Vahebheru 7:1-28
7 Merekizedheki uwu mambo wo Saremi mupiri wa Mwari Mukuru-Kuru, wakasongana na Abhirahama ecivha kouraya majimambo, womukomborera.
2 Abhirahama wakamupa cogumi co zviro zvese. Pakutanga zina rake rinosandujwa kuti “Mambo wo Ururami,” kusiyapo izvo, ndiyena mambo wo Saremi, kana kuti “Mambo wo Runyararo.”
3 Zvecivoneka kuti aana baba, aana mai aana mubarihwana, apana pakatahwa ngo pamusoro po kubahwa kwake no kufa kwake, asi wakaithwa inga Mwana wa Mwari, ndiyena anozova mupiri mukuvo wese.
4 Vonanyi kukura ko mundhu uwu wakapuwari cogumi co zviro zvakanakisisa zvakatohwa ndi Abhirahama baba wedu.
5 Ndizvona kuti mukuzwirana no mutemo, vana va Revhi vakapuwaya basa ro upiri, vaitendehwa kupuwa cogumi ngo vandhu, vainga hama javo pikija kuti ivona vaingavo mubarihwana wa Abhirahama.
6 Asi mwanarume uwu aacaingepi wo mubarihwana wavo. Pikija zvakadaro, iyena wakapuwa cogumi ndi Abhirahama, wokomborera wiya wakaitihwa zvigondiso.
7 Azvirambiki kuti mudoko anokomborehwa ngo mukuru.
8 Varevhi vakaashiraya cogumi, vainga vandhu vanofa. Asi mundhu umweni uwu wakaashirarivo cogumi, matahwa anonanga kuti aafi.
9 Tingananga kuti pikija Revhi anoashiraya cogumi, wakapavo cogumi ecishandisa Abhirahama.
10 Ngokuti Revhi wainga acito abahwa Merekizedheki paakasongana na Abhirahama.
11 Nasiriro yo upiri hwo mubarihwana wa Revhi rainga divi ro Mutemo wa Mosi wakapuwa Vaiziraeri. Kudari no zvaikwanisika kuva takakwana ngo upiri hwaiithwa ngo Varevhi, ngenyi kwaizodikanazve kuva no mupiri umweni wakaita inga Merekizedheki kuciripi inga Aroni?
12 Ngokuti upiri pahunonga hwecicinjwa, Mutemo unodikanavo kucinjwa.
13 Ngokuti mundhu ari kunangihwari zviro izvi wakavha ku jinja rimweni ricina mundhu wakashanda pa artari kareko.
14 Ngokuti zviri pambhene kuti Mambo wedu wakavha ku mubarihwana wa Judha. Asi Mosi aazivi kunanga ciri cese ngo pamusoro pokuti vapiri vaizovha mu jinja iri.
15 Izvi zvinonasa kujeka kudari pakabuda mupiri umweni wakaezana na Merekizedheki.
16 Iyena aazivi kuva mupiri ngo pamusoro po jinja rake mu kuzwirana no mutemo. Asi wakava mupiri ngo pamusoro po simba ro upenyu hucikaparajwi.
17 Matahwa amweni anonanga kuti: “Iwewe uri mupiri mbhera narini inga zvakaita Merekizedheki.”
18 Ngo kudaro, mutemo wokare unosiiwa ngokuti wakaremba nee aucashandi.
19 Ngo kudaro, Mutemo auzivi kuita ciro cakakwana, asi vetero ndiyona yakaitisa ciro cakakwana. Ngo pamusoro po vetero iyi itusu tinokwanisa kukhwedera kuna Mwari.
20 Cimwenizve, zvecivoneka kuti izvi zvakaithwa papera kuithwa mbhiko,
21 (ngokuti kuno vandhu vakaithwa vapiri, pacina mbhiko yakaithwa. Asi Jesu wakaithwa mupiri ngo ndava yo mbhiko yainga yakaithwa ngo pamusoro pake. Iyona yakaithwa ndi Wiya wakanangaya kuti: “Jehovha* wakapika eciti: ‘Iwewe uri mupiri mbhera narini.’ Iyena aazoviizve sure”),
22 Jesu wakava cigondiso co citenderano cakanaka.
23 Kusiyapo izvo vandhu vazinji vakavavo vapiri, vecifakeya vamweni vainga vafa. Ngokuti avacaishandepi kwenda no kwenda.
24 Zvecivoneka kuti iyena wainga acikafi, apacaidikanepi vandhu vaimufakeya.
25 Ngo kudaro, iyena anokwanisa kuponesa vaya vanokhwedera kuna Mwari ngo zina rake. Ngokuti iyena ari penye mukuvo wese kuti avadeketerere mukuvo wese kuna Mwari.
26 Ngokuti zvinosisira kuti itusu tive no mupiri mukuru wakadaro; wakagondeka, acina ndava, acina svina, wakaparajana no vashaishi, wokhwijirijwa kupinda kudenga.
27 Mukusiyana no vapiri vakuru ava, iyena aadikani kuita mupiro njiku jese; kutanga ngo mupiro wo zvishaishi zvake, perapo wo zvishaishi zvo vandhu, ngokuti iyena wakaita mupiro kamwe basi paakajipira.
28 Ngokuti Mutemo unogaja vandhu vakaremba kuti vaite vapiri vakuru. Asi mbhiko yakazoviya sure ko Mutemo inogaja mwana wakaithwa wakakwana mbhera narini.
Masoko o Pasi
^ Vonanyi Kudurujihwa ko Magama.
