1 Johani 3:1-24
3 Vonanyi kuti i rudo hwakadini hwatakaitihwa ndi Baba, kuti tidanijwe vana va Mwari! Ngo zvokadi, tiri vana vake. Ngo ndava yazvo nyika aitizivi, ngokuti aizivi kuziva Mwari.
2 Hama jinodiwa, wari tiri vana va Mwari, asi azvito zvakhombijwa kuti tinozoita ani. Tinozviziva kuti tinozoezana naye paanozotatijwa pambhene, ngokuti tinozomuvona kudari ngo zvaari.
3 Ari wese ano kuthemba kwakadari, kwakacijikira kwaari, anojicenesa, inga ndiyena wakacena.
4 Ari wese anoshaisha, ari kuitavo zvinohwisana no mutemo, ngokuti cishaishi cinohwisana no mutemo.
5 Imwimwi munozvizivavo kuti Mwana wa Mwari wakaviya kuzovhisa zvishaishi zvedu, iyena aana cishaishi.
6 Ari wese anoramba akabatana naye aaiti cishaishi; wiya anoshaisha aazivi kumuvona nee kumuziva.
7 Vana vangu, mucacengejwa ngo mundhu ari wese; wiya anoita zvakanaka, mururami, kudarivo inga ndiyena wakarurama.
8 Mundhu anoita cishaishi anovha ka Dhiyabhu, ngokuti Dhiyabhu ari kundoshaisha kuvhira pa kutanga.* Mwana wa Mwari wakaviya ngo ndava yondhoyo, kuti azovhise* mabasa a Dhiyabhu.
9 Wese ari mwana wa Mwari aaiti cishaishi, ngokuti mbeu* Yake inoramba iri mu mundhu wakadaro. Iyena aaiti cishaishi ngokuti mwana wa Mwari.
10 Ndipona pavanosiyana vana va Mwari no vana va Dhiyabhu: Wiya acikaiti zvakarurama aavhi kuna Mwari, ndizvonavo zvondhozvo na wiya acikadi hama yake.
11 Ngokuti ndiwona masoko o makazwa kuvhira pakutanga kuti: tinodikana kudisana ngocedu;
12 ticikaiti inga ndi Khaini, wakavha ku mushati wouraya hama yake. Wakamuurairenyi? Ngokuti mabasa ake ainga akashata, asi mabasa o hama yake ainga akanaka.
13 Hama, mucakahamara kudari vandhu vo nyika vecimunyenya.
14 Itusu tinozviziva kuti takavha mu kufa kuenda mu upenyu, ngokuti tinoda hama jedu. Wiya acikadi hama yake, anoramba ari mu rufu.
15 Wiya anozonda hama yake, muurayi, imwimwi munozviziva kuti apana muurayi anowana upenyu hucikaperi.
16 Ngo ndava yazvo, takaguma pa kuziva rudo, ngokuti iyena wakapira upenyu hwake* ngo ndava yedu, ngo kudaro itusu tinodikana kupira upenyu hwedu* ngo ndava yo hama jedu.
17 Asi kudari mundhu ano zviro zvinokwana kuti ararame, perapo wovona hama yake yecitambujika asi woramba kuiitira pena, rudo hwa Mwari hunogarisa kudini mwaari?
18 Vana vangu, atidikani kuda ngo magama no muromo, asi ngatide vamweni ngo zviito no cokwadi.
19 Nga izvi, tinozoziva kuti tiri vana vo cokwadi, tozonyaraja* mwoyo yedu pamberi pake,
20 pari pese patinopuwa ndava ngo mwoyo yedu. Ngokuti Mwari mukuru kupinda mwoyo yedu, iyena anoziva zviro zvese.
21 Hama jinodiwa, kudari mwoyo yedu ikatama kutipa ndava, tinobhuya ticingathyi pamberi pa Mwari;
22 zvese zvatinokumbira tinozvipuwa ndiyena, ngokuti tiri kuzwira mutemo yake no kuita zvinomudakajisa.
23 Zvokadi, mupango wake nga uwu: kuti tive no rutendo mu zina ro Mwana wake Jesu Kristu no kudisana ngocedu, inga zvatakavhunjwa ndiyena.
24 Kusiyapo izvi, wiya anozwira mutemo yake anoramba akabatana naye, iyena anobatana no mundhuwo. Ngo mujimu watakapuwa ndiyena, tinoziva kuti iyena wakabatana nesu.
Masoko o Pasi
^ Kana: “kuvhira paakatanga.”
^ Kana: “azoparaje.”
^ Kana kuti: mbeu inokwanisa kubara mucero.
^ Kana: “mwiha wake.”
^ Kana: “mwiha wedu.”
^ Kana: “tozokhohwesa.”
