1 Pedhru 2:1-25
2 Ngo kudaro, siyanyi ushati hwese, kucengeja, kucengejera, cishatihwa no kushora kwese.
2 Inga vana vavha kubahwa, disisanyi mukaka* ucizivi kusvipiswa* wo soko, kuti mukure mbhera kuwana ruponeso ngo pamusoro po soko iri,
3 ngokuti makaziva kuti Mambo wakanaka.
4 Pamunonga mecikhwedera kwaari, buwe rinopona rakarambhwa ngo vandhu asi rakasanwa, rino mutengo mukuru kuna Mwari.
5 Imwimwi kamare inga mapuwe anopona, muri kuvangiswa inga nyumba yo kumujimu kuti muve upiri hwakacena, kuti muite mupiro jo kumujimu jinotendehwa ndi Mwari pecishandiswa Jesu Kristu.
6 Ngokuti Matahwa anoti: “Vonanyi! Ndiri kudira buwe rakasanwa mu Ziyoni, kucihwa ko buwe ro mutengo mukuru ro pacikina, apana naumwe wo vanoritenda anozonyangajwa.”*
7 Asi irona rinosisira kwamuri, ngokuti munotenda; asi arisisiri kuno vacikatendi, ngo kuti matahwa anoti: “Buwe rakarambhwa ngo vavaki, ndirona rakava buwe guru ro pacikina.”
8 Irona “ibuwe rinokhugunya no kuwisa.” Ivona vanokhugunyika ngokuti avazwiri soko ra Mwari. Iyi ndiyona vetero yavo.
9 Asi imwimwi muri “mufumbo wo vandhu vakasanwa, muri upiri hwo umambo, muri jinja rakacena, muri vandhu va Mwari kamare, kuti muzivise mugariro jakanaka” ja Wiya wakamudanija kuvha mu cidima kuti muviye ku ruvheneko hwake hunoshamaisa.
10 Ngokuti kare amucaingepi vandhu va Mwari, asi wari muri vandhu vake; kare mainga mucizivi kuitihwa unyasha, asi wari maitihwa unyasha.
11 Hama jinodiwa, ndinomungwaja imwimwi vonyikanja no vagari vo nguva shoma kuti murambe mecihwisana no zvido zvo kunyama, zvinohwisana na imwimwi.*
12 Mufambiro wenyu ngauve wakanaka pakati po majinja, kuti vakambhera ngo kunanga kuti muri vandhu vakashata, ivona vanozovona ngo meso avo mabasa enyu akanaka, vopa nduma kuna Mwari pa njiku yo kupopohwa ndiyena.
13 Ngo pamusoro pa Mambo, jidirenyi pasi po zviro zvese zvakaithwa ngo* vandhu, zvakadari inga mambo, wiya ano cigaro cakakhwirira kupinda imwimwi,
14 kana ku magovhernadhori akatumwa ndi mambo kuti apanice vashaishi no kusimba vanoita zvakanaka.
15 Ngokuti Mwari anoda kuti, ngo kuita kwenyu zvakanaka, munyaraje mabhuyo o kutama kuziva ko vandhu vacina hwiru.
16 Ivanyi vandhu vakasujunuka, mucashandisa rusujunuko hwenyu kuti muite zvakashata asi hushandisenyi inga varanda va Mwari.
17 Kujanyi vandhu vo mushovo wese, disanyi hama* jo munyika yese, ithyanyi Mwari, kujanyi mambo.
18 Varanda ngavajidire pasi po majipatarau avo no nderemejo yese inosisira, kuciripi basi kuno vakanaka no vanozwisisa, asi na vaya vanonesa kudakajisa.
19 Ngokuti kudari mundhu akacungirira zvineso* no kuitihwa zvicizivi kururama ngo ndava yo hana yake pamberi pa Mwari, ndizvona zvinodakajisa.
20 Zvinomutengo wenyi kucijikira kutakwa ngo pamusoro po kushaisha? Asi kudari mukacungirira matambujiko ngokuti muri kuita zvakanaka, izvo zvinodakajisa Mwari.
21 Zvokadi, makadanijihwa zvondhozvo, ngokuti na iyenavo Kristu wakatambujika ngo ndava yenyu, ecimusiira muezaniso kuti munase kutevera soka jake.
22 Iyena aazivi kuita cishaishi, pamuromo pake apazivi kumbobuda manyepo.
23 Paaitukwa, iyena aacaihwirijirepi ngo kutukavo. Paaitambujika, iyena aacaithyisijirepi, asi waizvisiya munyara ja Wiya anotonga mu urungami.
24 Iyena pacake wakathwara zvishaishi zvedu mu muviri make pa mutanda,* kuti tife* pa zvishaishi zvedu, torarama ngo pamusoro po urungami. “Imwimwi makarapiwa ngo zvivonje zvake.”
25 Ngokuti imwimwi maiita inga mavhuta akarasika, asi wari mahwirira ku muhavisi no muvonereri wo upenyu hwenyu.
Masoko o Pasi
^ Mashwe.
^ Kana: “kuthathanywa.”
^ Gama ngo Gama: “anozopseruka.”
^ Kana: “zvinohwisana no mwiha.”
^ Kana: “po mabasa o utongi hwo.”
^ Gama ngo Gama: “rubatano hwo hama.”
^ Kana: “kusuruvara; kuhwajihwa.”
^ Kana: “zimbuti.”
^ Kana: “kuti atiponese.”
