1 Johani 5:1-21
5 Wiya anotenda kuti Jesu ndi Kristu, mundhu wondhowo mwana wa Mwari, wiya anoda Mwari anodavo Jesu Kristu.
2 Kudari tikada Mwari no kuteveja mutemo yake, tinozoziva kuti tinoda vana va Mwari.
3 Ngokuti kuda Mwari zvinoreva, kuzwira mutemo yake; mutemo yake airemi,
4 ngokuti wese wakabahwa ndi Mwari, anonyisa nyika. Kutenda kwedu ndikona kunonyisa nyika.
5 Ndiyani anganyisa nyika? Asipi uwo anotenda kuti Jesu ndi Mwana wa Mwari here?
6 Ndiyena wakaviya ngo kumwa no ngazi: Jesu Kristu; kuciripi ngo kumwa basi, asi ngo kumwa no ngazi. Mujimu unoita ucapupu, ngokuti mujimu uwu ngo wo cokwadi.
7 Ngokuti kuno zviro zvitatu zvinoita ucapupu:
8 mujimu, kumwa no ngazi; zvo zvitatu zvinozwirana.
9 Kudari tecitenda ucapupu hwo vandhu, ucapupu hwa Mwari hwakakura. Ngokuti ucapupu uhu hunoithwa ndi Mwari, eciuitira Mwana wake.
10 Mundhu anotenda Mwana wa Mwari ano ucapupu mu mwoyo mwake. Mundhu acikatendi Mwari anomuita munyepi, ngo kutama kutenda ucapupu hwaakaitira Mwana wake.
11 Ucapupu nga uhu: Mwari wakatipa upenyu hucikaperi, upenyu uhu huri mu Mwana wake.
12 Wiya ano Mwana ano upenyu uhu; asi wiya acina Mwana wa Mwari aana upenyu uhu.
13 Ndinomutarira zviro izvi imwimwi munotenda zina ro Mwana wa Mwari kuti muzive kuti muno upenyu hucikaperi.
14 Itusu tinothemba* kuna Mwari kuti: tikamukumbira ciro cinozwirana no kuda kwake, iyena anotizwa.
15 Kudari teciziva kuti anozwa ciri cese catinomukumbira, tinoziva kuti tinozoashira zvatinomukumbiraro, zvecivoneka kuti takazvikumbira iyena.
16 Kudari mundhu akavona hama yake yeciita cishaishi cicikauraisi, ngaakumbire, Mwari anozopa upenyu hama yake, basi, kuna vaya vakaita cishaishi cicikauraisi. Ciripo cishaishi cinouraisa. Andinangi kuti anodikana kukumbirira cishaishi condhoco.
17 Kutama kururama kwese, cishaishi, asi kuno cishaishi cicikauraisi.
18 Tinozviziva kuti mundhu wese wakabahwa ndi Mwari* aaiti cishaishi, asi wakabahwa ndi Mwari anomujivirira, mushati aakwanisi kumupsasa.*
19 Tinoziva kuti tiri va Mwari, asi nyika yese iri mu nyara ya Sathana.*
20 Itusu tinoziva kuti Mwana wa Mwari wakaviya, wotipa simba ro kuva takangwara* kuti tizive wiya ari wokadi. Itusu takabatana na wiya ari wokadi, ngo ndava yo mwana wake, Jesu Kristu. Uwu ndiyena Mwari wokadi no upenyu hucikaperi.
21 Vana vangu, jingwarirenyi ku zvithombi.*
Masoko o Pasi
^ Kana: “tinobhuya ticingathyi.”
^ Kana kuti: Kupsasa Jesu Kristu, Mwana wa Mwari.
^ Kana: “kumubata.”
^ Gama ngo Gama: “yo wakashata.”
^ Gama ngo Gama: “wakatipa hwiru hunozwisisa.”
^ Kana: “zvidhori.”
