Vahebheru 2:1-18
2 Ngo ndava yazvo, tinodikana kunasa kupurukira zviro zvatinozwa, kuti titame kupauswa padoko ngo padoko.
2 Kudari soko rakabhuiwa ngo ngirozi riri rokadi, kushaisha no kutama kuzwira, kwakaashira mupocero waifanera,
3 tinozoponeswa kudini kudari tikatama kubatisisa ruponeso hwakakura kudari? Ihwona hwakatanga kuziviswa ndi Mambo wedu, hwokhombijwa nga vaya vakamuzwa.
4 Mwari pacake wakatibatanija na ivona, eciita ucapupu ngo pamusoro po zvitatijo, mushamaiso, mabasa akawanda ano simba no zvipo zvo mujimu mucena zvaaipa umwe na umwe mukuzwirana no kuda kwake.
5 Iyena, aazivi kugaja ngirozi kuti jitonge nyika inozoza yatiri kubhuyari.
6 Asi kuno ucapupu humweni hunonanga kuti: “Mundhu icinyi kuti utame kumukanganwa, kana mwana wo mundhu icinyi kuti umutaje?
7 Makamuita mudoko padoko kupinda ngirozi; makamusimija junguja rinoreremejwa no kukuja, momugaja panyezuru po mabasa o nyara jenyu.
8 Zviro zvese zvakadihwa pasi po soka jake.” Mwari paakadira zviro zvese pasi pake, apana caakasiya ciciripi pasi pake. Pikija wari ticito tavona zviro zvese zviri pasi pake.
9 Asi itusu wari tiri kumuvona Jesu, wakaitwaya mudoko padoko kupinda ngirozi, wari wasimijwa junguja rokukujwa no kureremejwa ngo kufa kwake, kuti ngo ndava yo unyasha hucikaezaniswi hwa Mwari, iyena afire vandhu vese.
10 Zviro zvese zviripo kuti Mwari akujwe, zvakavepo pecishandiswa iyena. Kuti pakujwe vana vazinji, zvaifanera kuti Muimiriri Mukuru ave akakwana ngo matambujiko. Mwari wakavaponesa ecishandisa Muimiriri Mukuru uwu.
11 Ngokuti wiya ari kucenesa na vaya vari kuceneswa, vakavha ku mundhu umwe basi, ngo kudaro, Jesu aapseruki ngo kuvadanija hama,
12 inga zvaakananga kuti: “Ndinozozivisa zina renyu ku hama jangu; ndozomusimba pakati po ungano ngo ndumbo.”
13 Wonangazve kuti: “Inini ndinozomuthemba.” Wophindazve eciti: “Vonanyi! Inini no vana vandakapuwa ndi Jehovha.”*
14 Ngo kudaro, zvecivoneka kuti vana ngo vongazi no nyama, iyena wakavavo wo ngazi no nyama, kuti ngo kufa kwake, aparaje Dhiyabhu ano simba ro kuuraya,
15 kuti asujunure vaya vainga muuranda hwo kuthya rufu mu upenyu hwavo hwese.
16 Iyena aaripi kubesera ngirozi, asi ari kubesera mubarihwana hwa Abhirahama.
17 Ngo kudaro, iyena waidikana kuezana no “hama” jake mu mativi ese, kuti ave mupiri mukuru ano usizi, wakagondeka mu zviro zva Mwari, kuitira kuti aite mupiro unozwirana no zvishaishi zvo vandhu vese.
18 Zvecivoneka kuti iyena wakatambujika paaiejwa, iyena anokwanisavo kubesera vaya vari kuejwa.
Masoko o Pasi
^ Vonanyi Kudurujihwa ko Magama.
