1 Pedhru 1:1-25
1 Inini Pedhru, mupostori wa Jesu Kristu, ndiri kutarira imwimwi, vakasanwa, vagari vo nguva shomani mu nyika ino, vakandhandhanika mu Ponto, Garatiya, Kapadhosiya, Aziya no Bhitiniya
2 mukuzwirana no kuziva zvokumbeji* ka Mwari Baba no kuceneswa ngo mujimu, kuti muzwire no kuzuzihwa ngazi ya Jesu Kristu:
Unyasha hucikaezaniswi no runyararo ngazviengejehwe kwamuri.
3 Ngaakujwe Mwari, Baba wa Mambo wedu Jesu Kristu, mukuzwirana no unyasha hwake hukuru. Iyena wakatiita kuti tibahwe nga papsa tova no vetero icikaperi ngo pamusoro po kumuswa kwa Jesu Kristu ko vakafa,
4 kuti tive no utaka hucikaperi, hwakacena, hunogara huripo mbhera narini. Ihwona hwakanasiririhwa imwimwi mugore,
5 muri kuhungwaririhwa ngo simba ra Mwari ngokuti muno rutendo hunomuponesa, hunozotatijwa pa mukuvo wo kupejisira.
6 Muri kudakara maningi ngo ndava yazvo, pikija mecidikana kutambujika pa mukuvo mudoko, ngo muejo jakasiyana-siyana.
7 Rutendo hwenyu hwakaejwa, ngahumuite kuti musimbhwe, mupuwe nduma no kukujwa pa kuvoneswa kwa Jesu Kristu. Ngokuti rutendo hwenyu uhu huno mutengo mukuru kupinda goridhi rinopera, pikija kuti rinoejwa ngo muriro.
8 Pikija mucizivi kumbomuvona, imwimwi munomuda. Nee mucikamuvoni wari uno, munomutenda. Imwimwi muri kudakara maningi ngo mudakaro ucikanangiki no unoshamaisa,
9 pamunonga meciwana ruponeso hwenyu* ngo rutendo hwenyu.
10 Ngo pamusoro po ruponeso uhu, vaya vakaporofita ngo ndava yo unyasha hucikaezaniswi hwamunozoitihwa, vakavangisira maningi kuti vavhunjisire no kunasa kupsakisisa.
11 Ivona vakajija maningi ngo pamusoro po zviro zvavakaporofita ngo mujimu mucena wainga mukati mavo, kuti vazive kuti zviro izvi zvaizokwanirisika rini muna Kristu no mukuvo wo zvaizoitika. Izvona zvainga zvakanangwa ngo mujimu kuti Kristu waizotambujiswa kudini nokutizve waizokujiswa kudini.
12 Ivona vakazvivoneswa kuti vainga vacikajishandiri pacavo, asi vaishandira imwimwi, ngo pamusoro po zvamainga makavhunjwa nga vaya vakamuzivisa masoko akanaka no mujimu mucena wakatumwa kuvha mugore. Ngirozi jino cidaka-daka co kuziva zviro izvi.
13 Ngo ndava yazvo nasiriranyi murangariro kuti mushande; rambanyi makarinda; vetero yenyu ngaicijikire pa unyasha hucikaezaniswi hunozoviswa kwamuri pa kuvoneswa ka Jesu Kristu.
14 Wari muri vana va Mwari vanozwira, regeranyi kuita mukuzwirana no zvido zvakashata zvamainga nazvo mucito maziva Mwari,
15 asi inga zvamakadanijwa ngo Wakacena, ivanyi vakacena mu mufambiro wenyu wese,
16 ngokuti zvakatahwa kuti: “Ivanyi vakacena ngokuti inini ndakacena.”
17 Cimwenizve, kudari mecidanija Baba vanotonga vacina mukheto mukuzwirana no mabasa a umwe nga umwe, ivanyi no mufambiro wo kuthya pa mukuvo wo muri vagari vo nguva shomani.
18 Ngokuti munozviziva kuti asipi ngo zviro zvinopera inga sirivha no goridhi zvamakasununguhwa* ndizvona mu maitiro enyu akashata, amakasiihwa ngo majicekuru enyu.*
19 Asi makaponeswa ngo ngazi ya Kristu ino mutengo mukuru, yakaezana no yo vhuta ricina vara no ricizivi kuremara.
20 Zvokadi ngo zvokuti, iyena wakazivika nyika icito yaitwa, asi wakazovoneswa pa mukuvo wokupejisira ngo ndava yenyu.
21 Ngo ndava yake munotenda Mwari, wiya wakamumusa ku vakafa no kumupa nduma kuti rutendo no vetero yenyu ive kuna Mwari.
22 Zvecivoneka kuti wari majicenesa* ngo kuzwira kwenyu cokwadi, komuita kuti mude hama mucingacengejeri, disananyi ngocenyu ngo mwoyo wese.
23 Ngokuti makabahwa nga papsa, haiwa ngo mbeu inovora asi ngo mbeu icikavori,* ngo pamusoro po soko ra Mwari anopona, wiya anogara no kucingaperi.
24 Zivanyi kuti “mundhu wese wakatojana* no mauswa no nduma yake yese yakatojana no maruva o mubani; mauswa anovoma, ruva rinofota,
25 asi soko ra Jehovha* rinondogara riripo.” “Soko” iri ndiwona masoko akanaka amakaziviswa.
Masoko o Pasi
^ Kana: “nyezuru.”
^ Kana: “ruponeso hwo mwiha yenyu.”
^ Gama ngo Gama: “zvamakaripihwa.”
^ Kana: “ngo zvirovejeso zvenyu.”
^ Kana: “majicenesa mwiya wenyu.”
^ Kana kuti: mbeu inokwanisa kubara mucero.
^ Kana: “kuti nyama yese yakatojana.”
^ Vonanyi Kudurujihwa ko Magama .
