1 Pedhru 4:1-19
4 Zvecivoneka kuti Kristu wakatambujika ngo kunyama, imwimwivo munodikana kusimira murangariro wondhowo; ngokuti mundhu anotambujika ngo kunyama waregera zvishaishi,
2 kuti azopone mazuva ese anomusarira o kunyama, eciita kuda ka Mwari, kuciripi kuda ko vandhu.
3 Wakwana mukuvo wamakapeja meciita zvaida majinja pamaiita mufambiro unopseruja, mecida maningi zvakashata, mecidhakwa, meciita mabuso akanyanyisa, kumwa maningi doro no kunamata zvithombi kucikatendehwi pa mutemo.
4 Ivona avazwisisi thangwe rinomuitisa kuti mutame kufambazve navo mu upenyu hwakashata, ngo kudaro vanobhuya zvakashata ngo pamusoro penyu.
5 Asi vandhu ava vanozojidavirira kuna wiya anoimira kutonga vapenye no vakafa.
6 Ngo zvakaitisa kuti masoko akanaka atokoteseswevo ku vakafa, kuti pikija vecitongwa kunyama pa mavonero o vandhu, ivona vanopona vecitungamirihwa ngo mujimu wa Mwari.
7 Asi kupera ko zvese kwaaphedo. Ngo kudaro ivanyi no murangariro wakanaka no kugara makarinda* meciita mukumbiro.
8 Kupinda zvese, disananyi maningi ngocenyu, ngokuti rudo hunofukija zvishaishi zvakawanda.
9 Ashirananyi ngocenyu mu mamuzi mucikan’gun’guti.
10 Mukuzwirana no cipo caakaashira, umwe nga umwe, ngaacishandise pa kushandira vamweni, inga muvonereri wakanaka wo unyasha hucikaezaniswi hwa Mwari, hunokhombijwa ngo njira jakasiyana-siyana.
11 Kudari mundhu ecivereketa, ngaaverekete masoko a Mwari; kudari mundhu ecishandira, ngaashandire ngo simba ra Mwari; kuti Mwari apuwe nduma ngo pamusoro pa Jesu Kristu mu zvese. Nduma no simba ngo zvake mbhera narini, kwenda no kwenda. Ameni.
12 Hama jinodiwa, mucakahamara ngo muejo jakakura jamuri kusongana najo, inga muri kuitikihwa ngo zviro zvipsa.
13 Asi rambanyi mecidakara pamunonga mecitambujikavo mu matambujiko a Kristu, kuti imwimwi mudakarevo no kuzara ngo mudakaro pa kuvoneswa ko nduma yake.
14 Dakaranyi, kudari mecitukwa ngo pamusoro po zina ra Kristu, ngokuti mujimu wo nduma, hina, mujimu wa Mwari kamare, uri panyezuru penyu.
15 Ngo kudaro, pakati penyu apadikani kuwanika mundhu anotambujwa ngokuti anouraya, anoba, anoshaisha, kana kuti anonghwinira mushwiro jo vamweni.
16 Kudari mundhu ecitambujwa ngo kuva Mukristu aadikani kupseruka, asi ngaape nduma Mwari pa kutora zina iri.
17 Iyi inguva yakagajwa yo kuti kutongwa kutange ngo nyumba ya Mwari. Kudari kukatanga ndisu, ngoapi anozova maperero a vayani vacikazwiri masoko akanaka a Mwari?
18 “Kudari mundhu wakarurama ecidikana kuvangisira kuti aponeswe ndi Mwari, vandhu vakashata no vanoita zvishaishi vanoviya ngo kwapi?”
19 Ngo kudaro, vayani vari kutambujwa mukuzwirana no kuda ka Mwari vanodikana kujipira* ku Musiki wakagondeka, pavanonga veciita zvakanaka.
