Vahebheru 8:1-13
8 Iri ndirona fundo guru ro zviro zvatiri kubhuyari pano: Itusu tinaye mupiri mukuru inga uwu, iyena wakagara pa mukono muho wo cigaro ca Mambo kumatenga,
2 iyena ari kushandira pa ndau yakacena, pa tende yokadi-kadi yakaimiswa ndi Jehovha.* Tende iyi aizivi kuimiswa ngo mundhu.
3 Ngokuti mupiri mukuru wese anogajwa kuti aite zvipo no mupiro. Ngo kudaro, zvaisisira kuti mupiri mukuru uwu, ave no ciro caangaita cipo.
4 No kwainga kuti wainga pasi pano, aacaizova mupiri, ngokuti pasi pano vainga varipo vandhu vaiita mupiro mukuzwirana no Mutemo.
5 Vandhu ava vari kuita basa rakacena inga citatijo no munvuriri wo zviro zvokudenga; ndizvona zvakaitika na Mosi paainga ecida kuvaka tende. Iyena wakavhunjwa ndi Mwari kuti: “Unofanera kuita zvese mukuzwirana no ndhungamiriro jo wakapuwa pawainga ku dundhu.”
6 Ngo kudaro, Jesu wakawana basa rakanaka maningi ngokuti ndiyenazve muviiranisi wo citenderano cakanakisisa cakaithwa ngo zvigondiso zvakanaka.
7 Kudari citenderano cakaithwa pakutanga nocainga cicizivi kuposeka, akucaizodikana kuitwa citenderano cocipiri.
8 Ngokuti iyena anovona kuposa ko vandhu paanoti: “Jehovha* anonanga kudari: ‘Izwanyi, mazuva ari kuguma, pandinozoita citenderano cipsa no Vaiziraeri no nyumba ya Judha.
9 Cinozosiyana no citenderano candakaita no majicekuru avo, pa njiku yondakavabata mukono ndovabudisa mu Ejipita, ngokuti ivona avazivi kuenderera mberi vari mu citenderano cangu, ngo ndava yazvo, inini andizivi kuvataja,’ ngozvaakananga Jehovha.*
10 “Jehovha* anoti: ‘Nga ici citenderano candinozoita no Vaiziraeri pasure po njiku iji. Inini ndinozodira mutemo yangu mu murangariro yavo, ndozoitara mu mwoyo javo. Inini ndinozoita Mwari wavo, ivona vanozoita vandhu vangu.
11 “‘Akuzowaniki mundhu anojijisa mundhu umweni kana hama yake, eciti: “Zivai Jehovha!”* Ngokuti vese vanozondiziva, kuvhira ku vana vadoko mbhera kumadhodha.
12 Inini ndinozovaitira usizi ngo pamusoro po mabasa avo acizivi kururama, andizoceukijizve zvishaishi zvavo.’”
13 Iyena paakananga kuti “citenderano cipsa,” wakaita kuti citenderano cokare citamezve kushanda. Citenderano pacinotama kushanda, cinoita cokare, coda kutopera.
Masoko o Pasi
^ Vonanyi Kudurujihwa ko Magama.
^ Vonanyi Kudurujihwa ko Magama.
^ Vonanyi Kudurujihwa ko Magama.
^ Vonanyi Kudurujihwa ko Magama.
^ Vonanyi Kudurujihwa ko Magama.
