1 Timoti 1:1-20
1 Inini Pauro, mupostori wa Kristu Jesu ngo kuda ka Mwari, Muponesi wedu na Kristu Jesu, vetero yedu.
2 Ndiri kukutarira Timoti mwana wangu kamare mu rutendo:
Ivai no unyasha hucikaezaniswi, no pena,* no runyararo hwa Mwari Baba no hwa Kristu Jesu Mambo wedu.
3 Inga zvandakakumbira kuti ugare mu Efeso pandaida kwenda ku Masedhoniya, ndiri kuda kuti uvhunje vamweni kuti vatame kujijisa jijiso yakasiyana,
4 avadikani kupurutana ngano jokunyepa no jo mubarihwana yo kare. Zviro izvi azvibesi ciro, azvipi zviro zvinovha kuna Mwari ngo pamusoro po rutendo, izvi zvinomusa mapope basi.
5 Zvokadi, cidisiso co mutemo uwu, ngo co rudo hunovha mu mwoyo wakacena, hana yakanaka no rutendo huciripi hwo kucengejera.
6 Vamweni vakapauka ngo zviro izvi, vocengejwa ngo mabhuyo acina basa.
7 Vanoda kuita vajijisi vo mutemo, asi avazwisisi zviro zvavanonanga, nee zvavanovangiriraro nazvo avazvizwisisi.
8 Tinozviziva kuti Mutemo wakanaka, kudari ukanasa kushandiswa,*
9 teciziva kuti mutemo auzivi kuitihwa varurami asi wakaitihwa vandhu vanoposa no vapanduki, vakashata mwoyo no vashaishi, vacikagondeki* no vashori no mundhu ari wese anouraya baba na mai, vanouraya,
10 vanohura,* vanarume vanovatana no vanarume,* vanoba vandhu, vanonyepa, vanopika zvokunyepa no ciri cese cinohwisana no jijiso yakacena*
11 mukuzwirana no masoko akanaka anokujwa a Mwari wakadakara, andakapuwa.
12 Ndinobonga Kristu Jesu Mambo wedu, wakandipa simba ngokuti wakavona kuti ndakagondeka kuti andigaje basa iri,
13 kunyange ndainga mutuki no mutevereri pamwepo no kuva mundhu waijikuja. Ndakaitihwa unyasha ngokuti andicaizivepi zvandaiita. Ndainga ndicina rutendo.
14 Asi Mambo wedu wakandiitira unyasha hucikaezaniswi hwakakura maningi, ndowana rutendo no rudo hwakavha kuna Kristu Jesu.
15 Masoko aya anogondeka, iwona anofanera kuthembhwa: Kristu Jesu wakaviya pasi pano kuzoponesa vashaishi. Inini ndiri mushaishi kupinda vese.
16 Asi ndakaitihwa unyasha kuti ngo ndava yangu inini mundhu wakashatisisa, Kristu Jesu akhombije kusengerera kwake, ecindiita muezaniso kuna vaya vanozomugonda kuti vave no upenyu hucikaperi.
17 Kuna Mambo acina magumo, acingafi, acingavoneki, Mwari umwe ega, ngaakujwe no kureremejwa mbhera narini, kwenda no kwenda. Ameni.
18 Mwana wangu Timoti, ndinokupa mutemo uwu, mukuzwirana no zviporofeti zvainga zvakaithwa ngo pamusoro pako, kuti mukuzwirana na izvona, rambai wecihwa hondo yakanaka,
19 weciramba uno rutendo no hana yakanaka, yakarambhwaya ngo vamweni, zvovatora kuti vandondomere mu rutendo.
20 Vamweni vavo ndi Imineu na Areshandre vandakapa kuna Sathana, kuti vajijiswe ngo mbhangiro kuti vatame kutuka.
Masoko o Pasi
^ Gama ngo Gama: “unyasha.”
^ Gama ngo Gama: “ukanasa kutevejwa.”
^ Kana: “vacina rudo hwakagondeka.”
^ Vonanyi Kudurujihwa ko Magama pa gama rokuti “Uhure.”
^ Gama ngo gama: “vanarume vanovata no vanarume.”
^ Kana: “inobesera.”
