1 Timoti 2:1-15
2 Pakutanga, ndinomuvhunja kuti muite mukumbiro kuna Mwari kuti abesere vamweni, mecimudeketerera no kumukumbira pamwepo no kubonga Mwari ngo pamusoro po vandhu vese,
2 kubatanijavo majimambo no vese vakadihwa* pa utongi, kuti tirambe tino upenyu hwakathiva no kugajana, no kujipira kuna Mwari no kureremeja kwese.
3 Ndizvona zvakanaka, zvinodakajisa Mwari Muponesi wedu.
4 Iyena anoda kuti vandhu vese vaponeswe no kuwana zivo yakarungama yo cokwadi.
5 Ngokuti kuna Mwari umwe ega, no muviiranisi umwe basi pakati pa Mwari no vandhu, mundhu umwe, Kristu Jesu.
6 Iyena wakajipira ega kuti aite muripo unozwirana ku vandhu vese. Nga uhu ucapupu hunozoitwa pa nguva kwayo.
7 Kuti ucapupu uhu huitwe, inini ndakagajwa kuti ndive mucumaeri no mupostori, ndiri kubhuya zvokadi, andiripi kunyepa, inini ndiri mujijisi wo majinja ngo pamusoro po rutendo no cokwadi.
8 Ngo kudaro, ndinoda kuti mu ndau yese vandhu ngavarambe vakacena veciita mukumbiro vakamusa nyara, vacina ushungu, vacikaphikizani.
9 Ndizvonavo zvondhozvo, vanakaji vanodikana kusimira nguvo jakareremera,* vajinemese* ngo kujibata no murangariro wakanaka,* vacikajinemesi ngo marukihwe o mandoto, ngo goridhi, ngo maperora* kana ngo nguvo jinodhura,
10 asi ngo maitiro anofanera vanakaji vanonamata Mwari, kana kuti, ngo mabasa akanaka.
11 Vanakaji ngavajije vakanyararisa* vecijidodokesa.
12 Anditenderi kuti mwanakaji ajijise, kana kuti atonge mwanarume, asi ngaarambe akanyararisa.*
13 Ngokuti wakatanga kuruhwa ndi Adhamu, wozoviya Evha.
14 Cimwenizve nga ici, Adhamu aazivi kucengejwa, asi mwanakaji ndiyena wakacengejwa kamare, wova mushaishi.
15 Asi iyena anozoponeswa ngo kubara vana, kudari iyena* akaramba ari mu rutendo, mu rudo, mu ruceno no murangariro wakanaka.*
Masoko o Pasi
^ kana: “vakakandwa.”
^ Kana: “jakanaka.”
^ Kana: “vajisejese.”
^ Kana: “no hwiru kwaho.”
^ Mapuwe o mutengo mukuru.
^ Kana: “vakathiva; vakanyarara.”
^ Kana: “akathiva; akanyarara.”
^ Gama ngo Gama: “ivona.”
^ Kana: “ano hwiru kwaho.”
