1 Vakorinte 13:1-13
-
Rudo igwanja rinopinda makwanja ese (1-13)
13 Kudari ndikavereketa ngo ndumi jo vandhu no jo ngirozi asi ndicina rudo, ndiri utare huri kuriravo hawo no simbi iri kuriravo hayo.
2 Kudari ndino cipo co kuporofeta no kuzwisisa cakafisika ca Mwari no zivo yese, ndova no rutendo hwese hunokwanisa kuthuthisa matundhu, asi ndicina rudo, andiripi ciro.
3 Kudari ndikapa zviro zvandinazvo zvese kuti zvihise vamweni, ndopira muviri wangu kuti ndijikuje, asi ndicina rudo, apana cazvinobesera.
4 Rudo hunosengerera, rudo huno unyasha. Rudo ahuna ushanje. Ahujitundhumaji, ahujikuji,
5 rudo ahuiti zvicikafaneri, ahupsaki kuda kwahwo, ahukasiki kucamwa. Ahuverengi zvishaishi.
6 Rudo ahudakari ngo zvicizivi kururama, asi unodakara ngo cokwadi.
7 Hunocijikira zviro zvese, hunotenda zviro zvese, hunovetera zviro zvese, hunocungirira zviro zvese.
8 Rudo ahuperi. Kudari kuno zvipo zvo kuporofeta, zvinozopera; kudari kuno zvipo zvo kuvereketa ngo ndumi jakasiyana-siyana, zvinozopera. Kudari kuno zivo, inozopera.
9 Ngokuti tino zivo icizivi kukwana, no kuporofeta kucizivi kukwana,
10 asi pazvinozoviya zvakakwana, zvicizivi kukwana zvinozopera.
11 Pandainga mwana mudoko, ndaivereketa inga mwana mudoko, ndairangarira inga mwana mudoko, ndaivona zviro inga mwana mudoko. Asi wari inini ndaadhodha. Andicaiti zvinoithwa ngo mwana mudoko.
12 Ngokuti wari atiripi kunasa kuvona ushoni ngo supeya yo simbi. Asi mbaimbai pano tinozovonana meso ngo meso. Wari ndiri kuziva padoko, asi inini ndinozonasa kuziva, inga zvandinonasa kuzivika wari uno.
13 Asi wari, zviro zvitatu zvinogara zviripo nga izvi: Rutendo, vetero no rudo; asi cikuru pa zvese, i rudo.
