1 Pedhru 3:1-22
3 Na imwimwivo vanakaji, jidirenyi pasi po majimwamuna enyu, kuti nee vamweni vacikazwiri soko ra Mwari, vanozokhohwa ngo mufambiro wakanaka wo vakaji vavo, kuciripi ngo soko,
2 ngo pamusoro po kuvona mufambiro wenyu wakacena pamwepo no nderemejo huru.
3 Mucaita vakaseja kunja basi, zvakadari inga kuruka vhuji no kusimira maperora* hwo goridhi, kana ngo kusimira nguvo jakaseja maningi
4 asi ivanyi vakaseja ngo mukati, makasimira zviro zvicikavori zvo mujimu wakathiva no kunyarara. Ndizvona zvino mutengo mukuru pamberi pa Mwari.
5 Ngokuti vanakaji vakagondeka vo kare vaijisejesavo kudaro povaivetera Mwari, vecijidira pasi po majimwamuna avo,
6 inga Sara waizwira Abhirahama, ecimudanija kuti mambo. Imwimwi munozoita vana vake kudari mukaramba meciita zvakanaka, mucingathyi.
7 Imwimwivo majimwamuna, rambanyi mecigara no vakaji venyu mecinasa kuvaziva.* Kujanyi vakaji inga mujiyo ucina simba, ngokuti ivona vanozogaravo utaka hwo unyasha hwo upenyu na imwimwi, kuti mukumbiro jenyu jizike.
8 Pakupejisira, ivanyi makabatana mu murangariro, mecihwajihwa ngo kutambujika ko vamweni, mecida hama, mecizwirana pena no kujidodokesa.
9 Mucahwirijira ushaishi ngo ushaishi, kutukwa ngo kutuka. Asi pa ndau pazvo komboreranyi, ngokuti makadanijihwa zvondozvo, kuti mugare utaka hwo makomborero.
10 Ngokuti “wiya anoda upenyu no kuva no njiku jinodakajisa anodikana kungwarira rurumi no muromo wake, kuti atame kuvereketa zvokunyepa.
11 Iyena ngaasiye zvakashata, woita zvakanaka; iyena ngaapsake runyararo no kuvangisira nguva jese kuti ave no runyararo no vadoni vake.
12 Ngokuti majiso a Jehovha* anovona varurami, njeve jake jinopurukira mukumbiro javo jo kudeketera, asi Jehovha* anohwisana* no vanoita zviro zvakashata.”
13 Zvokadi, ndiyani anozomukhuvaza kudari mukavangisira kuita zvakanaka?
14 Asi pikija mukatambujika ngo kuita zvakarungama, imwimwi muno mudakaro. Ngokudaro, mucathya zvavanothya* nee amudikani kucamwa.
15 Asi mu mwoyo mwenyu, cenesanyi Kristu Mambo, mecigara makanasirira kuti mudavire vaya vanovereketa ngo pamusoro po vetero yamunayo, asi mecizviita ngo kupfava kwese no nderemejo huru.
16 Ivanyi no hana yakanaka, kuti pari pese pavanovereketa zvakashata kwamuri, vapseruke ngo kuvona mufambiro wenyu wakanaka wo vateveri va Kristu.
17 Ngokuti zvakanaka kutambukija meciita zvaushoni, kudari Mwari akada kuzvitendera, kuciripi kutambujika ngokuti muri kuita zvakashata.
18 Kristu wakafira zvishaishi kamwe mbhera narini; mururami kufira vacizivi kururama, kuti amuendese kuna Mwari. Iyena wakafa ari mundhu wo kunyama, womuswa kuti ave no upenyu hwo kumujimu.
19 Ngo kudaro, iyena wakaenda kocumaera* mujimu jiri mukadheya,
20 jainga jakapandukira, Mwari paaivetera ngo kusengerera* mu njiku ja Nowa, piketi* payaivakwa. Iyona yakaponesa vandhu vashoma basi, kana kuti vandhu vasere, vakaponeswa mukumwa.
21 Kumwa iyo, inoshanda inga muezaniso wo rubhabhatijo hunomuponesa nyamasi, (rubhabhatijo uhu asipi hwo kusuka svina yo muviri, asi muri kukumbira hana yakanaka kuna Mwari), ngo kumuswa ka Jesu Kristu.
22 Iyena ari ngo kumukono muho wa Mwari, ngokuti wakaenda mugore, wodihwa panyezuru po ngirozi, zvigaro no masimba kuti zvimuzwire.
Masoko o Pasi
^ Mapuwe o mutengo mukuru.
^ Kana: “kuvareremeja; kuvazwisisa.”
^ Vonanyi Kudurujihwa ko Magama .
^ Vonanyi Kudurujihwa ko Magama .
^ Kana: “asi kumeso kwa Jehovha kunohwisana.”
^ Kangaije: “mucathya kuthyisijira kwavanoita.”
^ Kana: “kotokotesa masoko o rutongeso ku.”
^ Gama ngo Gama: “kusengerera kwa Mwari kwaivetera.”
^ Kana: “arka.”
