basi wokaji, wainga no makore gumi na maviri, wainga woda kufa.
Jesu paaienda, mbungano yaimuteverera yecimupsinya.
43 Painga no mwanakaji umweni waibuda ngazi ko gumi ro makore no makore maviri, apana wakakwanisa kumurapa.
44 Mwanakaji uwu wakakhwederera Jesu ngo sure wopsasa ciuruji co nguvo yake, pa mukuvo wondhowo, kubuda ngazi kwake kwakapera.
45 Ngo kudaro, Jesu wakati: “Ndiyani wandipsasa?” Vese pavainga veciramba, Pedhru wakati: “Mujijisi, mbungano iri kumutendeneja yecimupsinya.”
46 Asi Jesu wakati: “Aripo wandipsasa, ngokuti ndazwa simba rangu recibuda.”
47 Mwanakaji wiya paakavona kuti wazivika, wakaviya kwaari ecitetemera, wogwadama pamberi pake. Iyena wakananga pamberi po vandhu vese caamupsasira no marapikire aaita ngo kukasika.
48 Jesu wakamuvhunja kuti: “Mwana wangu, rutendo hwako hwakuponesa. Endai, ucathya.”*
49 Paainga acavereketa, muimiriri wo mutungamiriri wo sinagoga, wakaguma wonanga kuti: “Mwana wenyu watamika; mucadonesazve henyu Mujijisi.”
50 Jesu paakazvizwa, wakamuvhunja kuti: “Ucathya, tendai basi, iyena anozopona.”
51 Jesu paakaguma kanyi ka Jairosi, aazivi kutendera ari wese kuti anghwine naye, asi wakanghwina na Pedhru, Jakobo, Johani na baba wo musikane na mai wake.
52 Vandhu vese vaicema* no kucumba* ngo ndava yo musikane uwu. Jesu wakavavhunja kuti: “Mucacema,* ngokuti iyena aazivi kufa asi wakavata.”
53 Asi ivona vakatanga kumuseka, ngokuti vaizviziva kuti wainga wafa.
54 Asi Jesu wakamubata ngo nyara yake wodanija eciti: “Mwana, mukai!”
55 Iyena wakamuka* ngo kukasika, Jesu wakavavhunja kuti vamupe zvokuha.
56 Vabari vo musikane uwu vakadakara maningi zvokuti avacaizvitenda, asi iyena wakavavhunja kuti vatame kuvhunja ari wese zvainga zvaitika.
Masoko o Pasi
^ 100.
^ Cigabhu-gabhu.
^ Zvinoreva kuti: Gandhwa ro Genezareti, kana Jombe ro Garireya.
^ Kana: “makuva anoceukijwa.”
^ Gama ngo Gama: “endai mu runyararo.”
^ Kana: “vairira.”
^ Gama ngo Gama: “no kujitaka pa diti ngo kucumba.”
^ Kana: “mucarira.”
^ Kana: “simba rake ro upenyu, rakahwirira kwaari.”
