1 Vakorinte 11:1-34
11 Nditevejerenyi inga zvandinotevejera Kristu.
2 Ndinomubonga maningi ngokuti muri kundiceukija pa zviro zvese. Imwimwi muri kuita zviro zvese inga zvandakamujijisa.
3 Asi ndinoda kuti muzive kuti musoro wo mwanarume wese ndi Kristu; mwanarume ndiyena musoro wo mwanakaji; musoro wa Kristu ndi Mwari.
4 Mwanarume wese anoita mukumbiro kana kuporofeta akafukija musoro ngo ciri cese, anopseruja musoro wake.
5 Asi mwanakaji wese anoita mukumbiro kana kuporofeta acizivi kufukija musoro, anopseruja musoro wake. Ngokuti zvakaezana no mwanakaji anopahwa musoro wake.
6 Kudari mwanakaji akaramba kufukija musoro wake, anodikana kugundhwa; kudari zvecipseruja kuti mwanakaji agundhwe kana kupahwa mu musoro, ngaafukije musoro.
7 Mwanarume aadikani kufukija musoro, ngokuti ndiyena muezaniso wa Mwari no rukujo hwake, asi mwanakaji ndiyena rukujo hwo mwanarume.
8 Ngokuti mwanarume aazivi kuvha ku mwanakaji, asi mwanakaji ndiyena wakavha ku mwanarume.
9 Kusiyapo izvo, mwanarume aazivi kusikihwa mwanakaji, asi mwanakaji wakasikihwa mwanarume.
10 Ngo kudaro, mwanakaji anodikana kuva no citatijo co kuzwira, mu musoro make, ngo ndava yo ngirozi.
11 Kusiyapo izvo, mu ungano ya Mambo, mwanakaji aangavipo pacina mwanarume, nee mwanarume aangavipo pacina mwanakaji.
12 Ngokuti, inga mwanakaji wakasikwa kuvha ku mwanarume, mwanarume anobahwa ngo mwanakaji; asi zviro zvese zvakasikwa ndi Mwari.
13 Zvivonenyi mwega imwimwi: Zvingaita kuti mwanakaji aite mukumbiro kuna Mwari acizivi kufukija musoro?
14 Masikihwe akaithwa mundhu, anomujijisa kuti mwanarume akava no vhuji rakareba zvinomupseruja.
15 Kudari mwanakaji akava no vhuji rakareba rinoita rukujo kwaari. Ngokuti mwanakaji wakapuwa vhuji rakareba kuti afukije ndirona musoro.
16 Asi, kudari ari wese anoda kutama kuzwirana no cirovejeso ici, itusu atina cirovejeso cimweni, nee ungano ya Mwari aitonavo.
17 Asi andimusimbi pandinomupa ndhungamiriro iji, ngokuti musongano yamunoita aimubesi, asi inomukhuvaza.
18 Cokutanga, ndiri kuzwa kuti pano kuparajana pakati penyu pamunoita musongano mu ungano; ndinovona kuti ndizvona.
19 Ngokuti pakati penyu panozovavo no zvikwata, kuti vaya vanotendehwa ndi Mwari, vavoneke kuti ngovapi.
20 Pamunoungana pa ndau imwe, amuunganiri kuti muhe Cirariro ca Mambo.
21 Painokwana nguva yo kuha cirariroco, umwe na umwe wenyu anonga aha zvokuha zvake, zvoita kuti umweni ano njara asi umweni wadhakwa ngokuti wamwa maningi.
22 Kureva kuti amuna nyumba jo kuhira no kumwira? Kana kuti, munorerusa ungano ya Mwari no kupseruja vaya vacina zviro? Waro ndonangenyi kwamuri? Kunanga kuti ndomusimba? Inini andimusimbi ngo ndava yazvo.
23 Ndinomujijisavo zvandakajijiswa ndi Mambo, zvokuti pa usiku hwaaida kutengeswa Mambo Jesu, wakatora pau.
24 Paakapera kuita mukumbiro, wakaigura-gura, wonanga kuti: “Pau iyi, inoimirira muviri wangu unozoitwa mupiro ngo ndava yenyu. Endereranyi mberi meciita izvi mecindiceukija.”
25 Wakaitazve zvondhozvo no kopo pasure po kurarira, wonanga kuti: “Kopo iyi, inoimirira citenderano cipsa cinozoshanda ngo ngazi yangu. Garanyi meciita kudaro mukuvo wese wamunomwa vhinyu* iyi, mecindiceukija.”
26 Ngokuti mukuvo wese wamunoha pau iyi no kumwa vhinyu* iyi, munotokotesa kufa ka Mambo mbhera aviye.
27 Asi, ari wese anoha pau no kumwa vhinyu* ya Mambo kuveni iyena aafaneri, anozova no ndava ngo pamusoro po muviri wa Mambo no ngazi yavo.
28 Mundhu ngaatange kujipopora avone kuti dangani anofanera, akazopera ngaahe pau no kumwa vhinyu* iyi.
29 Kudari ari wese anoha no kumwa acikazivi kuti zvaanoharo no zvaanomwaro zvinoimirira muviri wa Mambo, iyena ari kujiviisira kutongwa.
30 Ngo ndava yazvo, vazinji venyu vakaremba no kuhwaja. Vandhu vakawanda vakafa.*
31 Asi kudari tikaziva zvatiri, atizotongwi.
32 Asi patinotongwa, tinonga tecipangihwa ndi Jehovha* kuti titame kutongwa pamwepo no nyika.
33 Hama jangu, pamunoungana kuti muhe cirariro ici, imirananyi ngocenyu.
34 Kudari aripo ano njara, ngaahe kanyi kwake, kuti pamunonga makaungana, mutame kuunganira kutongwa. Ngo pamusoro po shwiro jimweni jasara, ndinozojinasirira ndikazogumeyo.
Masoko o Pasi
^ Gama ngo Gama: “kopo.”
^ Gama ngo Gama: “kopo.”
^ Gama ngo Gama: “kopo.”
^ 1Gama ngo Gama: “kopo.”
^ Zvinganangira kufa ko kumujimu.
^ Vonanyi Kudurujihwa ko Magama.
