Vahebheru 9:1-28
9 Ngo pamusoro po citenderano cokare, mutemo wainanga kuti kunodikana kuitwa basa rakacena. Wonangazve kuti pasi pano panodikana kuva no ndau yakacena.
2 Nyumba yo tende yakatanga kuvakwa, yainga no cigajikiro co cibani,* meza no pau jo kuita zvipo. Iyona inodanijwa kuti Ndau Yakacena.
3 Asi ngo sure ko jira ro cipiri, kwainga no tende yaidanijwa kuti Ndau Yakacenesesa.
4 Mukati mayo mainga no mujiyo wo goridhi wo kupisira mutombo unonuhira, bhokiso ro citenderano raifukijwa ngo goridhi, rainga no cijuvi co goridhi cainga no manaa, ndonga ya Aroni yakabudaya maruva no mapuwe akacecwa o citenderano.
5 Pa nyezuru po bhokiso ro citenderano iri, painga no makherubhi aimonikira ecifukija cidumaijo co kuviiranisa. Wari andiyopi nguva yo kubhuya zvakawanda ngo pamusoro po zviro izvi.
6 Zviro izvo pazvaivakwa kudari, vapiri vakuru vainghwina mukuvo wese mu tende yokutanga kuti vaite mabasa akacena.
7 Asi mupiri mukuru wainghwina kamwe basi pa gore mu nyumba yo cipiri ano ngazi yaanojiitira mupiro ndiyona no kuitira mupiro zvishaishi zvo vandhu zvavanoita vacikazvizivi.
8 Mujimu mucena unobudisa pambhene ngo njira iyi kuti gwanja ro kwenda ku ndau yakacena rainga ricito ravoneswa tende yo kutanga payainga iripo.
9 Tende iyi ndiyona muezaniso wo mukuvo uno. Mukuzwirana no nasiriro iyi, kunoitwa zvipo no mupiro. Ngo kudaro, zviro izvi azvikwanisi kucenesa kamare hana yo mundhu anoitaro basa rakacena.
10 Zvipo izvi no mupiro, zvainga zviri zvokuha, zvokumwa no ku jicenesa kwakasiyana-siyana, kwaidiwa ngo mutemo. Zviro izvi zvaidiwa ngo mutemo ngo ndava yo muviri, zvovepo mbhera pa nguva yakagajwa yo kunasirira zviro zvese.
11 Ngo kudaro, Kristu paakaviya inga Mupiri Mukuru wo zviro zvakanaka zvainga zvaitika, wakanghwina mu tende huru yakakwana, icizivi kuitwa ngo nyara jo vandhu, kana kuti, iciripi yo zvisikwa zvo pasi pano.
12 Iyena aazivi kunghwina mu ndau yakacena no ngazi yo mbuji no yo vana vo n’gombe,* asi wakanghwina no ngazi yake kamare woita kuti tisujunuhwe kamare mbhera narini.
13 Ngazi yo mbuji no yo n’gombe no marota o cimwana co n’gombe* cokaji, zvikafafaijihwa vaya vakasvipiswa, zvinovacenesa kunyama.
14 Mukufananavo, ngazi ya Kristu wiya wakajipira kuna Mwari ngo mujimu mucena ucikaperi, acina cakaposeka, aizokwanisivo kucenesa hana yedu ku mabasa akafa kuti tikwanise kuita mabasa akacena kuna Mwari anopona?
15 Ndizvona zvinoitisa kuti iyena ave muviiranisi wo citenderano cipsa, kuitira kuti vayani vakadanijwa, vaashire cigondiso cavo co utaka hucikaperi zvecivoneka kuti aripo wakafa ngo pamusoro pavo kuti vaponeswe ngo muripo wo zvishaishi zvakaitwa pa mukuvo wo citenderano cokare.
16 Ngokuti pano citenderano, panodikana kufa mundhu anoviiranisa citenderanoco.
17 Citenderano cinoshanda kudari muviiranisi wo citenderanoco akafa, ngokuti citenderano acishandi kudari muviiranisiwo ari penye.
18 Nee citenderano cokare, acizivi kushanda pacina ngazi.
19 Mosi paakapera kuzivisa mupango yese ku vandhu vese, iyena wakatora n’gombe no mbuji, wakatorazve kumwa no usone* hwakapsuka hwo vhuta no zvimatavi* wozuzira panyezuru po bhuku pomwe no vandhu vese.
20 Eciti: “Iyi ndiyona ngazi yo citenderano comwakavhunjwa ndi Mwari kuti mucingwarire.”
21 Iyena wakazuziravo ngazi pa tende no mujiyo jese jaishandisihwa pa basa rakacena.
22 Ndizvona, mutemo unonanga kuti zviro zvese zvinoceneswa ngo ngazi. Ngazi ikatama kupopomejwa, akuna mundhu anoregerehwa.
23 Ngo kudaro, zvaisisira maningi kuti zviro zvinoezanisira zviro zvo kumatenga, zvive zvinoceneswa ngo njira iyi, asi, zviro zvo kumatenga, zvaikumbira kuitihwa mupiro wakanaka.
24 Kristu aazivi kunghwina mu ndau yakacena yakaitwa ngo nyara jo vandhu. Ndau iyi ndiyona muezaniso wo ndau yakacena, asi iyena wakanghwina ku matenga zvoita kuti iyena atiimirire pamberi pa Mwari.
25 Izvi azvizivi kuitwa kuti iyena ajipire kakawanda maningi inga zvaiitwa ngo Mupiri mukuru wainghwina mu ndau yakacena pa gore ngo gore kuti apire ngazi iciripi yake kamare.
26 Ngokuti nozvaidaro, iyena waizotambujika kakawanda kuvhira pa kusikwa ko nyika. Asi wari kumbhiri ko nyika* ino iyena wakajivonesa kamwe mbhera narini kuti apeje cishaishi ngo mupiro wake kamare.
27 Vandhu vanofa kamwe basi zvopera. Perepo votongwa.
28 Ngo kudarovo, Kristu wakaitwa cipo kamwe basi kuti atore zvishaishi zvo vazinji, paanozoviyazve hwocipiri aaviyi kuzohwisana no zvishaishi. Iyena anozovoniwa nga vaya vanomuvetera kuti vaponeswe.
Masoko o Pasi
^ Cigabhu-gabhu.
^ Mathoyo; maburu.
^ Cithoyo; ciburu.
^ Kana: “ukuse.”
^ Cigiriki: Isopo, muti
^ Vonanyi Kudurujihwa ko Magama.
